Garoa
Gartziandia eta Ane Iturbe - ‘Sex-Drog’ Tailerra
“Gure asmoa da gazteek sexua eta drogen
inguruan dituzten kezkak eta galderak erantzutea”
Gazte Txokoan ostiralero bi orduz sexua eta drogei buruz hitz
egiten dute bertako gazteekin. 12-16 urte bitarteko gazteak dira eta
oso erantzun ona jaso dutela diote. “Gazteek hutsunea dute gai
hauei buruzko heziketan”.
Garoa
Gartziandia eta Ane Iturbe Gazte Txokoan ostiraletan egiten duten
‘Sex-Drog’ tailerreko arduradunak dira. Gazte Txokoko
hezitzaileak konturatu ziren gazteek hutsuneak zituztela sexua eta
drogaren inguruko heziketan eta Askagintzarekin harremanetan jarri
eta tailer hau antolatu zuten. Garoak eta Anek bi hilabete daramazkite,
ostiralero bi orduz, 12 eta 16 urte bitarteko gazteeki sexua eta drogaren
inguruko kezka eta zalantzetaz hitz egiten. Beraien asmoa da gazteek
gai hauen inguruan dituzten kezkak argitzea baina beraiek ere asko
ikasten ari direla diote.
Nola
sortu zen tailer hau egiteko idea?
Hernanin gazte talde bat noizean behin elkartzen ginen sexua eta drogei
buruz hitz egiteko. Bilera hauek Askagintzaren bidez antolatu genituen
eta beraien lokalean biltzen ginen. Bestetik, Gazte Txokoko hezitzaileak
konturatu ziren gazteek gai hauen inguruko heziketan hutsune bat zutela,
eta hutsune hori betetzeko asmoz tailer hau antolatzea erabaki genuen.
Zer zerbitzu ematen du ‘Sex-Drog’ tailerrak?
Beraiek sexua eta drogei buruz dituzten kezka eta dudak jaso eta gai
horiek landu egiten ditugu. Gure asmoa da beraiek informazio on bat
jasotzea sexua eta drogaren inguruan, askotan beraiek duten informazioa
faltsua edota mitoz betetakoa izaten baita.
Zein adineko gazteak dira tailerrean aritzen direnak?
Erantzuna oso ona izan da, uste baino askoz hobea. Hasieran beldurra
genuen, gai hauen inguruan gazteak askatzea oso zaila izaten baita.
Baina orain giro oso polita dago tailerrean eta hemengo hezitzaileek
ere esan digute giro ona ikusi dutela.
Zein paper betetzen dute gazteek tailer honetan?
Paper guztiz aktiboa dute gazteek. Gu tailerrera joaten gara beraien
nahiak asetzera. Beraiek gurekin ikasten ari diren bezala, gu ere
beraiekin ikasten ari gara. Denak batera gaude ikasten, ez gatoz txapa
bat botatzera.
Zein kezka mota dituzte adin honetako gazteek sexua eta drogen
inguruan?
Oraingoz sexualitatea gehiago landu dugu drogen gaia baino. Gazteenak,
12-14 urte bitartekoak, oso motibatuta daude, adibidez, ligatzeko
teknikei buruz egingo dugun saioarekin. Zaharragoek masturbazioari
buruz, lehenengo aldiaren minei buruz egiten dizkigute galderak. Drogei
buruz galdera gutxiago jaso ditugu. Gazteenek porroak eta tabakoari
buruz egin digute galderaren bat. Helduagoek egin dizkiguten galderak
izan dira: ia egia den tripiak begitik kontsumitu daitezkeen, poppersak...
Zer garrantzi du sexua eta drogaren inguruko informazio ona
edukitzeak?
Gero zure aktoetan kontziente izatea zertan ari zaren eta konturatzea
nahi baten ondorioak zeintzuk diren. Informazio ona edukitzea oso
garrantzitsua da baita ere mitoak eta beldurrak alde batera uzteko,
eta lasaiago ibiltzeko.
Gazteek gaur egun sexua eta drogen inguruan ze informazio
jasotzen dute?
Behin galdetu genien ikastolan zer ematen zuten gai hauen inguruan
eta ugalketa ematen zutela erantzun ziguten. Gurasoekin ere zertxobait
hitz egiten dute batzuk, baina, oso zaila egiten zaie beraiekin gai
hauei buruz hitz egitea.
Udalak
Portaletxokoko mugarria kendu du puskatu eta botea azaldu delako
Uste dute XVIII mende bukaeran jarritako mugarri kilometrikoa
izan litekeela eta dokumentazio ezberdina aztertzen ari dira mugarria
identifikatzeko.
Martxoaren
19an Portaletxokon (Udaletxe atzean) zegoen mugarria kendu egin zuten,
bezperan puskatu eta lurrera bota zutelako. Udala mugarria identifikatu
nahian dabil, dokumentazio desberdina aztertuz. Badirudi hau dela
XVIIIgarren mende bukaeran Gurutze Santuko umildegiaren ermita lekuz
aldatu zutenean, ireki zuten bideko mugarria; bide hau posta eta autoentzako
bidea zen. Pentsatzen da XVIIIgarren mendeko mugarria dela, baina,
lehenagokoa ere izan daiteke Udalak adierazi duenaren arabera. Udalak
informazioa biltzeaz gain konpondu egin nahi du mugarria eta asmoa
du, berriz ere, jatorrizko tokian jartzeko.
Txikizio gehiago
Udalak salatu du txikizio gehiago ere izan direla azken aldian herriko
zenbait lekutan. Herriko ondarearen parte diren gauzak azaldu dira
puskatuta salaketaren arabera: Portaletxokoko mugarria, Inglesaren
harria, elementu megalitikoak, eta herriko mobiliarioa.
Jubilatu
Etxeak 10 eguneko eskurtsioa antolatu du Santander eta Asturiasera,
maiatza-ekainean
Santander, Oviedo eta Gijon hiriak bisitatzeaz gainera, Covadonga,
Cangas, Picos de Europa eta beste zenbait paraje ikusteko aukera izango
da.
Goiz
Eguzki Jubilatu Etxeak 10 eguneko eskurtsioak antolatzen ditu udaberrian
eta udazkenean. Aurten, Santander eta Asturiaseko paraje ederrak ikusteko
aukera izango dute, maiatzak 25etik ekainaren 4ra bitartean. Lehendabiziko
bi egunetan Santander eta Oviedo ezagutuko dituzte gia baten argibideak
entzunez. Handik aurrera Asturiaseko bazterrak ezagutzeko aukera izango
dute: Mieres, Pola de Lena, Cangas, Picos de Europa, Ribadesella,
Gijon, Luarca, Covadonga eta Redeseko parke naturala, besteak beste.
Gauak Oviedon pasako dituzte.
Eskurtsioaren prezioa 400 euro da, autobusa, otorduak eta loa barruan
direla.
Sorteoa
apirilaren 14an
Jubilatu Etxeak adierazi du eskurtsiorako zozketa apirilaren 14an
izango dela, asteazkena, arratsaldeko 17:00etan, betiko lekuan.
Jasota
bezala
Garraio publikoa oinarrizko eskubidea da!
Igo
dute berriro ere, autobusean ondoko herrira joateko prezioa. Hernanitik
Donostira, Urnietara, Andoainera, Astigarragara... joatea garesti
ateratzen zaigu, oso garesti, egunero erabili ezkero eta bidaia bat
baino gehiago eginda, hilean 76 euro ordaindu behar izaten da.
Garraio publikoaren prezioak desproportzionalak dira, gutxieneko gizarte
soldatarekin alderatzen badugu; luxu bilakatzen ari da autobusa hartzea.
Garraio zerbitzuak eskuragarri izan behar du, eguneroko erabiltzaileentzat
bonobusa beharrezkoa da eta baliabide gutxiko pertsonentzako laguntzak
ere bai.
Azken igoera honekin, neurriak hartzeko garaia dela uste dugu eta
zerbitzu publikoek badute honetan zereginik.
Prezio eskuragarriak behar ditugu!
Zaloa
Ruiz
Elkartzen taldeko kidea