Ekaina eta uztaileko lehortea izan da ur
erreserba eta nekazaritzan gehien eragin duena
Ekaina hasieran Añarbe %90ean zegoen eta abuztu hasieran %79an. Euria abuztuan zehar egin du gehiena, guztira 161 mm euri jaso dira. Ekaina eta batez ere uztaileko lehortea gogorra izan da nekazarientzat.

Udarako hilabeteetako euririk eza arazo izaten da ur erreserba eta nekazaritza eta abeltzantza munduan aritzen direnentzat. Aurtengoan ez da iaz adinako lehorterik eta ur erreserbak lehenagotik ondo beteta zeudenez, ez da kezkatzeko motiborik izan. Nekazari eta abeltzainak izan dira ordea, udarako lehortea gehiena sofritu dutenak. Ekaina eta batez ere uztaileko euri eskasiak behar bezalako belarrik ez du ekarri, besteak beste.

Añarbe % 71ean
Añarbeko enbalseak duen kapazitatearen %71 inguruan dago momentu honetan. Iaz garai honetan %64,87an zegoen ur erreserba. Aurtengoan ez du iaz adinako lehorterik egin eta euria, uztaila eta abuztuan behintzat, iaz baino gehiago egin du. Aurten uztailean 55,1 mm (edo litro/m2) ur jaso dira hilabete osoan eta abuztuan, 161,8 mm.
Iaz pasa zen bezala udara iritsi aurreko hilabeteetan euri asko egin du eta ondorioz urtegia urez beteta harrapatu du udarak. Azkeneko 12 hilabeteetan 1.946 mm euri jaso dira Añarben. Iaz ere 12 hilabete horietan jaso zen ur kopurua oso antzekoa izan zen: 2.023 mm. Horrela aurten, ekaina hasierarako Añarbe bere kapazitatearen %90,02an zegoen (iaz sasoi berean % 90,24ean zegoen).
Uztaila eta abuztuan zehar Añarbeko urtegian zegoen ur kopuruak behera egin du. Horrela uztaila hasieran Añarbe %88,05ean zegoen eta abuztu hasieran %79,05ean.

Ekaina eta uztaila lehorrak
Ur erreserbetakoa baino larriagoa izan da nekazari eta abeltzainek lehortearen ondorioz bizi duten egoera. Euskal Herriko Nekazarien Elkarteko (EHNE) Eneko Dorronsorok adierazitakoaren arabera, aurten ekaina eta batez ere uztailean egindako lehortea asko somatu dute nekazari eta abeltzainek. Abuztu hasiera ere nahiko gogorra izan dela aipatu dio EHNEko ordezkariak Kronikari eta abuztu erdialdetik aurrera egin dituen euri zaparradek egoera zerbait hobetu dutela ere adierazi du.
Lehorteak ekarritako galerei begiratuta, jasotako belarraren kalitatea eta kopurua aipatu digu Dorronsorok: “udaberri euritsua izan da eta berandu hasi ginen belarra jasotzen eta udaran egin duen lehortearekin kalitate eskasa eta kopuruz justu ibili gera” dio.
Diputazioa eta baserritarrak mendiko ur sarea hobetzeko asmotan zebiltzan eta horri buruz EHNEko ordezkariak dio, berak dakiela ez dela ezer aurreratu.

---

Bi doneztebear,
faborito garbirik gabeko txapelaren bila
Berez Ezkurra da faborito, baina, bronkitisa pasa berri du eta Lizaso joko puntu onean iritsi da finalera. Gaur 17:00etan Galarretan (ETB1ean emango dute).

Koteto Ezkurra eta Iñaki Lizaso, erremonteko bi izarrak, neurtuko dituzte indarrak gaur buruz buruko final haundian, arratsaldeko 17:00etan, Galarreta pelotalekuan. Final estua eta gogorra espero da, Ezkurra faboritoak bronkitisa pasa berria baitu eta Lizaso joko puntu oso onean baitago.
Buruz buru hiru final jokatu dituzte orain artean Ezkurra eta Lizasok elkarren kontra: bi Ezkurrak irabazi ditu (1998 eta 2001ean) eta bat Lizasok (2000n).

Zazpi eta bat
Ezkurrak zazpi txapela lortu ditu buruz buru eta bi final besterik ez ditu galdu: Lizaso beraren kontra 2000 urtean eta Eizagirreren kontra iaz. Buruz buru jokatutako 19 partidu ofizialetatik 17 irabazi eta 2 besterik ez ditu galdu Doneztebeko aurrelariak. Erremonterako dohai guztiak ditu: sake eta erresto ona, defentsa ona aurrean, atakerako dohaia, erreboteatzeko abilezia eta hankarik azkarrenak. Eizagirreren faltan (lesionatuta ez baitu parte hartu) Lizaso du hala ere kontrario txarrena: sakea inork gutxik bezala dirijitzen baitu eta harritzeko moduko defentsa baitauka. Lizasok txapela bat du buruz buru, baina, iaz ere irabazi zion Ezkurrari Matxinen omenezko amistoso batean.

Sakearen garrantzia
Sakean egongo da partiduko kakoetako bat adituen arabera. Lizasok ondo sakatzen asmatzen badu egin diezaioke min Ezkurrari, baina, gainontzean badirudi jai duela. Material aukeraketan esandakoaren arabera bi pelotariak forma onean daude gaurko finalerako eta jokatzeko irrikiz.

Jaialdian lau partidu
Gaurko erremonte jaialdiko 2garren partidua izango da Casino Kursaal txapelketako finala, arratsaldeko 17:00ak aldean. Beste partiduak: Zalakain-Aizpurua II/Uterga-Olazar, Zeberio II-Badiola/Altuna I-Iriarte eta Juaristi-Agirresarobe/Aizpurua-Angel Lekunberri. Jaialdia arratsaldeko 16:00etan hasiko da. q

Bilera Osiñagan,
zerrategiari buruz
Osiñagako Auzo Elkarteak bilera deitu du iganderako. Bilerako gai nagusia zerrategia izango da: batetik, zerrategia auzotik kentzeko epaia betetzeko eman dituzten urratsen berri emango dute eta bestetik, Olazagirre S.A.k Udalean zerrategia legalizatzeko egin duen eskaeraren berri emango dute. Auzoko beste arazoetaz ere hitz egingo dute, baita irailean egingo duten bidaiari buruz ere. Bukatzeko urte bukaera arteko egutegia zehaztuko dute eta beste gairik proposatzeko aukera ere izango da. Bilera, bihar izango da, eguerdiko 12:00etan Arriatsuko eskolan.q
Chillida Lekuk irailean ordutegi berria
Chillida Lekuk irailean ordutegi berria izango du: goizeko 10:30etatik 15:00etara eta asteartean itxita egongo da. Museoko arduradunak pozik daude uztaila eta abuztuan ibilitako jende mugimenduarekin, guztira 27.542 pertsonak bisitatu baitute museoa. Musika Hamabostaldiko kontzertuetara guztira 1.000 pertsona joan dira.

 

Hika Teatroak ‘Groau’ obra estreinatuko du
HIka Teatroak Groau izeneko obra estreinatuko du Urnietako Sarobe aretoan. Hika Teatroa konpainian Niko Lizeaga hernaniarra eta Hernanin bizi den Mikel Laskurain aritzen dira. Groau obra katu baten istorioa da, miau egiten ez dakien katua da, katu beltza, indar gutxikoa eta zer den bilatzen ari dena. Groau obran aktore lanak egiten dituzte: Belen Cruz, Miren Gojenola eta Niko Lizeagak. Antzezlana eguerdiko 12:00etan da.