Aste Santuko oporretan eguzki bila Kanarietara eta Mediterraneora joango dira hernaniar asko
Gaur hasi eta igandera arte izango dira oporraldi gehienak eta Pazko Astean izango dituzte beste batzuek. Hernanira ere jende asko etorriko da eta pentsio, hotel eta nekazal etxeetan leku gehiena erreserbatuta dago.

Aste Santuan oporrak izaten dituzte gehienek eta aukera aprobetxatuta asko etxetik ateratzen dira eta beste leku batera joaten dira deskantsu eta giro aldaketa bila. Hernaniar askok kanpora joateko aukera hau aprobetxatu dute eta turista askok Hernani ere aukeratzen dute Aste Santuko oporretako destino bezala.

Eguzki bila ahalik eta prezio hoberenean
Hernaniko bidai agentzietara jotzen dute herritar askok Aste Santuko oporrak antolatzeko asmotan eta bertako langileek Kronikari adierazitakoaren arabera, hernaniarrek Aste Santuko oporretarako bilatzen dutena da: ofertak eta eguzkia. Asmo horretan herritar gehienak Kanariak, Mediterraneoa, Landak, Kantabria, Andaluzia aukeratu dituzte eta urrutirago begiratzen jarrita, Egipto, Malta, Turkia eta Tunez. Madrileko atentatuari buruz galdetuta bidaia agentziek aipatzen dute kliente batzuek galdetu dutela seguritateari buruz eta jendea aurten Europara gutxiago joan dela ere aipatu dute bidai agentziek. Kasu gutxi batzutan bidaiak ere kantzelatu dituzte beldurragatik.
Oporraldiak bost egunetakoak izaten dira normalean: gaur hasi eta iganderarte. Beste batzuek, Pazko Astea aprobetxatu dute oporraldiak egiteko, astelehenetik igandera, sasoi horretan bidaiatzea orain baino merkeago ateratzen baita.

Hernanira kostaren bila
Hernanira ere jende asko etortzen da Aste Santutan, gehienak katalanak. Horietaz gain, Madriletik eta Nafarroatik ere etortzen dira. Hernaniko hotel, ostatu eta nekazal turismoetan Aste Santurako leku gehienak erreserbatuta dituzte eta hiru eta bost egun bitarteko egonaldiak egiten dituzte turistek. Etortzen diren gehienak bikoteak eta haurrak dituzten familiak izaten dira.
Turistak Hernanira etortzeko arrazoiak izaten dira Donostiatik eta kostatik gertu egotea eta prezioz kostaldea baino merkeagoa izatea. Horretaz gain, gastronomia eta lurralde berdea izatea ere gustoko dituzte turistek.
Chillida-Leku ere bisitatzen dute turista askok eta iaz Aste Santutan 6.000 bisita inguru izan zituen Eduardo Chillidaren museoak.

---

Mutilen boleibol taldea mailaz igotzeko bidean
Apirilaren 29tik maiatzaren 2ra bitartean jokatuko du azken fasea. Galizia, Castilla-Leon eta Asturiaseko 6 ekipo izango ditu aurkari, Gasteizko Berezirekin batera.

Asteburu gogorrak bere frutua eman dio EHU-Hernaniko mutilen boleibol taldeari eta Espainiako Lehen Mailara igotzeko azken fasea jokatuko du hilabete barru. Hernaniarrek ligila jokatu dute Euskal Ligako 4 onenekin eta bigarren gelditu dira Gasteizko Berezi taldearen atzetik, puntu berdinekin.
Hernani eta Berezirekin batean, Asturias, Castilla-Leon eta Galiziako beste 6 talde arituko dira Lehenengo mailarako borrokan. Fase horretan aurrena gelditzen dena igoko da. Partiduak apirilaren 29a eta maiatzaren 2a bitartean jokatuko dira, baina, non ez dago oraindik erabakita.

---

Jasota Bezala

ESAN BAINA EZ IZAN
3.EKITALDIA-XI.AGERRALDIA
Udaletxeko Batzar aretoa. Alkatea eta zinegotziak beren lekuetan daude, eta koroa osatzen duten lagunak alkatearen parean, bost metrotara, daude. Leiho bat irekita dago. Aretoan Kontxiren heriotzaren aurkako manifestazioaren oihuak entzuten dira. Kanpoan ekaitza egiten du.
-Alkatea (Ondoan duen morroiari).- Itxi leihoa!!!. Morroiak leihoa ixten du.
-Koroa.-Hitzetik ekintzara nola egiten duten/Lekukoak izatea etorri gara/ Presoak Euskal Herriratzearekin/ Beraiek ere konforme dira
-Alkatea.- (Korokoei zuzenduta) Ixo!!!.
-Alkatea.- Aurtengo aurrekontuak batzar honetan onartu behar ditugu.
-PPko zinegotzia.- Hitz egin dugunez, aurrekontuak onar ditzagun, zenbait aldaketa eskatu dugu.
-Alkatea.- Udaleko Web orritik eta paperetik euskal presoek Euskal Herriratzeko aldarrikapenak kendu ditugu. Baita parke publikoan jarri ziren ikurrak ere aldatu ditugu.
-PPko zinegotzia.- Ondo deritzot.
-Alkatea.- Baita herriko presoen argazkiak Udaletxetik kendu ditugu ere.
-PPko zinegotzia.-Oso ondo deritzot.
-Alkatea.- Aurtengo aurrekontuetan herriko presoen senideek laguntzarik ez dute izango.
-PPko zinegotzia.- Neurri horrekin guztiz ados gaude. Gainera aurrekontuak guk nahi genituen bezalakoak direla aitortzen dugu.
-PPko zinegotzia ( Bere buruari hitz eginez).- Hau pagotxa gurea, nahiz eta Udal honetan ez agindu, nahi duguna egiten dute. Halere susmoa dut borondatez egiten dutela eta presoen senideei laguntzeko gogo handirik ez dutela.
-Koroa.- Bildutakoek kemena dugu eta/Hemen ez dago laster arte
Borrokan jarraituko dugu/Herri hau askatu arte
-Alkatea (Burua makurturik).- Berorrek zerbait gehiago nahi al du?
-PPko zinegotziak (Burua tente duela).- Oraingoz ez, eskerrik asko.
-Alkatea (Bere aulkitik altxatuz).- Beraz Udal aurrekontuak onartuak geratzen dira. Batzarra amaitu da.
Alkatea eta zinegotziak Batzar aretoaren atzeko atetik ateratzen dira. Dietak eta bestelakoak kobratzen dituzte eta etxera joaten dira. Korokoak, berriz, ate nagusitik ateratzen dira, eta plazan Kontxiren heriotzaren aurka protestatzen ari diren euskal herritarrekin elkartzen dira. Kalean, ekaitzak jarraitzen du.

Josu Arrieta

Squash eta Tenis
txapelketak
Hernaniko Udal Kirol Patronatuak XI. Squash eta VIII. Tenis txapelketak antolatu ditu eta izena emateko epea zabalik dago. Izena kiroldegiko bazkideak direnek eta ez direnek eman dezakete eta epea apirilaren 21ean bukatzen da. Informazio gehiago behar duenak 943-552185 telefonora deitu dezake.

Elizkizunak gaur hiru parrokietan
Gaur Ostegun Santu eguna da eta arratsaldean elizkizunak egingo dira herriko hiru parrokietan. Ereñotzun 17:00etan da, Juan Bataiatzailean 19:00etan eta Floridan 20:00etan. Bihar Gurutzbidea izango da, goizeko 08:30etan.

Waterpoloa
Euskal Ligan Hernani 5garren
Waterpoloko Nesken taldea bosgarren dijoa Euskal Ligan, asteburuan Iruñako Igeriketa taldeari 7-6 irabazita. Hernaniarrak, ordea, partidu bat gutxiago jokatuta daude eta laugarren jarriko dira hori irabazi ezkero.
Partidu gogorra izan zen eta ez zen azken momentura arte erabaki. Hernaniarrak markagailuan 2-0 aurretik jarri ziren, baina, hirugarren denboran nafarrak 4-5 nagusitu ziren. Azken bi minututan, Yoli, Jugatx eta Ebaren golek eman zietoten Hernaniri garaipena. Aipatzekoa da Amaia Iraola atezaina azken partiduetan oso lan ona egiten ari dela.

‘The U.K. Slobs’
taldea gaur Kixkalen
Kontzertua dago gaur Kixkal tabernan, gaueko 22:00etan hasita. The U.K. Slobs bikote ingelesak emango du kontzertua eta beste taldeen bertsioak joko dituzte, beren gitarren laguntzarekin.

Jon Zabaletaren marrazkiak Andragoto ateneoan
Apirila bukaera arte egongo dira.
JON Zabaleta marrazkilari hernaniarraren erakusketa dago jarrita Andrato Ateneoan eta hilabete bukaera arte egongo da ikusteko aukera. Erakusketaren izenburua Manuel da, marrazkilari hernaniarraren bizitzan klabea izan den pertsonaren izena: “Manuel, erakusketako klabea da. Klabeak falta diren piezak izaten dira, bizitzari zentzua ematen diotenak” dio Jon Zabaletak.
Erakusketan azkeneko 5 urteetan egin dituen marrazkietako batzuk ikusi litezke. Erabiltzen duen teknika zuzenean paperean rotrinarekin marraztea da eta ondoren kolorea jartzen du tinta, ordenadore eta kollagearen bitartez, batik bat.

Betidanik marrazten
Zabaletak betidanik marraztu izan du, “bizitzako ezaren aurrean marraztea izan da irtenbidea” dio marrazkilari hernaniarrak. Urte asko daramazki marrazten eta Euskal kutsua zuten ekintza ugaritarako kartelak eta muralak egin izan zituen garai batean eta ondoren Koldo Azpiazuk Debako Arte Eskolara gonbidatu zuen 1971garren urtean. Han hasi zen ilustrazioak, komikiak, umore grafikoa eta grabatuak lantzen profesional mailan.
Franco hil zenean euskal argitalpen ugari hasi zen kaleratzen eta hauetarako ere marrazki ugari egin ditu Jon Zabaletak: Zeruko Argia, Anaitasuna, Hitz, Berriak aldizkaria, Garai, Egin, Euskaldunon Egunkaria, Ipurbeltz, beste hainbaten artean.
Aldizkarietaz gain liburuak ere ilustratu ditu Jon Zabaletak. Guztira 100 bat liburu, gehienak haurrentzako ipuinak.

Bigarren jardunaldia jokatu da Hernaniko pala txapelketan
Hernaniko pala txapelketa ari dira jokatzen kiroldegian eta asteburuan jokatu dira bigarren jardunaldiko partiduak. Guztira 12 bikote ari dira txapelketan eta bi taldetan daude banatuta. Talde bakoitzeko bikote guztiek elkarren kontra jokatu behar dute eta bi onenak pasako dira finalaurrekoetara. Orain, ez da partidurik izango bi asteburutan.