Tolarea
Sagardo Kofradiaren IX Kapitulua igandean
Patxi Apezetxea, Josune Bereziartu eta Fermin
Muguruza, aurtengo Ohorezko kofradeen artean
Horiekin batera, Tolareak Ohorezko kofrade izendatuko ditu Jose
Angel Gaztañaga, Maria Jesus Fombellida, eta Diario Vascoko Kirol
Antolatzaileak ere. Ekitaldia Biterin izango da, eguerdiko 12:30etan.
Tolareak,
Gipuzkoako Sagardo Naturalaren Kofradiak, igande honetan egingo du IXgarren
Kapitulua. Tolarea 1996garren urtean sortu zen, Berriak elkarteko kideak
eta herriko sagardoaren inguruko hainbat pertsona elkartuta eta ordutik
urteroko ohitura bihurtu dute kapitulua ospatzeko ekitaldia. Tolarea
Kofradiako kideen hitzetan festa honen helburua da sagardoa eta herria
bultzatzeko festa antolatzea, sagarra eta sagardoak bere nortasuna eta
sustraiak galdu ez ditzan.
Ospakizun haundia izaten da eta jende asko biltzen da Hernanira egun
horretan, bai kofradietako kideak eta baita sagardozaleak ere. Guztira
25 bat kofradia bilduko dira igandean Hernanin, Euskal Herriko, Espainiako
eta Frantziakoak.
Ohorezko
Kofradeak
Ekitaldian ohitura izaten da Ohorezko Kofradeak izendatzea eta Tolareak
aurten izendatu dituen Ohorezko Kofradeak dira: Patxi Apezetxea, Hernaniko
Txistulari Bandako zuzendaria; Jose Angel Gaztañaga, sagardogileen
lehendakaria; Maria Jesus Fombellida, errestauratzailea; Diario Vasco
kirol antolakuntza; Josune Bereziartu, eskalatzailea eta Fermin Muguruza,
musikaria.
Tolareak pertsonai ezagunak izendatu izan ditu Ohorezko Kofrade aurreko
kapituluetan, eta horien artean daude: Ane Igartiburu; Arzak eta Berasategi
sukaldariak; Zamora, Errealeko jokalaria; Tolosa, pelotaria; Yolanda
Alzola, Andoni Aizpuru, eta beste hainbat.
TOLAREAREN
IX. KAPITULUA- EGITARAUA
Martxoak 21, igandea.
09:15etan: Txistulari Banda kalez kale.
10:30etan: Kofradia eta gonbidatuei harrera txalapartarekin Gudarien
Plazan.
10:45etan: Hamaiketakoa Txalaparta Elkartean.
12:00etan: Ohorezko Kofradeen eta Kofradien desfilea Txistulari
Bandarekin.
12:30etan: Biteri Kultur Etxearen atarian Ohorezko Aurreskua dantzatuko
da, eta Areto nagusian, IX. Kapitulua eta Ohorezko Kofradeen tronuratzea
ospatuko da. Ondoren Ozenki Abesbatzaren, emanaldia izango da.
14:30etan: Bazkaria Larre Gain Sagardotegian. |
Lan
Sailak 800 orduko sukaldaritza ikastaroa
antolatu du langabetuentzat
Ikastaro teorikoa eta praktikoa izango da eta bukatzean ikasleek
sukaldaritza enpresetan praktikak egiteko aukera izango dute. Apirilean
hasi eta azarora arte da eta INEMen eman behar da izena, Lasarten.
Udaletxeko
Lan Sailak 800 orduko sukaldaritza ikastaroa antolatu du Transpakarren,
langabetuentzat. Ikastaro teoriko-praktikoa da eta helburua da kalitatezko
jakiak modu errentagarrian egiten ikastea.
Jaki asko prestatzen ikasteko aukera emango du: barazki, arrain, haragi,
ehiza, pasta, arroza, gozogintza, izozkiak, zerealak eta abar. Bertakoa
ez ezik kanpoko sukaldaritzaren berri ere erakutsiko dute. Ikastaroa
apirilaren 13an hasiko da eta azaroa bitartean izango da, goizeko 09:00etatik
arratsaldeko 15:30ak arte.
Ikastaroa egiteko INEMen eman behar da izena eta INEMeko txartela eguneratuta
eduki behar da.
Kontxi
Sanchiz-en Heriotza
Kontxi
Sanchizi atzo eman zioten azken agurra eta familiak ertzaintzaren kontrako
salaketa jarri du
Prentsaurrean argazkiak erakutsi zituzten atzo, ertzainak Sanchiz
hil aurretik kargatu zuela probatzeko. Familiak ertzaintzaren kontrako
salaketa jarri du “laguntza ukatu eta hilketa bat sortzeagatik”.
Prentsaurrekoa
izan zen atzo Hernanin, Kontxi Sanchizen heriotzaren gaineko datuak
eta probak azaldu eta ertzaintzaren bertsioa ezeztatzeko. Manuel Fraile
Bildu Hernaniko kideak igandeko liskarreko argazkiak erakutsi zituen,
eta bertan ertzaintza kargatzen ikusten da. Fraileren hitzetan prentsako
argazkiak dira eta 12:58 orduan atereak daudela jartzen du argazkian
bertan. Ertzaintzak dio 13:21etan izan zela karga eta Fraileren hitzetan
proba honek argi erakusten du gezurretan ari direla. Frailek esan zuen
ertzaintzak ez ziola laguntzarik eman Sanchizi, alabak eskatu arren
eta ondorenean kontuak eskatzera joandakoan ertzain buruak adierazi
zuela “eskuetatik ihes” egin ziela egoerak.
Frailek Udalaren jarrera ere salatu zuen. “Alkateak giroa baretu
nahi badu, prentsa bidez gauzak azaldu beharrean gutxienez familiarengana
hurbildu behar zuen” esan zuen Frailek. Nabarmendu zuen Bildu
Hernanik mozio bat aurkeztu duela Udaletxean urgentziaz tratatzeko,
eta erantzunik ez dutela izan oraindik.
Ertzaintzaren
kontrako salaketa
Ainhoa Balgeto abokatuak prentsaurrean esan zuen salaketa bat sartu
duela Sanchizen alabak ertzaintzaren kontra. Salaketan kontatzen du
ertzaintzaren kargatik babesteko sartu zirela portalean eta Kontxi Sanchiz
gaizkitu zela. Koinata anbulantzia bila atera omen zen eta alaba ertzaintzari
laguntza eskatzera, eta erantzun bakarra “bost axola” izan
zela. Abokatuak esan zuen anbulantzia etortzerako ertzaintza jabetu
zela gertatutakoaz eta alde egin zuela. Salaketa jarriko diote ertzaintzari
laguntza ukatzeagatik eta “ertzaintzak berak sortu duen hilketa
baten aurrean erantzukizuna izan dezakeela” uste dutelako. Prentsaurrean
igandeko gertakarietako testiguek ere hitz egin zuten familiaren bertsioa
baieztatzeko eta beraiek ikusia kontatzeko.
Ertzaintzak
13:21etan kargatu zuela dio
Ertzaintzaren informazio zerbitzuak dio inbestigatzen aritu direla eta
Kontxi Sanchiz ertzaintzak kargatu aurretik gaizkitu zela. Ertzaintzak
dio “beste gezur haundi baten aurrean” gaudela eta ezker
abertzaleak lehenbailehen rektifikatu beharko lukeela esandakoa.
Mobilizazioak
eta azken agurra
Atzo mobilizazioak zeuden deituta egun osoan zehar eta jende asko bildu
zen Hernanin puntu desberdinetan egindako lanuzte eta kontzentrazioetan.
Arratsaldeko omenaldian eta manifestazioak ere jendetsuak izan ziren.
Bestalde, ehorzketa eta hileta elizkizunak izan ziren atzo eta jende
asko bildu zen Sanchizi azken agurra ematera.