Udal Aurrekontuak - Ezker Batuaren zuzenketak
Udalak 400.000 euro inbertituko ditu 2004an protekzioko etxeak egiteko lurra erosten
Erabakia Ezker Batuak Gobernuaren proposamenari egindako zuzenketa batetik etorri da. EBk etxebizitzak alkilatzeko programa bat jarri nahi du martxan Hernanin.

Ezker Batuak EA-EAJrekin paktatu du 2004an Udalak 400.000 mila euro inbertituko dituela Babes Ofizialeko etxeak egiteko lurrak erosten. Ezker Batua Udal Gobernuan dago EA-EAJrekin batera, baina, hala ere bera izan da 2004ko Aurrekontu proposamenari zuzenketa gehiena aurkeztu dizkiona. Zuzenketarik garrantzitsuena lurra erosteko 456.000 euro inbertitzea izan da, eta 456.000 izango ez badira ere, 400.000 izango dira, garai bateko 666 miloi pezeta. Txema Mercadok Kronikari adierazi dionez, diru hori bi lekutatik aterako da: aurtengo aurrekontutik 150 mila euro eta beste 250 mila euro azken urteetan lurra erosteko jarri eta gastatu gabeko partidetatik. Proiektu hori aurrera eramateko Eusko Jaurlaritzako Etxebizitza Sailarekin hitzarmena sinatuko da. Ostiralean egin zen Aurrekontuak onartzeko Hazienda Batzordea eta proposamenak aurrera egin du. Ezker batuak zuzenketak aurkeztu zituen Udalean eta Txema Mercadok Kronikari esan dionez, batzuk Udal aurrekontuetan sartzea lortu dute, beste zenbait puntu atzera bota dira aurrekontuak kontenplatzen zituelako edo oraindik zehaztu ezin direlako eta beste batzuetako partidak negoziatu eta erdi bide bat onartu da.

Ebakuazio planak
Ezker Batuak Gobernuko beste kideekin hitzartu duen beste puntuetako bat da ebakuzio planak egitea Biteri, Musika Eskola eta Udal Euskaltegian eta horretarako 30.000 euro inbertituko dituzte.
Etxebizitzei inguruko beste bi proiektu
Txema Mercado eta Beatriz Fernandino ordezkari dituen Udal Taldeak etxebizitzaren inguruko beste bi helburu ere baditu. Ezker Batuak Etxebizitzak alkilatzeko programa martxan jarri nahi du eta horretarako etxe hutsei buruzko azterketaren bigarren fasea egitea proposatzen du herrian zer behar dagoen jakiteko. Gobernu Taldeak hitzartu du zerbitzua martxan jartzean presupuestatzea gastuak, oraindik aurreikusi ezin direnez.

Beste zenbait eskari
Etxebizitza ez ezik Kultura, Hezkuntza eta Nazioarteko kooperazioa ere Ezker Batuak zuzentzen ditu eta hor ere zenbait zuzenketa aurkeztu dizkio 2004rako Aurrekontu proposamenari eta Udal aurrekontuan lekua izatea hitzartu dute. Multikulturalitatearen alde 1.500 euro gehiago ematea hitzartu dute eta Gazte Txokorako eta kooperaziorako diru partida haunditzea ere bai, Kontsumitzaile bulegoari kanpainak egiteko partidak ematea eta herriko ikastetxeen aldeko kanpainak egitea.

Etxeak alkilatzeko programa EB/IUk etxebizitzak alkilatzeko programa martxan jarri nahi du eta etxe hutsei buruzko azterketaren bigarren fasea egitea proposatzen du herrian zer behar dagoen jakiteko. Zerbitzua martxan jartzean presupuestatuko da. Ezker Batua “Ezker Batuak aurkeztutako zuzenketetatik lortu da 237.200 euro gehiago sartzea Udal Aurrekontuetan etxebizitza, gai sozial, hezkuntza, kultura eta formazio eta enpleguan, eta 250.000 euro gehiago mugitzea”

---

‘Epeleko poxpolinak’ bigarren urtez bildu dira Irubiden

Epeleko emakumezkoak elkarren arteko bazkaria egiten hasi ziren iaz eta aurten ere elkartu dira Irubide jatetxean, Epelen bertan. Beren burua Epeleko poxpolinak izenarekin bataiatu dute eta iaz helduenak elkartu baziren ere aurten adin guztietakoak elkartu dira; baita oso gazteren bat ere. Primerako giroa izan zuten larunbatean eta bazkaria dantzan bukatu zuten.

---

 

Jasota Bezala -Gutunak Torturari stop! Atxiloketa bortitza. Buruan tiro egiteko mehatxua. Lehen kolpeak. Esku burdinak estuturik. Hotza. Beldurra. Izua. Kolpeak berriz ere, kolpeak buruan, besoetan, zangoetan, barrabiletan. Zentzu gabeko galdeketak. Irainak. Ezinegona. Ziegaren hezetasuna gorputzean sarturik. Beste kolpe sesioa, kolpeak lepoan, sorbaldan, bizkarrean, ostikoak oinetan. Urduritasuna. Gorputz osoa dardarka. Elektrodoak jarriko zizkidatenaren mehatxua. Dardarak biderkaturik. Ikara. Denbora nozioa guztiz galduta. Amets gaiztoa bukatzen ez zenaren sentsazioa. Umilazioak. Postura nekagarrietan egotera beharturik. Lorik egin gabe. Jan gabe. Ahultasun fisiko ikaragarria. Deklarazio faltsuak sinatzera derrigorturik. Lur jota. Berriro ere galdeketa, berriro ere kolpeak. Ez naiz lehena izan, eta zoritxarrez, ez naiz azkena izango. Milaka euskaldun izan dira deskribatu ezinezko egoera honen testigu zuzenak. Milaka euskaldun polizia ezberdinen tortura basatia pairatu dutenak. Amorrua sentitzen dut beraien burua abertzaletzat duten batzuk gai honekiko hartzen duten jarrera lotsagarria ikustean. Bai, PNV eta EAz ari naiz. Mezu politak zabaldu bai, baina praktika basati hau desagertzeko borondaterik azaltzen ez dutenak. Abertzaleen arteko frontetik urrun, Estatu espainiarreko torturatzaile faxistei behin eta berriz elkarlanerako keinuak egiten dizkietenak. Eta larriagoa dena oraindik, tortura hori praktikan jartzen dituztenen gidari direnak (Ertzaintzaren kasuan). Bada garaia, indarrak bilduz, torturari esku frenoa jartzeko. Bada garaia, behingoagatik, Estatu torturatzaileei beraien menpe bizitzeko prest ez gaudela esateko. Martxoaren 14ean aukera paregabea dugu. Esan dezagun EZ ESPAINIARI, EZ TORTURARI, EZ INPOSAKETARI. Eman diezaiogun baietza AUTODETERMINAZIOARI, EUSKAL HERRIARI. Nere bozka behitzat hautes-ontzian egongo da! Animo!! (Sorterritik 540 kilometrora) Gorka Loran Lafourcade Valdemoroko espetxea

 

 

Errugbia
22-31 irabazi zuen atzo Hernanik Gernikan
Partidu gogorra jokatu zuten atzo Hernanik eta Gernikak eta hernaniarrek 22-31 menperatu zituzten etxekoak. Hernaniarrak erraz joan ziren markagailuan aurretik, baina, bukaeran 3 ensaio egin zituzten gernikarrek eta asko urreratu ziren. Arbitroak 8 bat txartel hori atera zituen eta bukaerarako eskuetatik alde ere egin zion pixka bat partiduak. Hernanik datorren asteburuan jokatuko du seguruenera ligako atzeratutako partidua, Riojaren kontra eta martxoaren 21-22ko asteburuan hasiko du igoera fasea, gaur bertan zozketan egokitzen zaion taldearen kontra. Baliteke Landare jokatzeko moduan egotea igoera faserako.

Boleibola
Bi taldeek galdu
Hernaniko lehen bi taldeek izan dute partidua asteburuan eta biek ere galdu egin dute. Mutilen taldeak igoera faseko partidua zuen Sestaon eta 3-2 galdu dute. Jokoak:25-19, 21-25, 18-25, 25-18 eta 15-10. Nesken taldeak Getxon jokatu du eta 3-0 galdu dute. Jokoak: 25-7, 25-8, 25-14.

Xakea
Hernanik ezin Elgoibarren kontra
Hernani Ak Elgoibarren kontra jokatu zuen atzo Hernanin eta 1,5-2,5 galdu zuten etxekoek. Emaitza honekin zail jarri zaio mailaz igotzea Hernaniri, Elgoibarrek aurrea hartu baitio, eta esperantzak mantentzeko datorren asteburuan irabazi egin beharko diote Debari. Ez da jardunaldi erraza izango, Deba lider baitijoa Fomento Crekin batean.
Bestalde, Hernani Bk ere galdu egin zuen 1,5-2,5 eta hortzak estutu beharko ditu Gipuzkoako 3garren mailara ez jaisteko.

Aralar tabernan eta Peña Otaño elkartean mus txapelketetarako izen ematea zabalik dago
Martxoaren 15ean bukatzen da izen ematea Aralar tabernan, gaur zortzi.
Aurten da Aralar tabernako mus txapelketako 20garren edizioa eta izen ematea zabali dago dagoneko. Izena tabernan bertan eman behar da eta bikoteko 40 euro ordaindu behar dira. Izen emateko epea gaur zortzi bukatuko da, martxoaren 15ean.

Lau bikote saritu
Sariak ez dira nolanahikoak aurtengo edizioan ere:
1) 1.800 euro eta txapela, trofeoa eta oparia.
2) 1.000 euro eta trofeoa eta oparia.
3) 500 euro eta trofeoa eta oparia.
4) 300 euro eta trofeoa eta oparia.
8garren bikoterarte Riojara egingo dute bidaiara gonbidatuak izango dira.

Peña Otañoko txapelketa
Peña Otañoko mus txapelketa ere laster dira jokatzen hastekoak eta izen ematea zabalik dago elkartean bertan.

Asteazkenean Gotzon Garate idazlea izango da Elizatxon
Gotzon Garate idazlea joango da etzi, asteazkena, Elizatxo ikastetxera, Goizuetako ezkongaiak nobelari buruzko hitzaldia ematera. Garatek azalpenak eman eta ikasleen dudak argituko ditu.
Hitzaldia liburutegian izango da 3 eta 4 mailako ikasleentzat, goizeko 11:30etan.