Adin desberdinetan Euskera erabiltzea bultzatzeko proiektuak indartuko ditu Doberak 2004an
Haurrentzako, gazteentzako eta helduentzako proiektuak aurkeztu zituzten. Aurtengo beste helburuak dira elkartearen lana zabaltzea, herrian euskerazko kultur eskaintza haunditzea eta zerbitzuak indartzea.

Dobera Euskara Elkarteak atzo egin zuen urteko batzarra eta 2003ko balorazioa egin eta 2004ko egitasmoen berri eman zuten. Aurtengo egitasmoari dagokionez, adin eta sektore desberdinetako beharrei aurre egiteko proiektuak jarri ditu martxan Doberak eta euskera erabilera bultzatzen duten proiektu horiek indartzea da aurtengo helburua.

Haur, gazte eta helduentzat
Eskola umeentzako klasetik kanpoko orduak dinamizatzen dituzte hiru begiralek, umeek euskeraz egin dezaten, iaz Elizatxo eta Urumean eta aurten Elizatxo, Urumea eta Inmaculadan. Gaur egun 400 umek hartzen dute parte egitasmo honetan. Gazteentzako, berriz, komiki tailerra dago martxan eta astero ematen dituzte klaseak. Helduentzat, Gure Artean Euskaraz egitasmoa daramakite aurrera Doberak, AEKk eta Langile ikastolak, euskeraz hitz egin nahi duen jendeari inguru bat sortu eta erraztasunak emateko.

Kultur eskaintza
Dobera Euskara elkarteak ekitaldiak antolatzen ditu urtero herritarrentzako eta aurtengo emanaldiei lehengo astean eman zien hasiera, Euskal zinemagileen film laburren emanaldiarekin. Emanaldiak arrakasta haundia izan zuen eta bete egin zen Biteriko areto nagusia. Euskal antzerki amateur zikloa ere Hernanin egiteko asmoa du Doberak eta Kultur Errotako pare bat emanaldi ere izango dira Hernanin, 2004an. Bestalde, 2garren Dobera saria antolatuko du aurten Doberak eta martxo bukaeran kaleratuko dira oinarriak.

Zerbitzuak indartu
Doberak euskeraren inguruko zenbait zerbitzu eskaintzen ditu eta horiek indartu nahi ditu aurten. Informazioa nahi duen jende askok jotzen du Doberara eta zerbitzu hauek gero eta indar eta garrantzia haundiagoa ari dute hartzen.
1) Testuak itzultzeko zerbitzua mantenduko du iazko eskaera ikusita. Doberak testuak itzultzaileetara bideratzen ditu. Iaz eskaera bat baino gehiago izan zen eta ingurugiroari buruzko unidade didaktiko oso bat ere euskeratu zuten.
2) Inguruan dauden euskerazko ikastaroen berri ere ematen du eta ematen jarraituko du Doberak, gehien bat informazio eske pasatzen den jendeari.
3) Doberara iristen diren lan eskaintzak bideratu ohi ditu Doberak, gehienak Kronika bidez. Beste euskera elkarteek eta taldeek bidalitako eskaintzak bideratzen dira eta iaz jende interesatu askok deitu zuen Kronikan argitaratu zenean.
4) Euskeraren inguruko zerbitzu eta eskaintzen informazioa emango da (abizenak euskeratzeko, zuzenketa lanak egiteko, euskerazko produktuak euskeratzeko eta abar).

Hernaniko Kronika
Hernaniko Kronika Dobera Euskera Elkarteak argitaratzen du eta sendotzen jarraitzea izango da aurrerako helburua ere. Aurtengo lehen erronkari heldu dio Doberak: Kronika astean 7 egunetan argitaratzeari eta etorkizunean baditu beste helburu batzuk: bi orriko Kronikak argitaratzea, koloreak sartzea, diseinua berritzea, interneteko bertsioa indartzea eta abar.
Egitasmo zabala aurkeztu zuen atzo Doberak Hernanin euskeraren normalizazioan eragiten duten proiektuak indartu eta berriak sortzeko.

Dobera sariaren 2-garren edizioa Doberak, berriro, beka bat aterako du Hernanirekin zerikusia duen euskerazko lan bati emateko. Aurreko edizioak ikerlanak behar zuten sariketara aurkezten zirenak, baina, baldintza hori aldatu egin da eta orain edozein lan izan liteke saritua. Orain bi urte izan zen Dobera sariaren lehen edizioa eta Urko Apaolazari eman zitzaion beka errepublika garaitik trantsiziorako Hernaniko historiaren parte bat aztertzeko. Emaitza Aldaba Joka liburua izan da.

---

Ezker Abertzaleak mobilizazioak deitu ditu biharko eta etzirako

Ezker Abertaleak mobilizazioak deitu ditu biharko, hauteskunde egunerako, eta astelehenerako. Bihar, eguerdiko 12:00etan manifestazioa aterako da plazatik Apartheid ez, Euskal Herria aitortu eta errespetatu lemarekin. Astelehenean, aldiz, kontzentrazioa egingo dute bi astetik behin antolatu dituzten mobilizazioen barruan, eta lema izango da: espainiar inposaketari ez, frantziar mespretsuari ez, Euskal Herria aitortu eta errespetatu, 20:00etan plazan.

Boto kontatzea bihar
Bihar iluntzean, 20:30ak aldera, Garinen botu kontaketa egingo dute. Hauteskundeetarako botuak nahi dituztenentzat eskura izango dituzte Garin tabernan edota web orri honetan: www.orain.info.

---

Iturritxo auzo elkarteak Latsunbe-Antziola biala, tiro kanpoa eta elkartearen egoera hizpide asanblada orokorrean
Bizilagunei dei egiten diete auzo elkartean inplikatzeko eta parte hartzeko.

LATSUNBE Berri eta Marieluts auzoetako Iturritxo auzo elkarteak urteko batzarra izan du eta bertan auzoarekin zer ikusia duten hainbat puntu hitz egin zituzten bizilagunen artean:
1) Santa Barbarako tiro kanpoarekin dituzten arazoaz aritu ziren batetik. Kirol Patronatua, Txantxangorri elkartea, federazioa eta auzo elkartea akordio batera iritsi ziren tiro kanpoa hilabetean bitan erabiliko zela esaten zuena eta auzo elkarteak dionez urtarriletik aurrera igandero somatzen dira tiroak. Patronatuarekin harremanetan jartzea erabaki dute egoera soluzionatzeko.
2) Latsunbe eta Antziola auzoak lotuko dituen bial berriaren berri eman zuten bizilagunen artean eta Ertzaintzaren aurrean doazean aparkamentuak nola geratuko diren ere aipatu zuten.
3) Latsunbeko farmaziaren parean jarriko duten semaforoa ere aipatu zuten, Latsunbetik kotxeak ateratzen lagunduko duena, auzo elkarteko kideen hitzetan.
4) Auzo elkartearen egoera ere izan zuten hizpide eta aipatu zuten elkarteak bazkide gutxi dituela. Horregatik, bizilagunak animatu nahi dituzte auzo elkartean inplikatzera eta aktibitateak organizatzera animatzera, beti jende bera aritzen baita lanean.

Pelota
Manzisidor-Martinezek finalerako txartela dute jokoan gaur
Goiatz Manzisidor eta Amaia Martinezek finalaurreko bueltako partidua jokatuko dute gaur Intxaurrondoko Etxegia eta Montesen kontra. Lehen partidua lehengo igandean jokatu zuten Hernanin eta hernaniarrek irabazi zuten 30-28. Gaur irabazi ezkero eta 29 tanto egin finalean izango dira hernaniarrak, baina, ez daukate erronka xamurra. Intxaurrondokoa pelotaleku txikia da eta airezko joko eta abilezia haundia behar dira nagusitu ahal izateko. Gaur 17:00etan Intxaurrondon.


Ur ludoteka bihar
Ur jolasak izango dira bihar kiroldegiko igerilekuan, 10:00etatik 11:30etara. Umeentzat jokuak egongo dira eta monitoreak berekin jolas egin nahi dutenentzat. Bestalde, igerilekua 11:30ak arte egongo da irekita jendearentzat, 12:00etan waterpolo partidua baitago.


Takolo, Pirritx eta Porrotx bihar Oialume dantzalekuan
Takolo, Pirritx eta Porrotx pailazoak Oialume dantzalekuan izango dira, datorren igandean, eguerdiko 12:00etan. Poxpolin Marisorgin ikuskizuna egingo dute bertan eta hiru pailazoek Hernaniko ume eta ez hain ume guztiak gonbidatu dituzte biharko eguerdi pasa beraiekin egitera.


Gaizkiñe taldearen kontzertua igandean Goiz Argi tabernan
GAIZKIÑE taldeak kontzertua emango du bihar Goiz Argi tabernan. Kontzertua arratsaldeko 20:30etan hasiko da.

Errugbia
Hernanik entrenamentu gisa hartuko du gaurko partidua
Hernanik Aieten jokatuko du gaur Riojaren kontra, ligako azken partidua. Ez dute ezer jokatzen bi taldeek eta entrenamentu gisa eta probak egiteko balioko dio Hernaniri gaurko partiduak. Datorren asteburuan hasiko du igoera fasea Hernanik Crat Xestur Coruñaren kontra. Gaur, 16:30etan Aieten.

Futbola
Gorengoak Zubipen jokatuko du
Zubipen jokatuko du berriz ere Gorengo taldeak bihar, igandea, 17:00etan Touringen kontra. Beheko postuetan dabiltzan bi talde dira Hernani eta Touring eta gaur irabazteak pauso haundia eman araziko lioke Hernaniri, mailari eusteko borrokan. Hernani 19garren dijoa 28 punturekin eta 3 puntura du Touring, 16garren.
Emakumezkoen Kopa gaur hasiko da. Emakumezkoen kopa hasiko da gaur eta Hernanik Usurbilen jokatuko du gaur 16:00etan. Iaz ondo ibili zen Hernani txapelketa honetan eta aurten ere liga hasi baino askoz hobeto bukatu du eta txanpa hori aprobetxatu behar du kopan.

Saskibaloia
Hernani mailaz igotzeko puntu bila
Lehengo asteburuan partidu zaila irabazita moralez gainezka joango dira gaur Hernaniko jokalariak Donostiara Loyolaren kontra jokatzera. Loyolak ez du partidurik irabazi oraindik igoera fasean eta Hernanik ahaleginak eta bi egingo ditu horrelaxe segi dezaten. Gaur 12:00etan Donostian.

Waterpoloa
Hernani-Easo gaur
Nesken taldeak Easoren kontra jokatuko du gaur, 20:30etan, Donostian ligako partidua. Hernaniko taldeak goraka dijoa pixkanaka eta irabazteko esperantzaz joango dira Donostira. Hernaniko mutilen taldeak ere asteburuan jokatuko du eta partidu oso garrantzitsua du bihar Hernanin, Askartzaren kontra. Igoera fasea jokatzen ari da Hernanin eta lehengo astean galduta ezin du irrista askoz gehiagorik egin Hernaniko taldeak. Bihar 12:00etan kiroldegiko Igerilekuan. Bigarren taldeak 13:00etan jokatuko du konsolazio fasea.

Boleibola
Hernani-Rioja gaur
Igoera fasea jokatzen ari da Hernaniko mutilen taldea eta lehengo astean Sestaon galduta irabazi beharra daukate gaur Riojaren kontra Hernanin. Gaur 17:30etan kiroldegian. Nesken taldeak ligako partidua du bihar, 11:00etan kiroldegian, Galdakaoren kontra.

Hauteskundeak
Antziolako hauteskunde eskolakoak Laubidietan
Antziolako lehengo eskola zaharrean egon izan da hauteskunde eskola orain arte (14. sekzioa). Udalak jakinarazi duenez, igandeko hauteskundeetan Langile ikastolako Laubidietako eraikinean eman behar dute botoa orain arte Antziolan botatu izan dutenek.