Untitled Document

Zazpi probintzietako dantzariak Hernanin, bederatzigarren Dantzari Festan
Apirilaren 19tik 25era da eta azkenekoa izango da egun nagusia. Hernanitik Ttarla dantza taldeak, dantzari txikiek, San joan konpartsak eta Musika Eskolako musikariek hatuko dute parte.

Apirilaren 19tik 25era izango da Dantzari Festa Hernanin eta aurten ere ekitaldi asko izango dira, astelehenetik igandera. Egun haundia igandekoa izango da eta bertan Gipuzkoa, Bizkaia, Nafarroa, Araba, Behe Nafarroa, Lapurdi eta Xuberoako dantzariak ibiliko dira kalez kale dantza erakustaldia egiten. Zortzi dantza taldek hartuko dute parte igandean eta horien artean izango da Ttarla Hernaniko dantza taldea ere.

Egunero ekitaldiak
Urteroko moduan Euskal jantzien erakusketa egongo da Biteri kultur etxean, astelehen, astearte eta asteazkenean 17:00etatik 20:00etara eta ostegun eta ostiralean 17:00etatik 19:00etara. Hiru hitzaldi ere izango dira Biterin: Baserritarren Jantziak, Uda eta Baserritarren Janzkerak. Dantzara animatzen diren guztientzat dantza ikastaroa izango da ostiralean Plaza Berrian, Patxi Perezen eskutik, eta larunbat goizean kalejira eta Erromeria dago Tilosetan, Hernaniko Musika Eskolako musikariek girotuta. Larunbat ilunabarrean, berriz, Donostiako Eskola dantza taldeak dantza emanaldia emango du Biteri kultur etxean. Igandean egun osoko festa dago.

EGITARAUA -Apirilaren 19tik 25era

Apirilak 19-20-21-22-23
17:00-20:00 edo 17:00-19:00 Euskal-jantzien erakusketa. Biterin.

Apirilak 20
15:30-16:30 Hitzaldia: Baserritarren jantziak. Hizlaria: Axen Egaña. Biterin.
19:30 Hitzaldia. Uda, jaiak eta jantziak. Hizlaria: Javier de Juanes. Biterin.

Apirilak 22
19:00 Hitzaldia: Baserritarren Janzkerak. Hizlaria: Ramon Garcia. Biterin.

Apirilak 23
19:00 Euskal dantza ikastaroa Patxi Perezekin. Plaza Berrian.

Apirilak 24
12:00 Kalejira Kaxkoan eta erromeria Plaza Berrian.
16:30 Dantzari txikien emanaldia Biteri plazan.
20:00 Dantzaldia Eskola dantza taldearen eskutik. Biterin.

Apirilak 25
10:30 Kalejira
11:00 Dantza talde guztiek ikurriña dantza plazan eta kalejira eta dantza emanaldia Hernanin barrena.
13:30 Preso eta errefuxiatuen omenezko ekitaldia.
14:30 Bazkaria Tilosetan.
17:30 Erromeria Baionako Harrabost Txarangak girotua.

Txakur kakak eta txakurrek eragindako txikizioak
direla eta, ordenantza bete egin behar dela dio Udalak
“Txakur gorotzen presentzia nabarmena” dela ohartarazi du. Sagastialdeberrin txakur batek 6.000 euro inguruko kalteak egin dituela ere jakinarazi du.

Andoni Amonarraiz, Zerbitzu Publikoetako zinegotziak Kronikara bidalitako prentsa ohar batean, hernaniarrei jakin arazi die txakur kaka asko ageri dela Sagastialdeberrin dagoen atletismo pista inguruan eta baita herriko beste kaleetan ere. Horrekin batera, dio txakur batek “seguru aski jabeak bultzatuta” kalteak eragin dituela Sagastialdeberriko zonaldeko zuhaitzetan. Prentsa oharrak dio 13 direla kaltetu dituen zuhaitzak: 2 errotik aterata eta beste 11 urte honetan zehar hilko direnak. Sortutako kalteen balorazioa ere egin dute eta 5.961,97 euroko kalteak direla adierazi du Udalak.

Parkeak pertsonentzat
Amonarraizek gogorarazi nahi izan du zonalde berdeak pertsonek, eta bereziki haurrek, erabili eta gozatzeko guneak direla. “Eta ez da bidezkoa helburu honekin sortutako guneak txakurren gorotzez beteta egotea, honek ez baitie haurrei libre jolasten uzten” dio zinegotziak.
Bestalde, jakinarazten die herritarrei, beharrezkoa dela animaliak edukitzea arautzen duen ordenantza betetzea.

Animaliak edukitzea eta babestea arautzen duen Udal Ordenantzak beste hainbat punturen artean dio:

1) Debekatua dago balkoietan, garajeetan, pabiloietan, sotoetan, zabaltzeetan, lorategietan edota bestelako edozein lokaletan animaliak sartu eta gordetzea, baldin eta animaliek auzokide eta oinezkoei beren usain, zikinkeria, ulu edo zaunkekin traba egiten badie.

2) Hiriko bide, leku publiko eta guztien erabilerarako diren eraikin kolektiboetan, txakurrak kontrolpean eta korrea batekin lotuta eduki behar dira. Korreak egokia izan behar du animalien ezaugarrietarako.

3) Debekatua dago txakur gorotzak bide eta plaza publikoetan, haur parkeetan, eta oro har jendea biltzen den lekuan uztea. Txakurraren jabeak edo txakurra daramanak txakurraren gorotza jaso egin behar du. Txakur batek bide publikoa zikintzen badu, herritarrek eskubidea dute txakur-jabeari edo eramaileari zikindutakoa garbi dezan eskatzeko.

4) Aipatutako artikuluak betetzen ez badira zigor erregimena ezarriko da. Bertan hutsegite arintzat hartzen da txakurren gorotzak leku publikoetan uztea. Honek 60,10 euro eta 300,50 euro bitarteko multa izango du.