Hernanin 9.080 tonelada zabor sortu genituen iaz eta % 28 birziklatu zuen San Markosek
2003 urtean aurrekoan baino % 3,16 zabor gehiago sortu genuen Mankomunitate osoan . San Markosek Reciclathon pelikula interaktiboa jarri du interneten jendea sensibilizatzeko.

JuliGeroz eta zabor gehiago sortzen dugu, baina, birziklatu ere bai. Gauzak horrela, 2003an, aurrekoan baino zabor gutxiago joan da San Markoseko zabortegira. Horiek dira atzo San Markosek 2003ko balorazioari buruz adierazitako ondorio batzuk.
Datuetara jota, Hernanin 9.080 tonelada zabor sortu genuen iaz (478 kilo pertsonako). Zabor bakoitza bere kontenedorera bota izanari esker eta atez-ateko bilketa medio, San Markosek 2.542 tonelada birziklatu zituen, % 27,87 hain zuzen ere. Roman Sudupe San Markoseko lehendakariak datu bat eman zuen birtziklatu den portzentai horren neurriaz argitzeko: Mankomunitate osoan birziklatu den zaborra da Errenteria, Lasarte, Oiartzun, Urnieta, Astigarraga, Lezo eta Hernanik urtebetean sortu duten zabor guztiaren parekoa.
Ikastetxeetan eta administrazioan biltzen den papera, dendetan biltzen den kartoia, pilak eta etxeko ontziak izan ziren 2003an birtziklajean igoera haundiena izan zutenak.
Sudupek adierazi zuen etorkizunari buruzko zenbait gauza argitzeko egonagatik, datuek erakusten dutela hiri hondakinen gestioan San Markos egiten ari den lana bide onetik dijoala, baina, gogoratu du Plan Integralaren helburu nagusietako bat zabor gutxiago sortzea dela, eta hor “denok” ahalegin berezia egin behar dugula.
Bestalde, San Markosek pelikula interaktiboa jarri du Interneten, www.gipuzkoa.net helbidean, jendea sentsibilizatzeko. Sartu eta asmatzen dutenen artean Costa Ricara bidaia zozketatuko da.

---

Gipuzkoako Kross Txapelketa eta Adarraga Memoriala Hernanin igande honetan
Infantil eta alebinentzako proba da. Gipuzkoako 300 gaztek hartuko dute parte, 16 hernaniarra . Eguraldi ona bada Landaren egingo da eta txarra bada Antziolan.

Datorren igandean, otsailak 15, Gipuzkoako Kross Txapelketa jokatuko da Hernanin, infantil eta alebin mailan. Gipuzkoa guztiko 300 gaztek hartuko dute parte eta Hernanikoak 16 izango dira: Alaitz Vangeneberg, Ane Villaverde, Enara Agirreza-bala, Izaro Auzmendi, Edurne Elizalde, Ana Herrero, Miriam Arrozpide, Julen Elizegi, Maddi Iradi, Eider Aldabe, Mikel Voon Whichman, Joseba Lizeaga, Txomin Lizeaga, Manex Pagola, Estibalitz Lion eta Josu Etxarri. Lehen probak 10:15etan hasiko dira. Alebin neskek 1.882 metro egingo dituzte; mutilek 2.350; infatil neskek 2.350 metro; eta mutilek 3.110.
Korrikalariek berek esandakoaren arabera Hernaniko jendea dago faboritoen artean: Eider Aldabe, Joseba Lizeaga eta Mikel Voon Whichman besteak beste, baina, forma onean atleta guztiak daude. Hernanitik kanpokoetan Tamara Lozano billabonarra nabarmendu dute Hernaniko korrikalariek.

Atletismoa gora
Hernanin atleta gazte koadrila polita dago eta guztiak oso gustora dabiltza Kronikari esan diotenez. “1.900 metrotik gorako probak gogorrak dira” esan dute, baina, datorren igandean luzeago ari beharko dute gehienek.

---

Abizenak euskaraz
Udaletxeko Euskara Zerbitzuak abizenak euskeratzeko kanpaina jarri du martxan, Buruntzaldeko beste Euskara Zerbitzuekin batean. Abizenak euskeratzeko eman beharreko agirien eta pausoen berri eman dute. Behar dira: Errolda agiria (Udaletxeko sarreran eskatu); Jaiotzagiri literala (Hernaniko Bake Epaitegian eskatu); NANen fotokopia; Famili liburua (ezkonduan edo seme-alabak dituztenak). Paper guzti hauek Donostiako errejistro zibilera eraman behar dira (Atotxa zaharraren ondoko eraikina. Tel 943 000730). Zalantzak argitzeko: Euskara Zerbitzua 943 337029 edo Bake Epaitegia 943 552836.

‘Osama’ pelikula gaur Biterin
Osama pelikula botako dute gaur, 22:00etan Biterin, Zine Klubaren barruan. Afganistanen kokatutako istorio bat kontatzen du Osamak, Talibanak boterera iritsi eta ama eta alaba batzuek bizi behar izaten duten miseria. Etxean gizonezkorik gabe gelditu eta lan egiteko eta kalera bakarrik ateratzeko eskubidea galtzen dute, eta amonak neska gaztea mutil moduan pasa arazten du.

Kontzentrazioa gaur
kondenaren 3/4ak beteak dituzten presoak askatzea eskatzekoa
3/4 plataformak deituta kontzentrazioa dago gaur, arratsaldeko 19:00etan Plaza Berrian. Kondenaren hiru laurdenak beteak dituzten presoak askatzea eskatuko du Plataformak.

Inmaculadan Jardunaldi irekiak
gaur dira
Inmaculada ikastetxean gaur dira jardunaldi irekiak, ikastetxea ikusi eta dudak galdetu nahi dituen jendearentzat. Arratsaldeko 17:30etatik 19:30etara.



Ipuiak Kontatzeko Ikastaroa
Ipuiak kontatzeko ikastaroa 26, 27 eta 28an
Ipuiak kontatzen ikasteko ikastaroa emango dute otsailaren 26, 27 eta 28an Hernanin, Hernaniko Udalak antolatu eta Eusko Jaurlaritzak diruz lagunduta. Osteguna eta ostiralean, 17:00etatik 19:00etara izango da eta larunbatean 09:00etatik 13:00etara. Ikastaroa gazteleraz da. Izen ematea zabalik dago Biteri kultur etxeko liburutegian, otsailaren 25a arte. Izen emateko: astelehenetik ostiralera, 10:00etatik 13:00etara eta 16:00etatik 20:00etara. Larunbatetan, 10:00etatik 13:00etara egongo da apuntatzeko aukera.

Txantxangorri
Mus Txapelketako partidak gaur Txantxangorri elkartean mus txapelketako partidak daude gaur: Joseba-Rafa, Pineda-Xixoren kontra eta Mauri-Txanpi, Pablo Ruiz-Juan Mariren kontra.

Plenoa
Hiru puntu gaur eztabaidan
Plenoa dago gaur Udaletxean, arratsaldeko 18:00etan. Aurreko bileretako aktak onartu eta abenduaren 29tik urtarrilaren 31ra hartutako erabakien berri emango da. Hirugarren puntuan Alkatetzak Kultura Zerbitzuko ordezkotza bereziaren berri emango du.

Martindegiko Auzo Elkartea
Eskiatzera datorren larunbatean Martindegiko auzo elkarteak ekitaldiak antolatzen ditu urtean zehar, eta datorren larunbatean eskiatzera joatekoak dira Candanchura. Guztira 20-30 lagun joango dira auzo elkartetik Kronikari esan diotenez.

Skate Parkea
Skate parkea egiteko firma bilketa ostiralean. Skate parkea egiteko firmak biltzen ari dira Hernaniko hainbat skate zale gazte. Oraingoz 400 firma lortu dituzte baina 1500 firma behar dituzte. Ostiralean 17:30etan, Plaza Berrian.