Alai Zubimendi-Doberako komiki tailerreko arduraduna
“Komiki bat egiteko batez ere irudimena behar da, istorio bati bere grazia eta trama atera behar zaio”
Alai Zubimendi, Dobera Euskara Elkarteak antolatzen duen komiki tailerreko arduraduna da. Datorren asteartetik aurrera, hamabost egunean behin, Kronikan tailerreko komikiak argitaratuko dira.

Alai Zubimendi marrazkilari eta komikilaria da Doberak urrian martxan jarri zuen komiki tailerreko arduraduna. Arte Ederretan lizentziatua da Zubimendi eta argitaletxeetarako marrazkiak egitea du ofizioa: Zubia eta Elhuyar argitaletxeentzat eta beste hainbat argitalpenetarako egin ditu ilustrazioak. Datorren asteartetik aurrera Kronikan argitaratuko diren komikiak lantzen hasi dira tailerrean eta horren haritik komiki sormenari eta tailerrari buruz galde egin diogu komikilari hernaniarrari.

Ze asmorekin sortu zen komiki tailerra?
Toki bat edukitzea, jende ezberdinak bere komikiak lantzeko, bakoitza bere estiloan. Bestetik, laguntza bat edukitzea beste partaideen artetik, batek zerbait ondo kontrolatzen ez badu besteen laguntza edukitzea. Baita ere, espazio bat edukitzea komikiei buruz hitz egiteko eta irakurtzeko. Komikien munduan bakoitzak gustokoa duenarekin lan egiteko espazio bat da azken finean.
Zer da tailerrean landu duzuena?
Hasiera batean komikigintzaren prozesu guztia azaltzen saiatu naiz. Hasi ginen gidoiei buruz hitz egiten, testu eta irudietan banatu behar dela azalduz. Pertsonaiak diseinatzeko moduak ere landu genituen eta teknika ezberdinak ere bai: arkatza, tinta, kolorea eta ezezagunagoak diren beste teknika batzuk.
Zertan ari zarete orain?
Hasieran nik proposatzen nituen ariketak egiten genituen, jendeari beraiei gustatzen zitzaizkien gauzak egiten hastea kostatzen zitzaion eta. Baina, nere helburua zen bakoitzak bere ideak edukitzea eta lantzea. Orain jendea martxan jarri da eta bakoitza bere komikiak lantzen ari da.
Zeintzuk dira komikiak egiteko landu behar diren oinarrizko gaitasunak?
Batez ere irudimena, nik uste. Konplikatuena izaten da istorio edo gertaera batek bere trama eta bere grazia izatea. Marrazkia bigarren planoko zerbait da, komiki askotan ikusi daiteke marrazkiak ez direla oso landuak eta istorioa dela indarra ematen diona. Beste komiki batzuetan ordea, indar gehiena jartzen dute marrazketan. Marrazki oso narratiboak izaten dira. Marrazten jakite horrek laguntzen dizu bururatu zaizun ideia hori esplikatzen.
Komiki zalea izanda ba al dago kalitatezko komikirik irakurtzeko aukerarik?
Bai badago. Internetek gainera asko erraztu ditu gauzak eta dagoen aukera oso haundia da. Denda espezializatuak ere badaude eta han denetatik aurki daiteke: japonesa, amerikarra, europearra eta bertakoa ere bai.
Eta euskerazko eskaintza?
Fanzine alternatiboetan eta ikusi daiteke zeozer. Komiki itzulpenak gutxi egiten dira, Asterix eta oso ezagunak diren batzuk kenduta, ez dago aukera haundirik. Bestetik marrazkilari euskaldunek askotan argitaletxe katalanetan argitaratzen dituzte komikiak eta erderaz egiten dute. Egunkarietan euskarazko tirak ere ateratzen dira.

---

Hauteskundeak
15.455 hernaniar daude gaur botoa ematera deituta, Espainiako Korteetako ordezkariak aukeratzeko

25 hauteskunde mahai egongo dira, goizeko 09:00etatik iluntzeko 20:00ak arte. Antziolan botatu izan dutenek Laubidietan eman behar dute botoa.

1978an Espainiako Konstituzioa onartu ezkeroz 8garren hauteskunde orokorrak egingo dira gaur, Madrileko atentatuen itzalean. Hernanin 15.455 pertsonek dute botoa emateko eskubidea. Hego Euskal Herrian 2.300.000 lagun daude gaurko zitara deituta eta Estatu osoan, berriz, 34.570.000.
Hernanin 25 hauteskunde mahai jarri dira eta goizeko 09:00etatik iluntzeko 20:00ak arte egongo dira zabalik. Aldaketa nagusia Antziolako eskola zaharrean botoa ematen zutenek dute. Oraingoan Antziolan ez, baizik eta Langile Ikastolako Laubidietako eraikinean botatuko dute.
Gaurko hauteskundeetan 350 Diputatu eta 208 Senatore aukeratuko dira, eta Kongresu berriak izendatuko du Jose Maria Aznarren ordezkoa datozen 4 urteetarako Espainiako Presidente kargurako.

---

Futbola
Hernani-Touring gaur Zubipen, zulotik atera ezinean dabiltzan biren arteko borroka

Hernanik azken hurrengo izaten ez segitzeko aukera du gaur etxean. Zuriberdeek Touring-en kontram du eta zulotik ihesi dabiltzan biren arteko borroka izango da. Errenteriarrak 16garren dijoaz hernaniarrak baino hiru puntu gehiagorekin. Hernanik aurreko asteburuan irabazi egin zuen Zestoaren kontra, baino, gaur ere irabazten ez badu gauzak lehenaz gainera asko konplikatzeko arriskua dauka. Partidua 17:00etan da.

 

Takolo, Pirritx eta Porrotx pailazoak gaur
TAkolo, Pirritx eta Porrotx pailazoak ikuskizuna emango dute gaur Oialume dantzalekuan. Emanaldia 12:00etan da eta Poxpolin Marisorgin ikuskizuna emango dute. Hiru pailazoek Hernaniko ume eta gainerako guztiak gonbidatu dituzte.

Pelota
Azkoitiari irabazi, eta sei onenetan da Hernani
Hernanik nahiko errez irabazi zion ostiralean Azkoitiko Anaitasuna taldeari, Elkarte arteko Berria pelota txapelketan. Hiru partiduetatik tanto gehiena egiten duena da irabazlea, eta kadeeteek erdi erabakita utzi zuten neurketa 22-8 irabazita. Jubenilek ere 22-17 irabazi zuten. Nagusiek nahikoa zuten 4 tanto egitea eta 14 egin zituzten. Hernanik ostiralean jokatuko du txapelketaren azken faseko partidua Baztan edo Mallabiaren kontra.


Manifestazioa gaur Ezker Abertzaleak deituta
Ezker Abertzaleak manifestazioa egingo du gaur Apartheid ez, Euskal Herria aitortu eta errespetatu lemarekin. Ekitaldia 12:00etan izango da eta Gudarien plazatik aterako da. Bihar, astelehena, kontzentrazioa egingo du 20:00etan, bi astez behin deitzen duten mobilizazioen barruan.

Ur ludoteka gaur
Ur jolasak izango dira gaur kiroldegiko igerilekuan, 10:00etatik 11:30etara. Umeentzat jokuak egongo dira eta monitoreak berekin jolas egin nahi dutenentzat. Bestalde, igerilekua 11:30ak arte egongo da irekita jendearentzat, 12:00etan waterpolo partidua baitago.

Gipuzkoako Elkarte filatelikoa
Seilu eta sobre erakusketa ostegunetik aurrera
Seilu eta sobre erakusketa egongo da Biterin martxoaren 17tik apirilaren 3ra, arratsaldeko 18:00etatik 21:00etara. Erakusketan Agustin Kardaberazen mataseilo bat edukiko duten eta nahi duen jendeari mataseilatuko zaizkio karta azalak. Erakusketan gai erlijiosoa duten karta eta seiloak egongo dira gehiena eta Hernani eta Iruni buruzko postalak ere egongo dira, 1900 urtetik 1930 urtera bitartekoak.

Zergak
Datorren osteguna kotxearen biñeta ordaintzeko azken eguna
Udalak jakitera eman du Trakzio Mekanikodun Ibilgailuen Zirkulazioari buruzko zerga (biñeta) ordaintzeko azken eguna martxoaren 18a dela, datorren osteguna. Helbideratuta dauden erreziboak azken egunean kobratuko ditu Udalak eta helbideratu gabe daudenek, etxean erreziborik jaso ez badute, Udaletxeko bilketa bulegotik pasa behar dute kopia bat jasotzera (1 solairuan eskubian). Ordainketa Kutxa, Euskadiko Kutxa, BBVA, La Caixa, Banco Guipuzkoano eta Santander Central Hispanon egin liteken.

Boleibola
Hernani-Galdakao gaur
Emakumeen boleibol taldeak gaur eguerdian jokatuko du ligako partidua Hernanin. Hernaniarrek Galdakaoko ekipoa izango dute aurrez-aurre eta 11:00etan hasiko da partidua.

Waterpoloa
Bi partidu gaur etxean
Mutilen bi taldeak partiduak jokatuko dituzte gaur eguerdian Hernanin. Hernani Ak Askartzaren kontra jokatuko du 12:00etan igoera faseko partidua. Hernani Bk berriz, Barakaldoren kontra jokatuko du, 13:00etan.

Jasota Bezala
Jon Azpiazuri
Juan Urruzola Lujanbio.