Marisol
Yaben - Argazkilaria
“Argazkilaritzari buruz dakitena besteei
transmititzea da nere pasiorik haundiena”
Argazkiak ateratzen bere kabuz hasi zen, baina dakien gehiena Gipuzkoako
Soziedade Fotografikoan, GSfan, ikasi zuen. Lau urte daramazki Biteriko
argazki klaseak ematen eta GSFko direktibako kidea da.
Marisol
Yaben argazkiak ateratzen bere kabuz hasi zen duela 25 bat urte Londresera
joan zenean. Etorri zenean Gipuzkoako Soziedade Fotografikoan sartu
zen buru-belarri, eta berak esandakoaren arabera, han ikasi du dakien
gehiena. Orain, bertako direktibako kidea da eta interesa duen duen
mundu guztiari laguntzen diola esaten du. Lau urte daramazki Biteri
kultur etxean argazkilaritza klaseak ematen eta datorren astean bukatzen
da matrikula egiteko epea. Argazkilaritzan sakontzeko ikastaroa da eta
horri buruz hitz egin digu, besteak beste.
Zer
da Biteriko ikastaroan ikasten dena?
Bi kurso daude, hasierakoa hemendik gutxira bukatuko da. Eta orain matrikulatzeko
aukera dagoen hori argazkilaritzan sakontzeko kursoa da. Hasierakoan
ikasten da kamara ulertzen eta kamaratik atera dezakeguna konprenditzen.
Nahiko teorikoa da baina beharrezkoa da, izan ere sakontze ikastaroarekin
jarraitu ezkero han ikasten dena praktikan jartzen da eta ikusten da
teoria guzti hori asimilatu egiten dela. Sakontzeko ikastaro honetan
erretratoak ondo ateratzen ikasiko dugu, paisajeei argazkiak ateratzen,
gauetan argazkiak ateratzen, eta abar.
Zein asmorekin matrikulatzen da jendea ikastaro horietan?
Ikastaro hasieran test bat egiten degu eta denek berdina diote: argazki
onak atera nahi dituztela. Argazkiak ez borroso ateratzea eta argazkiak
ez erretzea da bilatzen dutena. Baina kamarak zer eman dezakeen ezagutzen
ez dutenez, ez dira konturatzen zenbat gauza egin ditzaketen.
Nola ikasi zenuen zuk argazkiak ateratzen?
32 urte nituela Londresera joan nintzen eta bertan geratu nintzen 4
urtez. Denbora librea nuenez argazkilaritzan hasi nintzen, asko gustatzen
zitzaidan-eta. Argazkilaritzari buruzko aldizkariak irakurtzen nituen
eta han ikusitakoa praktikan jartzen saiatzen nintzen. Handik bueltatu
eta Gipuzkoako Soziedade Fotografikoan sartu nintzen eta han zegoen
jendeari eskatu nion nerekin zorrotzak izateko. Han ikasi det orain
dakiten gehiena.
Zer egin behar da argazki onak ateratzeko?
Lehenengo teknika menperatu behar da. Baina argazkiak ateratzera ezin
zera teknizismoekin joan, azken finean argazkilaritza artea da-eta.
Paisaje baten aurrean adibidez, egin daitekeena da paisajeari begira
denbora luzean egon eta ondoren paisaje horrek zerbait esaten dizunean
argazkia atera. Besteek egindako argazkiak kopiatzen ere asko ikasten
da, argazki horretan gustatu zaizun hori kopiatzen, hain zuzen ere.
Ze iritzi dezu kamara digitalei buruz?
Egia esan, kamara analogikoak gehiago gustatzen zaizkit. Gaur egun dauden
kamara digitalek ezin dute eman kamara analogikoak ematen dituzten prestazioak.
Hala ere, denborarekin asko hobetuko dira digitalak. Argazkilaritzak
ematen duen satisfakzioa da obra osoa hasieratik bukaerara zuk egiten
dezula: argazkia atera, errebelatu, eta abar.
BDX
Saxofoi Laukoteak entzule asko bildu zuen
Judith
Montero saxofoilari hernaniarra eta beste hiru gaztek osatzen duten
BDX Laukoteak entzule askoren arreta piztu zuen Milagrosan. Lauak ere
formazio haundiko musikoak dira eta gozatu ederra eman zioten Milagrosan
bildu zirenen belarriei. Judith Monterorekin batean, Esteban Vila Tormo,
Jose Luis Garcia, Vincent Minguet eta Sue Wang aritu ziren. Guztiak
Bordeleko kontserbatorioan elkartu dira eta han sortu dute BDX taldea.
Mahai
tenisa
Hernani-Helios gaur kiroldegian
Bigarren Liga Nazionaleko taldeak C.N. Helios taldearen kontra jokatuko
du gaur 10:00etan Hernaniko kiroldegian. Hernaniarrak oso leku onean
daude sailkapenean.
Bestalde, joan den asteburuan, Hernanik Gipuzkoako Liga irabazi zuen.
-
Jasota bezala
Kiroldegiko
arazoak: Putxerazoaren ondorioak
BILDU HERNANIk Kiroldegian piztu den gatazka dela eta bere hausnarketa
zabaldu nahi du herritarren aurrean:
1. Lehendabizi azaldu nahi diegu gure elkartasuna eta gure laguntza
osoa igerilekuko begiralei. Eredugarria da eramaten ari zareten borroka:
epaitegietan irabazi duzue, herritarren sentsibilizatzea lortu duzue
eta agerian utzi duzue udal agintari hauen harrokeria eta jauntxokeria.
2. Langile hauei bere eskubide guztiak onartu behar zaizkie eta irtenbide
zuzen bakarra du gatazka honek: kontratu indefinituak egitea langile
hauei, epaileek agindu duten bezala.
3. BILDU HERNANI poztu egiten da Hernaniko Ezker Batuak hartu duen jarrerarekin.
Dena den gogoratu nahi dugu gatazka hau sortu dela egungo udal gobernu
taldeak langile hauek kaleratu nahi izan dituenean eta gobernu horretan
EA-PNV eta Ezker Batua daudela. Beraz Ezker Batuak hobe luke bere erantzunkizunak
aztertzea eta ez beste batzuen gain uztea.
4. BILDU HERNANIk goraipatu nahi du ezker abertzaleak azken legegintzan
egindako lana. Egia da lau urte horietan ezin izan zaiela jasotako arazo
guztiei konponbide definitiboa eman. Baina adibidez kasu honetan beti
bilatu da langile hauen egoera hobetzea eta beraiekin batera irtenbide
adostu batera iristea. Herritarrek BILDU HERNANIri gehiengoa eman zioten
lanean jarraitzeko baina Madrileko faxistek inposatutako neurriak gehi
hemengo alderdi politiko batzuen konplizitateak herritarren nahia bahitu
eta bortxatu dute.
5. BILDU HERNANIk azpimarratu nahi ditu putxerazoaren ondorioak: langileen
aurkako neurriak bultzatzen ari dira: lehen Ongintza Patronatuan -zorionez
bertan behera geratu zirenak- eta orain Kiroldegian; Urnietako erraustegiaren
alde bozkatu dute udal ustel honen ordezkariek; Abiadura Handiko Trena
proiektuari erraztasun guztiak ematen zaizkio; hirigintzan erabaki susmagarriak
hartzen ari dira... Eta guzti honetan bai EA, bai PNV eta bai Ezker
Batua erantzuleak dira.
Hibai
Aristimuño Zubillaga
BILDU HERNANIko Zinegotzia