Etxeko laguntza: geroz eta pertsona gehiagok eskatzen duen zerbitzua
Batez ere edadeko pertsonei ematen zaien zerbitzua da: ohetik jeikitzen lagundu, garbitasuna egin, jantzi, erosketak egin, zenbait gestio eta abar . Gaur egunean Hernanin 89 pertsonek jasotzen dute laguntza hori.

Etxez etxeko laguntza zerbitzuak 22 urteko historia du Hernanin eta geroz eta jende gehiagok eskatzen duen laguntza da. Gaur egunean 89 pertsonek jasotzen dute zerbitzu hau eta 35 langile ari dira lanean. Etxeko laguntza da, azken batean, eguneroko etxeko martxa eramateko arazoak dituenari laguntzeko sistema. Hamarretik bederatzitan edadeko pertsonei ematen zaie, baina, baita gazteei ere, familiako gorabeherak edo bestelako ezintasunen bat medio. Zerbitzua jasotzen duen jendeak gogotik estimatzen du laguntza. Oinarrizko lanak egiteaz gain, askori seguritatea, babesa eta bizi poza ere ematen die.
Etxeko laguntza orduka ematen da. Gehienek etxeko lanak eta garbitasuna eskatzen dituzte, eta egunero 2 orduko zerbitzua izaten da hori. Aurten, denera, 32.000 ordu emango dira, iaz baino 10.000 gehiago. Andoni Amonarraiz buru duela, Ongintzako zuzendaritzak onartu berria du zerbitzu zabaltze hori lehenbailehen martxan jartzea. Zerbitzua haundituta, laguntza zai zeuden behar haundieneko kasuak kubrituta daudela diote Ongintzan. Hala ere, ikusten dute beste 18 pertsona daudela laguntza hori eskatuta daudenak.

Familia inplikatu
Etxez etxeko zerbitzuak oinarrizko lanak egiten ditu, beharrak ikusita: ohetik jaiki eta ohean sartzen lagundu, pertsonaren eta etxeko garbitasuna, erosketak, jana jarri, arropa lanak, medikuak agindutako tratamendua zaindu eta abar. Baina, ez da beti erreza izaten zehaztea zer den langile horien lana. Batzuetan, ez dagozkien lanak ere egiten dituzte, baina, etxez etxeko zerbitzuaren helburuetako bat familia inplikatzea eta zaintzen duten pertsona familiaren laguntza ere izatea bada. Eta horrekin batera, zerbitzuak laguntzen du pertsona hori ahal den arte bere ingurunean mantentzen.
Etxeko laguntza goizeko 08:00etatik iluntzeko 20:00ak arte ematen da, berez. Hala ere, gehienek 09:00etatik eguerdiko 13:00etara hartzen dute. Asteburuetan ere ematen da behar izan ezkero, baina, normalean ez da kasurik izaten. Aste Santuan, adibidez pertsona batek jaso du etxeko laguntza.

Moldatzeko baliabideak
Etxeko laguntza behar duten pertsonek batzuetan etxe barruan hobeto moldatzeko gauzak behar izaten dituzte: grua, takataka, komon bereziak, ohe bereziak eta abar. Baliabide horiek denak zerbitzu horren bidez debalde lortzeko aukera izaten da, eta bestetan Ongintzak laguntzak ematen ditu etxean jartzeko.

Baserrietara
Etxeko laguntza baserrietara ere iristen da eta hiru etxetan ematen da. Ongintzak orain ikerketa berezi bat egingo du baserri munduko behar sozialak aztertzeko.
Etxeko laguntza eskatzeko Ongintzan hartu behar da ordua. 943-55 78 54.

.

Etxeko lanak eta konpainia Gehienek etxeko lanak egitea eskatzen dute eta aldi berean etxean bizi den edadetuari konpainia ere egiten zaio. Hori asko eskertzen dute. Zerbitzuaren helburua Pertsona helduei eta orokorrean, etxean laguntza behar duten pertsonei laguntza osoa ematea da. Laguntza eskatzeko arrazoia eguneroko bizimoduan moldatu ezina da. Zerbitzuaren Maiztasuna Beharraren arabera erabakitzen da zenbatero eman laguntza: egunero ordu bat, astean 4-6 ordu. Kasu berezi bat dago eta pertsona batek egunero 3 orduko laguntza jasotzen du. Finantziazioa Diputazioak, Udalak eta norberak. Orduko 42 zentimotik 14,80 euro arte ordaintzen du norberak, diru sarreren arabera. Zerbitzu osoak 533.518 euroko aurrekontua du eta aurten 32.000 ordu emango dira.

---

Ardi mozten, udako beroak hasi aurretik da

Udaberria izaten da ardiak mozteko garaia, udarako berorako pronto egon daitezen. Hernani inguruan, leku gehientsuenean bezalaxe, bakantzen ari dira artaldeak, baina, bada oraindik ofizioari eusten dionik eta Antonio Apezetxea, Patxi Apezetxea eta Julian Pagola dira horren adibide.
Ardi mozten aritzen diren hiru lagun hauek garai bateko eran aritzen dira ardi mozten, goraizeekin. Praktika eskatzen duen lana da ardi moztearena, baina, kolpe asko huts egin gabe aritzen da hirukotea: goraizeak harraitzean ondo zorroztu, ardiari lau hankak lotu eta mahai gainean jarrita ilea moztu.
Urnietako Perurenaren artegian aurkitu ditugu eta beren hitzetan hemendik eta ekain aldera arte Hernani inguruko leku bat baino gehiagotan ariko dira. Iaz 1.000 ardi inguru moztu zituzten eta aurtetxi
Garai batean estimatua zen artilea, baina, kontu horiek bukatu ziren artzaiak berak Kronikari esan dionez. Gaur egun gutxi ordaintzen da “eta askotan eramaten dutenean gustora” esan digu.

Mendi irteera Itsasuko Artzamendi tontorrera
Mendiriz Mendik irteera antolatu du datorren iganderako. Lapurdiko Itsasu herritik atera eta Artzamendi (926 metro) dute igotzekoa, Bidarraira jaisteko. Roland-ko pasabidetik eta Arpeako Saindutik pasako dira ibilaldian, Bidarraira iritsi aurretik. Izen ematea ostegunean egin behar da Mendiriz Mendi elkartean, arratsaldeko 20:00etatik 21:00etara.
Bestalde gaztetxoentzako mendi irteera apirilaren 25ean da Beasaingo Usurbe mendira (707 metro) eta izen ematea apirilaren 22a baino lehen egin behar da, Mendiriz Mendi bertan, astelehen, ostegun eta ostiraletan, 20:00etatik 21:00etara.

Igor eta Erasek irabazi dute Garin tabernako futbolin txapelketa
Futbolin txapelketa jokatu dute Garin tabernan eta Igor eta Erasek irabazi dute, finalean Jexux eta Bixintxori 10-8 irabazita. Hurrengo gelditu direnak: Xixa-Joanes, Insumiso-Txato, Asier-Dabid, Txusta-Imaz, Zesar-Itturri, Kalamar-Ekaitz, Bittor-Joxe eta Petto-Alazne. Sailkapeneko azken postuan H-Pol beteranoak gelditu dira.

‘Herri Arteko Elkartasun mus txapelketa’ ostegunean
Datorren ostegunean jokatuko da Garin tabernan Herri Arteko elkartasun mus txapelketako lehen fasea, arratsaldeko 21:00etatik aurrera. Finala jokatzen duten bi bikoteak eskualdeko finalera pasako dira eta finala datorren larunbatean da Usurbilen, Aitzaga tabernan. Hernanin txapeldun gelditzen den bikoteak afari bat irabaziko du eta eskualdeko lehenengo 4rentzat daude sariak Usurbilgo finalean. Izen ematea 20 euro bikoteko.

Udalekuak Hernanin
Izen ematea zabalik apirilaren 30a arte
Udaleko Euskara Zerbitzuak Udalekuak antolatu ditu 3-10 eta 11-12 urte bitarteko umeentzat. 3-10 urte artekoentzako Udalekua hilabeteko da eta 11-12 urte artekoentzakoa 15 egunekoa. Helduenen Udalekuetan kirol aktibitateak izango dira. Izen ematea apirilaren 30a baino lehen egin behar da eta 77,25 euro kostako da matrikula. Hernaniko ikastetxeetan dabiltzan gazteek bertan eman behar dute izena eta Hernanitik kanporako ikastetxeetan ikasten dutenek Udaleko Euskara Zerbitzuan. Informazio gehiago 943 337029 telefonoan.

Kiroldegia eta Liburutegia
Gaurtik aurrera ordutegi normala
Aste Santuko oporretan itxita egon da liburutegia eta Kiroldegia goizetik ireki dute. Gaurtik aurrera ordutegi normalera bueltatuko dira eta baita gainerako Udal zerbitzuak ere.

Astigarraga
Nikaraguari buruzko erakusketa
Honek Gobernuz Kanpoko Erakundeak Nikaraguari buruzko erakusketa jarriko du gaur Astigarragako kultur etxean, datorren igandera arte. Ordua: aste barruan, 18:00etatik 20:30etara; larunbat eta igandean 11:30etatik 13:30etara. Ostegunean La revolución Sandinista bideoa botako dute, eta ostiralean La canción de Carla pelikula; biak 19:30etan.