Untitled Document

Bai bizkarreko hotzak kendu ere!

Azeria aurten ere indartsu atera da zulotik. Atzo izan zen San Joanetako aurreneko Azeri-Dantza eta sokan zijoaztenek bi ordu pasa behar izan zituzten urteroko buelta egin eta gehienak gustora uzten. Aste barrua izanagatik kalea jendez gainezka zegoen eta sokakoek ez zuten lan gutxi izan bidea zabaltzen ere.
Kardaberaz kalean barrena jaitsi eta Kale Nagusian gora igotzen da Azeri-Dantza eta plazan bukatu, maskuriak hankapean lehertuta. Atzo goizekoak ezbehar txiki bat ere izan zuen: sokan zijoan batek, Kardaberazen jende artean korrika zijoala pibote bat jo zuen belaunarekin, eta momentuan ondoezak eman zion eta anbulantzia ere etorri zen. Kolpe haundi eta mingarria bai, baina, horretan gelditu zen dena.
Azeri-Dantzak heldu eta gazteak biltzen ditu. Txistulariekin batean. Azeria joaten da, leku jakinetan dantza eginez. Sokan dijoaztenak hankak baino gehiago besoak dantzatuagatik, jendea beti inguruan izaten dute, berotu on bat hartzea ohorea baita. “Hau gozoagoa dek” esaten zuen urte askoan Azeri-Dantzaren bizkarrekoak hartuko lituzkenean egon den batek ere.

Bihar Azeri-Dantza mistoa
Atzoko pasaratik osatuta, gaur goizean Azeri-Dantzak gozatu ederra emango die 09:00etan kalera biltzen direnei. Bihar, igandea, Azeri-Dantza mistoa egingo da.

Preso eta errefuxiatuei omenaldia

Preso eta errefuxiatuek ehundaka hernaniarren omenaldi beroa jaso zuten San Joan egunean. Ekitaldiaren aurretik manifestazioa egin zen herrian barrena eta preso hernaniarren testigantzak izan ziren ekitaldiko elementu nagusia, preso eta errefuxiatuen eskubideen aldeko aldarrikapenarekin batera, noski. Gorka Loranen eskutitza, Gari Arruarteren hitzak zinta batean eta Pakito Lujanbioren bertsoak entzun ziren alabak kantatuta.
Angel Pikabea presoaren egoera larria ere azpimarratu zen osteguneko omenaldian. Pikabeak 40 egun beteko ditu gaur gose greban bere eskubideak eta dagokion kartzelara itzultzea eskatzeko, eta oso ahul dago, bisitarik ere hartu ezin duela. Protesta ekintzak ere iragarri zituzten. Dantzariak, bertsolariak eta koruak parte hartu zuten omenaldian, eta Hernaniko preso eta errefuxiatuen senideak tabladura igota bukatu zen ekitaldia.

Meza Elorrabin, 1978an hil zirenen oroimenez

Atzo 26 urte bete ziren 1978ko ekainaren 25ean Elorrabin zorigaitz hura gertatu zela, eta urtero bezala meza izan zen hildako sei pertsonen oroimenez. Egun hartan, San Joanetako estropadak ikusten ari zirela zubia erori eta sei lagunek bizia galdu zuten.