Askapenarekin brigadatara apuntatzeko epea zabalik dago, apirilaren 18ra arte
Brigadista moduan Kubara, Mexikora, Venezuelara, Irlandara, Txilera eta Argentinara joateko aukera dago. Interesatuek Askapenaren Hernaniko egoitzara deitu edo idatzi: 943 552365. E-maila: info@askapena.org

Askapenaren bidez brigadatara joateko asmoa duenak, apirilaren 18ra arte du izena emateko epea, Askagintzako egoitzan bertan: Kale Nagusia 38, behea. Telefonoa 943 552365. Aurten Kubara, Mexikora, Venezuelara, Irlandara, Txilera eta Argentinara antolatu dituzte Brigadak eta normalean Udaran eta hilabete batekoak izaten dira. Hala ere Mexikoko Txiapasera urte osoan joaten dira. Azken urteetan Kuba, Mexiko eta Venezuelara joan izan dira brigadistak, baina, Irlanda, Txile eta Argentina berriak dira, Askapenak Kronikari jakinarazi dionez.

Trukaketa politikoa
Brigaden helburua lan politikoa egitea da, Askapenako kideek Kronikari esan diotenez eta joaten diren herrialdeetan bertako jendearekin bizitzen dira, herrialde bakoitzeko egoera bertatik ezagutu ahal izateko: “trukaketa politikoari garrantzia haundia ematen diogu. Hango egoera ezagutu eta Euskal Herriko egoera ezagutzera ematen saiatzen gara. Hala ere herrialdetik herrialdera aldatu liteke brigadisten egin beharra, egoera oso desberdinak baitira, baina, helburua ez da beraiekin lan egitera joatea, horretarako jendea sobran daukate eta” diote Askapenako arduradunek.

Iraultza Sandinistan sortua
Iraultza Sandinistaren bueltan sortutako elkartasun taldea da Askapena, eta gerora herri gehiagotara zabaldu dute “elkartasun internazionalista” bere esku orritan dioenez. Ezker Abertzaleari lotutako taldea da eta esku orrietan jartzen duenez “brigada batean parte hartzeak Euskal Herriarekiko, Ezker Abertzalearekiko eta Askapenarekiko konpromezu batzuk hartzea suposatzen du: zure esperientzia zabaltzea eta zure bizitzako esparru guztietan ikasitakoa garatzea hain zuzen ere”. Orain arte Nikaragua, El Salvador, Palestina, Irlanda, Txiapas, Kuba eta beste hainbat herrietara egin dituzte brigadak.

100 lagun inguru
Askapenak antolatzen dituen brigadetara urtero 100 bat lagun joaten dira, Kronikari emandako datuen arabera, eta Hernanitik ere urtero izaten da bat edo beste brigadista talde horretan. Aurtengo izen ematea zabalik dago datorren igandera arte. Apuntatzen direnei informazioa zabalduko zaie aurrena: egitasmoa zer den azaldu, brigaden helburuak, zer ikusiko duten argitu eta abar. Aurrerago destinoa eta gainerako xehetasunak emango dizkiote jendeari eta normalean uztaila edo abuztuan izango da bidaia.

---

Txillida-Lekun 3.500 bat bisitari izan dira Aste Santuan, iaz baino gutxiago, eguraldi euritsua dela-eta
Jende gehiena larunbatean izan zen: 1.022 bisitari. Bisitariei gehien gustatu zaiena: arte lanak espazioan nola antolatuta dauden. Katalanak izan dira bisitari asko.

Txillida-Leku izaten da Aste Santuan Hernanira etortzen diren turista gehienek bisitatzen duten lekua. Aurten 3.561 pertsonek bisitatu dute museoa, ostiraletik astelehenera birtarteko oporraldian. Jende gehiena larunbatean bildu zen Txillida-Lekun, egun horretan 1.022 pertsonek bisitatu baitzuten museoa. Hala ere, iaz baino jende gutxiago izan da, aurreko Aste Santuan 5.035 pertsona izan baitziren. Museoko arduradunek diote eguraldi txarrak eragin duela aurten iaz baino jende gutxiago ibili izana.
Hernanira gehiena etortzen diren turistak katalanak izaten dira eta museora ere katalanak dira gehiena joaten direnak. Frantzesak ere asko izan dira Aste Santu hauetan Txillida-Lekun. Denetariko jendea joaten da museora: familiak, bikoteak eta lagun taldeak.
Museoko arduradunek adierazi dute bisitariei gehiena gustatzen zaiena dela museoaren espazioa nola antolatuta dagoen. Hau da, Eduardo Txillidak egindako arte lanen eta museoko espazioaren arteko konbinazio ona gustatzen zaiela diote arduradunek.

Erakusketak
La casa del Olvido izeneko erakusketa ikusteko aukera izan dute turistek, eta oraindik ere ikusteko aukera dago, apirilaren 26ra arte egongo baita zabalik. Erakusketa honetan Txillidaren 25 marrazki original erakusten dira, Aurtenetxeren poesian inspiratuta marraztu zituenak. Apirilaren 28an erakusketa berri bat inauguratuko dute, Divertimento titulua daramana.

Museora bisitak
Txillida-Lekuko ordutegia da: astelehenetik igandera, 10:30etatik 15:00etara. Sarrerak 7 euro balio du. Gia baten zerbitzua eskatu daiteke eta horretarako 943-336006 telefonora deitu behar da edota sarreran galdetu.

Ereñotzuko San Antonioak antolatzeko bilera bihar
Ereñotzuko San Antonioak prestatzen hasiko dira bihar. San Antonio jaiak, ekainaren 13ko asteburuan izaten dira eta egitaraua pentsatzen hasi dira ereñotzuarrak. Hori dela eta bilera deitu dute bihar arratsaldeko 20:00etarako eta Ikastola Zaharrean izango da. Dei egiten diete festa gogoa duten guztiei azaltzeko.

Txantxangorrin afaria bihar, direktiba aldatzeko eta mus sariak emateko
tXANTXANGORRI Elkartean afaria dute bihar. Afalostean direktiba aldaketa izango da eta mus txapelketako sariak banatuko dira. 20:30etan elkartean.

54ko kintoen bazkaria
Apirilaren 24an kinto bazkaria ospatuko dute 54ko kintoek, urtero egiten duten bezala. Bazkaria Urnietako Oianume jatetxean egingo dute eguerdiko 14:45etan. Bazkarira joan nahi dutenek 943-552961 telefono zenbakira deitu behar dute eta Jose Marigatik galdetu.

Hitzaldia dago bihar Sandiusterrin, autoestimaren
garrantziari buruz
Hitzaldia emango du bihar Sandiusterrin Xabier Arrazola psikologoak, autoestimaren garrantziari buruz. Hitzaldiaren helburua da tresna psikologikoak eskaintzea autoestimazioa hobetzeko eta hobeto bizitzeko. Bederatzi puntuko programa du hitzaldiak eta arratsaldeko 17:00etan hasiko da. Kutxa da antolatzaile.

Lau partidu gaur Galarretan
Arratsaldeko 16:00etan hasiko da jaialdia.
Galarretan lau erremonte partidu jokatuko dira gaur. Arratsaldeko 16:00etan hasiko dira partiduak eta aurrenekoa Uterga-Aisibiak jokatuko dute, Iturralde eta Agirrezabalaren kontra, 35 tantotara. Bigarrena izango da partidu estelarra eta Zeberio II-Auzmendik Altuna I-Lizasoren kontra jokatuko dute, 40 tantotara. Hirugarren partiduan Iñigo-Aizpuru, Altuna II-Badiolaren kontra ariko dira 40 tantotara. Jaialdiko azkeneko partidua Matxin III-Gazteluk jokatuko dute Iribarren eta Aizpuruaren kontra.

Musa
Herri arteko elkartasun mus txapelketa gaur
Gaur jokatuko da Garin tabernan Herri arteko elkartasun mus txapelketako lehen fasea, arratsaldeko 21:00etatik aurrera. Finala jokatzen duten bi bikoteak eskualdeko finalera pasako dira eta finala datorren larunbatean izango da Usurbilen, Aitzaga tabernan. Hernanin txapeldun gelditzen den bikoteak afari bat irabaziko du eta eskualdeko lehenengo 4rentzat daude sariak Usurbilgo finalean. Izen ematea 20 euro bikoteko.

Mendiriz-Mendi
Artzamendira joateko izen emateko azken eguna
Mendiriz Mendik igande honetarako Itsasu-Artzamendira joateko irteera antolatu du. Ibilaldia Bidarraien (Lapurdi) bukatuko da. Izena emateko gaur arratsaldean 20:00etatik 21:00etara Iturregi plazan duten lokalera joan behar da.