Mandazubitik Bazkardorako autobideko obrak 2005ean hastekoak ditu Diputazioak eta 2 urte iraungo dute
Proiektua esposizio publikoan dago Diputazioan, ikusi edo erreklamazioak aurkezteko n 2008an hastekoa dute, N1ean, Bazkardo-Sorabilla arteko obra, zentzu bakoitzean 3 karril jartzeko.

Urumeako autobideko hegoaldeko tramoan egin beharreko obrak esposizio publikoan daude Diputazioan, maiatzaren 8ra arte. Hiru zati ditu: Mandazubi eta Urnieta artekoa: zentzu bakoitzean bi karril, 2,7 kilometro eta 26 miloiko aurrekontua; Urnieta-Andoain: zentzu bakoitzean bi karril, 3,1 kilometro eta 29 miloiko aurrekontua; eta N1-A15 (Bazkardo-Sorabilla); zentzu bakoitzean hiru karril, 4,5 kilometro eta 54 miloi euroko aurrekontua.

Datorren urtean hasi
Mandazubi eta Urnieta arteko obrak eta Urnieta eta Andoain artekoak 2005ean hastekoak ditu Diputazioak, Bide Azpiegituretako Departamentutik Kronikari esan diotenez. Bi obrak 24 bat hilabete iraungo dute eta 2007an bukatzea da asmoa. N-1a eta A-15a arteko obrak, berriz, 2008an hasiko dira eta 2010erako bukatu nahi dituzte.

Arazoak konpondu
Diputazioaren arabera, Urumeako autobideko hegoaldeko tramoak zenbait arazori konponbidea jarriko dio: Urnietako semaforoek sortzen duten denbora galtzea, Andoaingo Ama Candida etorbideko trafikoa eta N1eko zirkulazioa adibidez.

Astigarraga aldera
Astigarragatik barrena Hernani eta Martutene elkartartuko dituen bideko obrak martxan daude, bestalde. 4 kilometro dira eta 61 miloiko aurrekontua du. Asmoa da 2006rako bukatzea. Donostia eta Martune arteko tramoan, berriz, orain ari dira proiektua egiten.
Urumeako autobidea zatika ari dira egiten eta Diputazioaren asmoa da 2010erako bukatzea. Autobideak Andoain eta Donostia elkartuko ditu, Urnieta, Hernani, Astigarraga eta Martutenen barrena.

Urumeako autobidea tramoka - Donostia-Martutene. Proiektua redaktatzen ari dira. Aurtengo urte bukaerarako hasi nahi dituzte obrak. - Martutene-Astigarraga-Hernani. Egiten ari dira eta 2006rako bukatu nahi dituzte lanak. - Hernaniko bariatea, 1 fasea. Mandazubi-Martindegi. Egina. - Hernaniko bariantea, 2 fasea. Mandazubi-Martindegi bideari zentzu bakoitzean 2 karril jartzea. 2008an hasi nahi dute. - Urnietako bariantea. Proiektua egina. 2005ean hasi nahi dute. - Andoaingo bariantea. Proiektua egina. 2005ean hasi nahi dute. - N1-A 15. Bazkardo-Sorabila. 2008an hasi nahi dute.

---

Hernani eta Astigarraga batera aterako dira larunbatean Gipuzkoako herri kirol txapelketan

Andoainen izango dira probak arratsaldeko 17:00etan n Gipuzkoatik 16 taldek hartuko dute parte eta 3 sailkatuko dira Euskal Herriko Txapelketarako.

Bihar jokatuko da Herri arteko Gipuzkoako Herri Kirol Txapelketa, Andoaingo plazan, arratsaldeko 17:00etan, Ikastolen Elkarteko XIBA taldeak antolatuta. Herri bakoitzetik 12 lagunek hartuko dute parte: 6 neska eta 6 mutilek, eta 3 onenak sailkatuko dira Euskal Herriko txapelketara. Hernani-Astigarra taldean aterako dira: Susi Elosegi, Nere Lujanbio, Nagore Soroa, Izaskun Intxausti, Edurne Elizondo, Estitxu Eizagirre, Igor Garmendia, Asier Txini, Jexux Mari Goñi, Ibon Zapiain, Pello Senperena eta Gorka Ezeiza.

Hamaika proba
Proba saila egin behar dute parte hartuko duten 16 herritako kideek: harri jasotzea (neskek 34 kiloko bola eta mutilek 64 kilokoa), 2 minutu; ingudea (neskek 8 kilokoa eta mutilek 12koa), minutu batean; fardo altxatzea (neskek 25 kilo eta mutilek 35), minutu batean; fandango eta arin arina, epaileek puntuatuta; erreleboka: zaku eramatea (mutilek 50 kilo, neskek 35), Txingak (neskek 20 kilo eta mutilek 30); batak bestea eramatea; lokotxak, toka, trontza eta sokatira.
Gipuzkoatik 16 herrik hartuko dute parte bihar: Idiazabal, Segura, Ordizia, Tolosa, Zizurkil, Andoain, Hernani-Astigarraga, Igeldo, Usurbil, Azpeiti, Aia, Arrasate, Soraluze eta Donostiko Antigua, Egia eta Gross.

.

---

Futbola
Sarrera debalde Zubipen Anaitasunaren kontrako partidurako

Gorengo taldeak jokatuko du bihar Zubipen 16:30etan, Anaitasunaren kontra eta CDHk sarrerak debalde jarriko ditu taldeari behar den bultzada emateko. Hernanik 5 partidu daramatza galdu gabe eta mailaz ez jaistekotan bide horretan segi beharra dauka. CDHko zuzendaritzak dei egin die herritarrei Zubipera azaltzeko, taldea animatzera.

---

Saharako haurrak
Saharako haurrak uztaila eta abuztuan etxean hartu nahi dituztenek gaur dute izena emateko azken eguna, Udaletxean. 7 eta 12 urte arteko haurrak dira eta errefuxiatu kanpamentuetan bizi dira. Egonaldiaren helburua da haur hauek beste errealitate batzuk ezagutzea eta hango eta hemengo neska mutilen arteko harremanak sortzea. Interesatuek deitu: 943 337017 edo irantzu-j@hernani.net.

Kontzentrazioa gaur
Etxerat elkarteak hileroko kontzentrazioa deitu du gaur, 20:00etan plazan, Euskal Presoak Euskal Herrira lemarekin. Etxeratek Euskal Presoek jasaten duten egoera salatu du eta martxoaren 11 ezkero egoera txartu egin dela dio. “Gaur egun 698 euskal preso politiko daude euren herritik ehunka eta milaka kilometrotara. Hauetatik 8 baino ez daude Euskal herriko espetxeetan” dio Etxeratek. Salatu du % 85 lehen graduan daudela, % 35 isolamendu galeriatean eta 56 preso, berriz, guztiz bakartuta. Beren egoera salatzeko euskal presoak protestan eta gose greban daudela ere gogoratu arazi du Etxeratek.

Sarrera doan Zubipen
Gorengo taldeak jokatuko du bihar Zubipen 16:30etan, Anaitasunaren kontra eta CDHk sarrerak debalde jarriko ditu taldeari behar den bultzada emateko. Hernanik 5 partidu daramatza galdu gabe eta mailaz ez jaistekotan bide horretan segi beharra dauka. CDHko zuzendaritzak dei egin die herritarrei Zubipera azaltzeko, taldea animatzera.

Igeriketa probak bihar
Hernanik, Fortunak, Igarondok, Ordiziak eta Bidasoak hartuko dute parte bihar igeriketa proban, goizeko 10:00etatik aurrera kiroldegian. Hernaniko igerilariek dei egin die herritarrei animatzera azaltzeko. Bestalde, probak direla-eta, larunbatean itxita egongo da igerilekua.

Meza Floridan bihar
Urtero bezala, maiatzaren batean meza izango da Floridako San Jose Langilea parrokian, langile eguna dela-eta. Meza eguerdiko 12:00etan izango da.

LAB sindikatua
Bilboko ekitaldirako autobusak Hernanitik
LAB sindikatuak autobusak jarriko ditu Hernanitik larunbatean, maiatzaren batean, Bilbon izango den ekitaldira joateko. Autobusak goizeko 09:30etan aterako dira Atsegindegitik. Izena emateko: 943 336062.

Udalekuetan izena emateko azken eguna
Udaleko Euskara Zerbitzuak Udalekuak antolatu ditu, 3-10 eta 11-12 urte arteko umeentzat. 3-10 urte artekoentzat hilabeteko udalekuak dira eta 11-12 urtekoentzat 15 egunekoak. Matrikula 77,25 euro. Izen emateko azken egun gaur da Udal Euskara Zerbitzuan. 943 337029.

Astelehenean hasiko da Haur Eskolan izena epea
Maiatzaren 3an, astelehenean, hasiko da Udaleko haur eskolan izena emateko epea. Izena emateko azkeneko eguna maiatzaren 13a izango da. Horretarako Udaletxera joan behar da, 2garren solairuko Hezkuntza Sailera, goizeko 9:00etatik 13:00etara. Zozketa maiatzaren 18an egingo da.