“Blokea
mantendu eta jende gaztea sartu da harrobitik; hori da arrakastaren
sekretua”
Ohorezko B mailan jokatzeko babesle bila hasiko da Kluba, denboraldi
honetan baino 36 mila euro gehiago beharko baitituzte. Oraingo blokea
mantendu eta errefuerzoren bat ekarri nahi dute datorren denboraldirako.
Hernaniko
errugbiko lehen taldeak Ohorezko B mailara igotzeko zailena lortu
du, postua zelaian irabaztea. Orain bulegoetako lana eta denboraldia
kategoria berrirako prestatzeko lana hasten dira eta guzti horren
berri eman digute Rafa Larretxeak, Joxe Elosegik eta Jon Iraolak,
igandeko zelebraziotako biharamun pixka batekin, baina, ilusioz gainezka.
Bost
urteko blokea
Aurtengo arrakasta nondik etorri den galdetuta nahiko garbi dauka
klubak: “Hernani 1999an igo zen lehen mailara eta orduan 21-22
urteko bataz bestekoa zuen taldeak. Orduko taldea mantendu egin da,
gutxi gora behera, eta harrobian talde onak izan ditugu eta jende
gaztea sartu da lehen taldera. Aurten 24-26 urteko bataz bestekoa
du taldeak eta orain bost urte egurra ematen ziguten taldeei gaina
hartu diegu”. Harrobiari garrantzia haundia eman izan dio beti
Hernanik, Klubeko arduradunek Kronikari esan diotenez: “Hernanin
jendea beti izan da eta azpitik katea beti izan da. Klub sendo bat
izateko eskola ezin da galdu”. Hala ere jende gehiago ere hartuko
lukete gazteen kategoriatan, zenbait ekipo ateratzeko justu xamar
ibili izan baitira.
Errefurzoak
Ohorezko B mailan ondo ibiltzeko, aurtengo taldea mantentzea da lehen
pausua, eta badirudi jarraitzeko prest daudela jokalariak. Horrez
gain errefuerzo batzuk ekarri nahi ditu Hernanik, baina, taldearen
filosofia aldatzeko asmorik ez du: alegia, jokalariak ez dituela ordainduko,
bidaiak eta gastuak salbu, noski. Bestalde, aurten ez dira asko jubeniletatik
goiko taldera igo litezkeenak eta bila hasi beharra daukate. Horrez
gain, Ohorezko B mailan egoteak eskatzen du bigarren talde bat, jubenil
talde bat, eta kadete talde bat izatea eta infantil eta alebinen taldea
ere badagoenez, 120 bat jokalari behar ditu Hernanik ondo ibiltzeko,
arduradunen hitzetan; eta hori izango da beste lana, jende gaztea
animatu araztea. Hala ere Hernani errugbi tradizio haundiko herria
da eta gutxi edo gehiago, jendea beti izan da taldeetan.
Babesle
bila
Datorren denboraldian Bartzelonako bi talde, Asturiasko beste bat,
Galiziako bestea, Santander, Durango, Ordizia edo Madrilgo talderen
bat eta Hernani izango dira ligako beren grupoan eta Hernanik bidaia
luzeak egin beharko ditu partiduak jokatzeko. Horrez gain, errefuerzoren
batzuk ekarri ezkero, bidaiak eta gastuak ordaindu beharko zaizkie.
Kronikari esandakoaren arabera aurtengo denboraldian baino 36 mila
euro gehiago (6 miloi pezeta) beharko ditu taldeak, eta diru hori
bildu ahal izateko babesle bila hastekotan dira. Ez dakite babesle
bat edo bat baino gehiago beharko dituzten.
Ohorezko
Mailan
Hernani bezalako herri baterako meritu galanta da Ohorezko B mailan
taldea izatea eta aurtengo lorpena haundia da. Hala ere gorago
ere ibili izan da Hernani: 1978tik 1985era Ohorezko mailan jokatu
baitzuen. Lau urtetan txapeldunorde gelditu zen, CAU, Arquitectura
eta Santboianaren atzetik.
Lehen taldeaz gain gazteek ere sari haundiak lortu dituzte eta
1996tik gaur arte urtero atera dute txapelaren bat. Aurten, jubenilak
Euskadiko Txapeldun dira eta Estatuko txapelketako final zortzirenak
jokatzen ari dira eta Kadete, infantil eta alebinak paper ona
ari dira egiten ligan. |
Joxe
Angel Aranburu bertsolaria Osiñaldeko finalean
Hilaren 17an kantatuko du, larunbatean, Gabirian. GR-4an Hernani
Orioren aurretik.
Astebete
barru Osiñalde Sariko final sonatua jokatuko da eta Joxe Angel
Aranburu hernaniarra han izango da. Osinalde Saria bertsolari gazteentzako
sariketa da. 18 bertsolarik kantatzen dute hiru saiotan banatuta eta
saioko aurreneko biak sartzen dira finalera. Aranbaru ez ezik, Hernaniko
bertso eskolako Agin Rezolak eta Izarne Zelaiak ere kantatu dute aurten
txapelketa horretan, baina, ez dira finalera iritsi.
GR-4
Bertso ruta
Hernani, Oiartzun, Orio eta Lasarteko bertsolariak taldeka jokatzen
ari diren GR-4 txapelketa ere aurrera dijoa. Hernanik hiruko sei talde
atera ditu eta lortu berri du txapelketako aurreneko garaipena, Orioren
kontra. Hernaniko taldean Iñaki Zelaia, Xabier Legarreta Arano
eta Joxe Angel Aranburu aritu ziren kantari, eta saio ederra eginda
nagusitu ziren Orion. Oraingoz, bat irabazi eta bat galdu dituzte
irauliotarrek.
Hurrengo saioa Hernanin bertan izango da apirilaren 17an, Zingi Zanga
tabernan, 23:00etan. Hernanitik Urdangarin, Zerain eta Minerrek kantatuko
dute Oiartzunen kontra. Saio aurretik afaria dago 21:00etan eta joateko
asmoa duenak 657 707409 telefonora deitu. Prezioa: 15 euro.
Atletismoa
Maddi
Iradik zilarrezko domina 60 metro hesietan
Maddi
Iradi C.D. Hernaniko atletismo saileko korrikalaria Gipuzkoako bigarren
gelditu da 60 m hesietan, Elgoibarren jokatutako probetan. Alebin
mailako probak ziren eta hernaniar gehiago ere izan ziren: Ana Herrero
pisuan 12garren gelditu zen eta Ane Villaverde altueran 9garren.
Anoetako miniestadioan, berriz, Kluben Gipuzkoako txapelketa jokatu
berri da, infantiletan, eta C.D. Hernani han izan zen neska eta mutilen
talde banarekin. Parte hartzeko sistemak kalte egin bazien ere lan
ona egin zuten. Proba luzeenetan hernaniarrak txapeldun gelditu ziren:
Mikel Von Wichmannek 500 m 1:20:62ko denboran korritu zituen; 1000
m-ko proban Joxeba Lizeagak 3:06:38 egin zuen eta Eider Aldabek, 3:14:19.
Azken hiru korrikalari hauek Gipuzkoako ranking-ean buru dira, bakoitza
bere mailan.
Altueran, Joxeba Lizeagak 1,49 mko listoia salta eta 2garren egin
zuen; 80 m hesietan Txomin Lizeagak eta Maitane Iruretagoienak 3garren
eta 4garren postua lortu zuten; 150 m-tan Manex Pagolak 4garren egin
zuen. Pisuan, Servando Rivas eta Laura Madina 5garren eta 6garren
geratu ziren, eta Esther Pérez 8garren geratu zen 80 mko karreran.
Luzeran, Estibaliz Lionek ere 8garren egin zuen. Orain Gipuzkoako
txapelketa indibidualak datoz eta hernaniarrek esperantza haundiak
dituzte.