Errugbia - Ohorezko B mailara igotzeko fasea
Hernanik seguru eta ondo jokatuta irabazi zuen, eta datorren urtean Ohorezko B mailan izango da
Hernanik 21-0 irabazi zion atzo Xestur taldeari. Igoera faseko bi partiduak irabazi ditu Hernanik. Lehenengo entsaioa egiten kosta zitzaien gehiena hernaniarrei. Jende asko bildu zen atzo Landaren.

Ohorezko B mailan jokatuko du Hernanik datorren urtean. Atzo, 21-0 irabazi zuten igoera faseko bigarren partidua Galiziako Xestur taldearen kontra, eta Galizian ere hernaniarrek irabazi zutenez (11-27), hernaniarrak izango dira datorren urtean Ohorezko B mailan jokatuko dutenak.

Aurreneko zatia parekatua
Hernaniarrek 35garren minutuan lortu zituzten lehendabiziko puntuak, Gorka Sarasolaren entsaioari eskerrak. Aritz Mitxelenak transformazioa sartu egin zuen, eta hala joan ziren deskantsora. Bigarren zatiko 15garren minutuan Gurutz San Miguelek bigarren entsaioa egin zuen. Hortik aurrera galiziarrak etsi egin zuten eta hernaniarrak errez ibili ziren. Aritz Mitxelenak eta Iraitz Garmendiak zigor kolpe bana sartu zuten eta partidua bukatzera zijoala Xabier Pintadok drop bat lortu zuen.

Jendea gustora
Partidua ikustera aspaldiko herritar gehiena inguratu zen atzo Landarera, eta hori sumatu egin zen giroan. Bukaeran, jendeak txaloka hartu zituen bi taldeak eta jokalariek ere esker oneko txaloak jo zizkien Landaren bildutako jendetzari eta beste taldeko jokalariei.

Atzo jokatu zutenak: Illarramendi, Seco, Sarasola, A. Mitxelena, Insausti, Lamaison, Iker Apezetxea, Otaño, Garmendia, Iñaki Apezetxea, San Miguel, Agirresarobe, I. Mitxelena, Larrañaga, Pintado. Kanbioak: Olano, Azurmendi, Arruabarrena, Pernas, Casado, Aginagalde eta Paredes.

---

Jardunaldi Extremeñoak
Eguraldiak lagunduta jende asko bildu zen atzo Latsunben, Jardunaldi Extremeñoetan

Asteburu honetan ospatu dira, urtero bezala, Jardunaldi Extremeñoak. Extremadurako produktuak, dantzak, kultura, geografia... erakusgai izan dute antolatzaileek, eta jende asko inguratu da Latsunbera larunbat eta igandean, goiz edo arra-tsalde pasa egitera. Jenderik gehiena atzo inguratu zen Latsunbera, eguraldiak lagunduta, eta lan haundia egin behar izan zuten serbitzen eta informazioa ematen ari ziren antolatzaileek. Extremadurako dantzak urteroko ikuskizuna izaten dira eta atzo ere jende askoren harreta piztu zuten.

---

Pelota - Berria Txapelketako Finalak
Zazpiturri taldeak irabazi du Berria Pelota Txapelketa

Atzo jokatu ziren Hernanin, Berria txapelketako finalak. Amezketako Zazpiturri eta Bidegoian-Albizturko Aurrera Saiaz taldeak ziren finalistak eta amezketarrek irabazi zituzten jokatutako hiru partiduak. Aurten jokatu da lehendabiziko aldiz Berria txapelketa, Euskal Herriko pelota eskola onenak tartean zirela. Antolatzaileak gustora ziren atzo, finalak bukatu ostean.

 

Aste Santuetan
liburutegia itxita egongo da
Aste Santuak direla-eta, itxita egongo da liburutegia datorren ostegunetik asteartera arte, apirilaren 8tik 12ra.

Kiroldegian ordutegi berezia
Kiroldegian ordutegi berezia izango dute osteguna, ostirala eta astelehenean: irekita goizeko 09:00etatik 12:30ak arte egongo da kiroldegia (igandean ere bai normalean bezala). Larunbatean ordutegi normala izango du, 09:00etatik 12:30etara eta 16:00etatik 19:30etara.


Hitzaldia Andragoton gaur, ‘Sorkuntzarako Heziketa’
Andragoto Ateneoan hitzaldia emango dute gaur. Sorkuntzarako Heziketa izenburua du hitzaldiak eta gaiari buruz hitz egiteaz gain, gaia bera pintura, buztina eta dantzari aplikatzen saiatuko dira. Andragoto ateneoan, gaur arratsaldeko 18:00etan.


AHTren kontrako mendi irteera ostegunetik igandera
abiadura Handiko Trenaren Aurkako Asanbleak antolatuta, 4 eguneko mendi martxa egingo da ostegunetik igandera. Ostegunean, 12:00etan abiatuko da ibilaldia Ezkio-Itsasotik.


Odola emateko eguna bihar Anbulatorioan
bihar, apirilak 6, hileko lehenengo asteartea da eta ohi bezala, odol-emaileen elkarteak dei egin du odola ematera joateko. Hernaniko anbulatorioan, 18:30etatik 20:30etara.


Boleibola - Igoera fasea
Hernani 1 Dibisiotik gero eta gertuago
Mutilen Dibisio Autonomikoan, Hernanik asteburu honetako bi partiduak irabazi ditu eta Berezi Gasteizen kontra jokatu beharko du 1 Dibisiora igotzeko partidua. Hernanik larunbatean Universidad Riojari irabazi egin zion 2-3, eta atzo Berezi Gasteizi 3-2. Orain azken fasean atzoko aurkari beraren kontra neurtu beharko dituzte indarrak hernaniarrek.
Bestalde, emakumeen Dibisio Autonomikoan, Hernanik 3-1 galdu zuen atzo Universidad Navarra taldearen kontra.


Musa - Aralar taberna
Txapelketako partidak gaur eta bihar
Aralar tabernako mus txapelketa jokuan da, eta gaur eta bihar 8 partida jokatuko dira. Gaurko partidak: Joxe-Axier / Patxi A-Patxi B; Kolonbo-Txema / Katu-XX; Balantxa-Balantxa / Nico-Paste; eta Pablo-Josetxo / Haritz-Urko. Biharko partidak: Martin-Urtzi / Inaxio-Joseba; Jabier-Pello / Iñaki-Arribi; Imanol-Jesus / Xabier-Iñaki; eta Zulaika-Uria / Arkaitz-Pako.


Waterpoloa
Hernanik igoera promozioa jokatu lezake
Mutilen Euskal Ligan, Hernani A taldeak galdu egin du asteburu honetan 4-6 Menditxo taldearen kontra, baina, oraindik aukera haundiak dauzka igoera promozioa jokatzeko. Bi partidu jokatu behar dituzte hernaniarrek eta bietako bat irabaztea nahikoa dute promozioan sartzeko.
Bestalde, emakumeen Euskal Ligan Hernanik irabazi egin du Club Natacion Pamplona taldearen kontra, 7-6.


Bola - Erregularitate txapelketa
Miguel Burugain onena atzoko tiraldian
Miguel Burugain izan zen onena, atzo, 49 brila botata, Erregularitate txapelketako 10garren tiraldian. Miguel Arrospide eta Jose Mari Usabiaga izan ziren hurrengo hernaniarrak eta 6 eta 7 postuetan gelditu ziren 46na brila botata. Sailkapen Orokorrean Altzako Nikolas Osaba dago lehendabiziko postuan 452 brila botata eta Hernaniko onenak Burugain eta Antonio Miner dira (azken honek irabazi zuen orain bi asteko tiraldia Añorgan), eta 7 eta 8garren postuan daude. Datorren astean dute azken tiraldia Idiazabalen eta Sailkapen Orokorreko lehendabiziko 9 lagunak pasako dira Euskal Herriko txapelketara.


Saskibaloia
Hernanik 58-50 galdu, Zarautzen kontra
Hernaniko saskibaloi taldeak galdu egin zuen larunbatean Zarautzen kontrako partidua. Partidu gogorra izan zen eta bi taldeek ere berdintsu jokatu zuten bukaera arte. Azkenean 58-50 nagusitu ziren zarauztarrak.