Zine Kluba, Sagardo Kofradiren festa eta Antzerki Zikloa martxoko kultur ekintzen barruan
Haurrentzako antzerkia, seilu erakusketa, kontzertuak eta ipuin kontatzea ere izango dira n Martxoaren 17 artean argazki erakusketa dago Biterin, Ekuadorko amazonian petroleroek egindako txikizioa azaltzen duena.

Martxoko kultur egitaraua atera du Hernaniko Udaleko kultura batzordeak eta Zine Kluba, Tolarea Sagardo Kofradiaren festa eta Antzerki Zikloa dira ekitaldi nagusiak. Horiez gain badaude Txistulari Bandaren kontzertua, Medicus Mundiren argazki erakusketa eta seilu erakusketa Biterin eta Lur Kortaren ipui kontakizuna.

Erakusketa
Martxoaren 17 arte Yana Curi Paradisu zauritua argazki erakusketa dago Biterin, arratsaldeko 18:00etatik, 20:00etara. Ekuadorko Amazonasen petroleo enpresek 1972 ezkero egindako txikizioa azaltzen dute argazkiek, bai naturan eta bai bertako jendean. Ur pozoinduak, minbizia eta sarraskiak eragindako gaitzak nabarmen ikusten dira argazkietan, eta egoeraren aurrean herriak emandako erantzuna ere agertzen du Medicus Mundik antolatutako erakusketak. Martxoaren 17tik apirilaren 3ra berriz seilu erakusketa izango da Biterin, Gipuzkoako elkarte filatelikoak antolatuta.

Martxoko egitaraua Martxoak 4-11-18, osteguna: Zine kluba. pelikulak: Las invasiones barbaras, La deliciosa Marta eta Ser y tener. Iluntzeko 22:00etan, Biterin. Martxoak 6, larunbata: Haurrentzako antzerkia. Jim altxor uhartean, goizeko 11:00etan, Biterin. Martxoak 7, igandea: Txistulari Bandaren kontzertua. Eguerdiko 13:00etan, Milagrosa. Martxoak 17-Apirilak 3: Seilu erakusketa. Biterin, astelehenetik ostiralera, 18:00etatik 20:00etara. Martxoak 21: Tolarea Sagardo Kofradiaren festa. Martxoak 23-26: Antzerki Zikloa. 23an, Globalización; 24an, Euskara sencilloaren manifestoa; 25ean, Victor Bechv; eta 26an, Ixa. Biterin, arratsaldeko 20:00etan. Martxoak 29: Lur Korta ipui kontatzen. Biterin, 17:30etan 3-4 urte artekoentzat; eta 18:00etan 5-7 urte artekoentzat.

---

Teresa Flores: “Ipuin kontalariak entzuleak bezain ondo pasa behar du”
Liburutegiak antolatuta ipuinak kontatzeko ikastaroa izan zen pasa den astean

Ostegunean hasi eta larunbata bitartean ipuinak kontatzen ikasteko kurtsoa izan zen eta Granadatik etorritako Teresa Flores izan zen irakaslea. Teresa Flores MCEPeko, (Movimiento Cooperativo de Escuela Popular) ordezkaria izan da bai Espainia eta bai nazioartean. Kurtsoak alde teorikoa eta praktikoa izan zuen, batetik ikasleek ipuinak entzun zituzten eta bestetik ipuinak kontatzeko teknikak ikasi zituzten. Teresa Floresek munduan zehar ipuinak kontatzeko baliabide eta teknika ezberdinak erabili ditu eta horiek lantzen aritu dira klasean: hondarrarekin ipuinak kontatu, jostailuzko telebista batekin ipuinak kontatu, soka eta paperarekin ipuinak kontatu, besteak beste.
Bigarren urtea da Teresa Floresek kurtso hau ematen duela eta arrakastatsua izaten da, aurten 32 pertsona apuntatu baitira eta batzuk lehengo urtean aritutakoak dira.

---

Aralar-Zutik koalizioak larunbatean kartelak jartzen ari zirela izandako liskarra salatu du

Koalizioak dio 3 gazte oihuka eta kartelak kentzen inguratu zitzaizkiela eta gauzak oso gaizki bukatzeko arriskua izan zutela.Aralar-Zutiken ustez ez dira jarrera esponteneoak.

Hernaniko Aralar-Zutikek salatu du joan den larunbatean 3 gazterekin liskarra izan zutela, kalean hauteskunde kanpainako kartelak jartzen ari zirela. Koalizioak bidalitako prentsa oharrak dio 3 mutil gazte ohiuka, kartelak kentzen eta bero bero azaldu zirela eta “kristorena armatu zutela” eta gauzak oso gaizki bukatzeko arriskuan jarri zirela. Aralar-Zutikek esaten du horrelako jarrerak salatu beharra daudela ez direlako “ekintza espontaneo eta marginalak soilik”.

“Ez dago onartzerik”
“Nork, zergatik eta zertarako bultzatu eta berotzen ditu horrelako jarrerak -edo larriagoak” galdetzen du koalizioak eta ez herritarren eta ez justiziaren mesederako ez direla esaten du. “Aniztasuna ukatzea eta Euskal Herriko jabeak sentitzea” leporatzen die Aralar-Zutikek eta nahi den guztia esan eta egitea. “Eskubide batzuk exigitu eta beste asko zanpatzea. Hori ez dago onartzerik. Eskuindarrek ala ezkertiarrek egin” dio prentsa oharrean, eta horrela ez dela denon “askatasunaren hazirik ereiten”. Aralar-Zutikek kanpainako leloarekin aurrera jarraituko duela dio Euskal Herria Ezkerretik.

Gobernu Batzarrak dio Udal informatika eskaintza
ez dela murriztu, zabaldu egin dela
Otsailaren 21ean Kronikan azaldutako gutunari erantzunez, prentsa oharra atera du Udal Gobernu Batzarrak. Gutunak zioen Udal informatika zerbitzua erdira jaitsi dela eta ixteko asmoa daukala Udalak. Gobernu Batzarrak dioenez azken aldiko erabakiekin Udal informatika zerbitzua ez da murriztu, zabaldu baizik. “KZ gunea ireki da Biterin bertan, liburutegian egin diren hobekuntzak kontuan harturik, eta Informatika Aretoaren antolaketa berria gaineratuta, ezin esan liteke informatika eskaintza gutxitu egin dela Hernanin” dio Gobernu Batzarrak.

41 konputagailu
Lehen 19 ordenagailu zeuden tokian orain 41 ordenagailuko zerbitzua dagoela dio Gobernu Batzarrak. “ Liburutegian ofimatika eta interneteko aukera iriki da. Informatika aretoan, lehen bezala, ofimatika, diseinua eta internet erabili daitezke. KZ gunean, berriz, internet” dio prentsa oharrak eta lehen astean 65 orduko eskaintza zena 86 ordukoa dela orain. “Ondorioz, informatikako udal baliabideak gehiago dira eta astean sei egunez, goiz eta arratsaldez erabil daitezke, informatikako Udal zerbitzuaren etorkizuna, beraz, ziurtaturik dago” dio prentsa oharrak.

Aralar-Zutik koalizioak hitzaldia antolatu du ostegunerako
Datorren ostegunean, martxoak 4, hitzaldia antolatu du Aralar-Zutik koalizioak Sandiusterrin, 19:30etan. Joxe Elizondo Niko eta Ernesto Merino Zutik eta Aralarko kideek hitz egingo dute, hauteskunde koalizioaren nondik norakoiei, helburuei eta aurkezteko arrazoiei buruz. Koalizioak ezaugarriak, ikuspuntua eta jarduerak azalduko ditu “egungo Euskal Herriarekiko, zein estatua eta munduarekiko” eta bere apustua “Euskal ezker baten aldekoa, anitza eta irekia” dela dio. Aralar-Zutikek hernaniar guztiak gonbidatu ditu hitzaldira.


Espeleologia ikastaroa
Felix Ugarte Espeleologia elkarteak oinarrizko espeleologia ikastaroa antolatu du apirilaren 17-18rako. Ikastaro teoriko eta praktikoa izango da. Espeleologia seguru egiteko teknikez gain, kobazulo batean barrena ibili, kare harrizko inguruen berezitasuna gertutik ezagutu, eta leize batera jeisteko aukera ere izango dute apuntatzen direnek. Felix Ugarte elkarteak Etxeberrin du egoitza, 9garren zenbakian behean, eta bertan eman behar da izena.

Film laburrak bihar
Bost film labur botako dituzte bihar Biteri kultur etxean, arratsaldeko 19:30etan, Dobera Euskara Elkarteak antolatuta. 2003an arrakasta izan duten euskerazko bost film dira: Basurdea, Belarra, Dortokaren uhartea, Terminal eta Topeka. Hitzaldi bukaeran Topeka pelikulako zuzendariak, Asier Altunak, hitzaldia emango du eta jendearen galderei erantzungo die. Bost film hauek Euskal Herriko 22 herrietan dituzte botatzekoak, Topagunea Euskara Elkarteen federazioaren eskutik. Hernanin izango da lehenengo emanaldia. Debalde da.

Pelota
Xabier Legarreta eta Gorka Ezeiza dijoaz Kronika Esku Pelota Txapelketan aurrena, partidurik galdu gabe
Kronika Eskupelota txapelketa aurrera dijoa eta iazko irabazleak dijoaz aurrena orain artekoan. Legarreta eta Ezeizak jokatutako 6 partiduak irabazi dituzte. Hurrena Zelaia eta Urdangarin dijoaz 6 partidu jokatu eta 5 irabazita eta 3garren Urabayen eta Villar dijoaz 4 partidutatik 2 irabazita.

Bigarren buelta
Datorren larunbatean hasiko da bigarren buelta. Partiduak dira: Etxabe-Gurrutxaga/Legarreta Ezeiza; Gartzia-Kijera/Urabayen-Villar; eta Zelaia-Urdangarin/Miner-Mitxelena. Tilosetan dira partidak, 16:00etan hasita.
Lehenengo bueltako partidu batzuk jokatzeko daude. Bigarren bueltako partida horiek doble balioko dute eta horrela jokatu beharrik ez dago falta diren partidu horiek.

Eusko Jaurlaritza
Madrazoren bisita bertan behera
Javier Madrazo Etxebizitza eta Gizarte Gaietako Kontseilariak bertan behera utzi zuen atzo Hernanira egitekoa zuen bisita, elurra zela eta. Hondatutako lekuak berritzeko programan sartuta dauden inguruak ikustera zen etortzekoa Hernanira Ezker Batuako koordinatzaile nagusia.

Gobernu Batzarra
Hirigintzako puntuak gaur gobernura
Gaur arratsaldean Gobernu Batzarra bilduko da eta 10 puntu izango ditu gai ordenean, gehienak aurreko asteko Hirigintzan aurrera atera zirenak. Besteak beste: Remy-Harineran jatetxea jartzeko eskaera, Eziagon bi enpresa berri jartzeko eskaera eta Oraune Promozioak Udalari zenbait lokal uztea Puigen. Gobernu Batzarra arratsaldeko 17:30etan izango da.