Hiru lapurreta egin zituzten atzo Hernanin, bi tabernetan eta harategi batean”
Lapurretak Etxeberrin, Orkolagan eta Lizeagan izan ziren eta dirua eraman zuten . Udaltzaingoaren ustez, hiru lapurretak talde beraren lana izan dira . Ertzaintzak ikerketa hasi du.

Atzo arratsean hiru lapurreta izan ziren Etxeberri, Lizeaga eta Orkolagan, bi taberna eta harategi batean. Denetan, kaja erregistradorak eta makina tragaperrak miatu dituzte, eta ez dute beste ezer ikutu. Oraingoz ez da argitu zenbat diru eraman ote duten.
Udaltzaingoak emandako informazioaren arabera, lapurrak ateak eta leihoak fortzatuta sartu ziren taberna barrura, eta harategian, berriz, bentilazioko goiko leihoa kenduta, 3 metro inguruko alturan. Udaltzaingoak uste du lapurretak pertsona bat baino gehiagoren lana izan direla, eta litekeena dela denak talde berak egin izana. Atzo arratsean auto bat ere ireki zuten Etxeberrin atea fortzatuta, eta hori ere talde horren lana izan litekeela adierazi du Udaltzaingoak.
Bestalde, Ertzaintza lapurretak izandako lekuak aztertzen aritu zen argibide bila, baina, oraindik ez du gertatu denari buruzko azalpenik eman.
Aspaldian ‘lasai’
Udaltzaingoak Kronikari adierazi dionez, azken hilabeteetan ez da Hernanin tankera horretako lapurretarik izan, ez establezimentuetan eta ezta etxe partikularretan ere.

---

Atletismoa
Joseba Lizeaga Euskadiko txapeldun eta Eider Aldabe hirugarren, Ortuellan

Joseba Lizeaga eta Eider Aldabe hernaniarrak Euskadiko txapeldun eta hirugarren gelditu dira, Ortuellan jokatu berri diren probetan. Joseba Lizeaga karrera osoan buruan joan zen eta azkenean alde egin eta bakarrik sartu zen helmugan. Eider Aldabek, berriz, sprint luze bati esker lortu zuen brontzezko domina. Taldeka, Langilek 4garren bukatu zuen. Eider eta Josebarekin batean, Mikel, Txomin eta Manex ere izan ziren Euskadiko txapelketan eta karrera polita egin zuten. Aurreneko biek Espainiako txapelketa jokatuko dute hilaren 21ean.

---

Bildu Hernanik eskatuko du Manu Azkarate presoaren inguruko mozioak gaurko plenoan eztabaidatzea
Positiboa iruditzen zaio plataformari Bozeramaile Batzordeak preso tolosarraren inguruan onartutako mozioa, baina, ez dute ulertzen zergatik ez den plenora eraman.

Bildu Hernani plataformak Manu Azkarate preso tolosarraren egoera salatzen duten mozioak gaurko plenoan eztabaidatzea eskatuko du. Lehengo asteleheneko Bozeramaileen Batzordean eztabaidatu ziren bi mozio, bata Bildu Hernanik aurkeztua eta bestea Gobernu Taldearena, eta Gobernu taldearena onartu zen. Bildu Hernaniri positiboa iruditzen zaio onartutako mozioaren edukia, baina, formekin ez dago ados bi arrazoirengatik:
1) Plataformak aurkeztutako mozio bat berak tartean ez direla eztabaidatzea ulertzen ez duelako.
2) Mozioaren helburua herria informatu eta sentsiblizatzea bada, logikoena plenoan eztabaidatzea delako.
Horregatik Manu Azkarateren egoera salatzen duten bi mozioak gaurko plenoan eztabaidatzeko eskatuko du eta dei egiten diote herritarrei plenora azaltzeko.

---

Babestutako etxeak egin eta hirigune historikoak berritzea, biak garrantzitsuak direla esan zuen Javier Madrazok
Hernaniko kaxkoa berritzeko obretan Jaurlaritzak 1.050.000 euro jarri dituela nabarmendu zuen . Alokabide programatik 72 etxebizitza alokairuan jartzeko asmoa du.

Javier Madrazo Etxebizitza eta Gai Sozialetako kontseilaria Hernanin izan zen atzo Alde Zaharra nola gelditu den ikusten, Joxan Rekondo Alkatea eta Txema Mercado eta Beatriz Fernandino zinegotziekin. Joxan Rekondok Udalak eta Jaurlaritzak etxebizitza gaian elkarlanean azken aldian egin dituzten proiektuak nabarmendu zituen: Alde zaharreko 2-3 faseak (Kardaberaz kalea eta Iturriaga kalea) eta Sagastiako babes ofizialeko 350 etxe egiteko proiektua, besteak beste. Madrazok berak nabarmendu zuen babes ofizialeko etxeak eta etxe sozialak eraikitzeko ahalegin berezia egiten ari direla. Bide horretan adierazi zuen, Sagastialdeko etxeak egiteko asmoa dagoela eta Antziolan 48 etxe eta Etxeberriko estazio ondoan beste 24 Alokabidek erosi eta alkilatzeko asmoa duela. Hirigune historiakoak berritzearen garrantzia ere nabarmendu zuen Madrazok, “degradazioagatik hiri-inguru horiek herritarren elkargune izateko funtzio historikoa galdu lezaketelako”.

 

 

 

 

2004ko Aurrekontuak
Plenora, gaur
Ezeren okerrik ez dela, 2004ko Aurrekontu proiektua gaur onartuko du Plenoak. Gobernuak aurkeztutako proposamenak aldaketa garrantzitsuak izan ditu, batez ere Etxebizitza gaian eta 400.000 euroko inbertsioa egitea proposatuko du, protekzioko etxeak egiteko lurra erosteko. Oposizioak eta IUk 30 zuzenketa inguru aurkeztu zituzten, eta gehienak jasota gelditu dira azken proposamenean. Bildu Hernanik Aurrekontuak berriz egitea eskatu zuen.
Aurrekontuaz gain, Plenoak beste 10 puntu ere aztertuko ditu gaurko saioan. Besteak beste: Ereñotzun etxeak egiteko lurra Iñatzu Kooperatibari ematea, Kutxan kontseilari eta korporazioko ordezkariak izendatzea, Berdindatusun Kontseiluaren araudia behin betiko onartzea eta Ordenantza Fiskalak aldatzeko proposamena. Plenoa arratsaldeko 18:00etan da.

Pelota
Hernani Azkoitiaren kontra, bihar Hernanik Azkoitiako Anaitasunaren kontra jokatuko ditu bihar partiduak, Elkarte arteko Berria txapelketan. Hernanik Bergarari irabazi zion aurreko txandan, baina, oraingoa kontrario gogorragoa izango du. Partidua gaueko 22:00etan jokatuko da, kiroldegiko frontoian.
Ostiralean ez ezik, larunbatean ere beste hiru partidu interesgarri ikusteko aukera izango da kiroldegian. Goizuetako Umore Ona taldeak eta Leitzako Aurrera jokatuko dute elkarren kontra, arratsaldeko 16:00etatik aurrera.

Kontzentrazioa gaur
Hirulaurden Plataformak hamabosteroko kontzentrazioa deitu du gaurko, kondenaren hiru laurdenak bete dituzten preso hernaniarrak libre uztea eskatzeko. Plaza Berrian, 19:00etan.

Elizatxo ikastola
Gotzon Garate idazlea Elizatxon.
Gotzon Garate idazle ezaguna Elizatxo ikastolan izan zen atzo, Goizuetako Ezkongaiak liburuari buruz ikasleekin hitz egin eta literatura egilearen eskutik ezagutzeko.

Udaltzaingoa
Pertsona bat kalean hilda aurkitu dute
M.I.M. 30 urteko pertsona hilda aurkitu zuen Udaltzaingoak astearte arratsaldeko 18:30ak aldera. Udaltzaingoaren arabera, M.I.M. Garzia Goldaraz kalean aurkitu zuten, eta ikerketa martxan dago heriotza zergatik eta nola izan zen argitzeko.

Zaharren egoitza
Pertsona bat hil da balkoitik erorita
Astearte goizean A.U.E 79 urteko pertsona hil zen Sandiusterri atzeko balkoitik erorita. Udaltzaingoa gertaturen testigu izan zen, herritar baten abisua jaso baitzuen. Udaltzaingoaren arabera, pertsona hori balkoi batetik bestera pasa nahian ari zela, irristatu eta erori egin zen, eta momentuan hil zen. Ertzaintza ere bertan izan zen eta gertakariak argitzeko ikerketa martxan da

Etxerat elkartea
Enkartelada bihar
Etxerat elkarteak enkartelada egingo du ostiral honetan Errepresaliatuak etxera lelopean. Enkartelada Gudarien plaza da, arratsaldeko 20:00etan eta Etxeratek herritar guztei dei egin die aldarrikapen horrekin bat egiteko.

Galdutakoak
Urrezko belarritako bat
galdu da
Pertsona batek urrezko belarritakoa galdu berri du Urbieta eta Plaza Berria inguruan. Ezeren berririk duenak: 943 552380.

Tur Lach musika talde irlandarra gaur Hernanin
Tur Lach Irlandako musika taldeak kontzertua emango du gaur Hernanin, Kixkal tabernan. Tur Lach-ek musika irlandarra egiten du eta lehendik ere kontzertua eman izan du Hernanin, eta baita giro ederra jarri ere. Kontzertua gaueko 22:00etan da.

Elkarrik 700 firmatik gora Hernanin,elkarrizketaren alde
Elkarriko Hernaniko tailerrak jakinarazi du larunbateko firma bilketarekin 700 firmatik gora bildu dituztela orain arte. Elkarriren helburua zen 100.000 firma biltzea eta guztira 114.000 firma bildu dituzte. Horregatik, eskerrak eman nahi dizkiete sinatzaileei eta laguntzaile guztiei.

Takolo, Pirritx eta Porrotx igandean Oilumen izango dira
Takolo, Pirritx eta Porrotx pailazoek ‘Poxpolin Marisorgin’ ikuskizun berria aurkeztuko dute igandean Oilumen eguerdiko 12:00etan. Poxpolin da ikuskizuneko protagonista eta sorgin bihurtu nahi du. Lan horretan lagunduko diote pailazoek eta haurrek.