Untitled Document

Udalak Ave Maria ondoko baju bat egokitzea proposatu du haurtzaindegia jartzeko
600 metroko lokala da, eta Udalaren asmoa da ahal dela datorren kurtsorako martxan egotea . Gurasoek ez dute proposamena onartzen, eta haurtzaindegiarentzat etxe “propio eta duina” eskatzen dute.

Transpakarren egon den haurtzaindegia, Ave Maria parkea eta antziolako rekta artean egiten ari diren etxeetako behean jartzeko asmoa du Udalak. Transpakarreko haurtzaindegian pitzatuak atera ziren urrian eta Udalak, segurtasunagatik, erabaki zuen hura itxi eta haurtzaindegia Kiroldegian dagoen Udal jangelara eramatea. Gertatu zena ikertzeko, Transpakarreko zorua aztertu du eta dirudienez, hondoak lur mugimenduak izateko arriskua du, eta ez haurtzaindegian bakarrik, ondoko edefizioan ere bai. Txema Mercado Hezkuntza zinegotziak Kronikari adierazi dionez, horrek zer soluzio lukeen erabakitzeko informea martxan dago. Hala ere, susmo zabalduena da edifizioa dena bota eta berria egin beharko litzatekeela.
Hezkuntza Saila haurtzaindegiarentzako leku berri bila ibili da, eta Mercadoren ustez, soluzio onena Ave Maria parke ondoko behea egokitzea da. Helburua, datorren ikasturterako martxan egotea da.

Atari haundia eta eguzkia
Ezker Batuko zinegotziak zenbait arrazoi eman ditu ia 600 m2 dituen lokala haurtzaindegia jartzeko leku egokiena dela argudiatzeko. Bere esanetan, barruz erabat moldatzeko aukera izateaz gain, inguruan atari haundi bat jartzeko aukera ematen du eta zati bat Ave Maria parke aldera. Atari horretan ia egun osoan jotzen du eguzkiak. Mercadoren iritziz, garrantzitsua da umeek kanpoan ibiitzeko leku ona izatea. Lokalak 4-5 metroko altura du eta leihoak jartzeko aukera dago.

Gurasoek etxe oso bat nahi
Gurasoek ez dute begi onez ikusten haurtzaindegia baju batean jartzea, eta zentzu horretan, ez dute onartzen Udalak egin dien proposamena. Gurasoek aste honetan bilera egin eta Alkateari idatzi bat ematekotan dira, beren jarreraren berri emanez.
Gurasoek haurtzaindegi propio eta duina eskatzen dute, etxe osoa haurtzaindegi izango dena. Eta beren ustez, herrian badaude horretarako lekuak. Besteak beste, Villa Ave Maria eta Paradorra aipatu dituzte eta uste dute haurtzaindegi egokia izatea lehentasuna dela herrian. Gurasoak behar den denbora itxaron eta jangelan jarraitzeko prest daude, arazoari soluzio duina eta behin betikoa eman ezkero.
Haurtzaindegiarentzat edifizio propio bat eskatzeko bidean gurasoek 2.000 firma bildu eta plenoan aurkezteko asmoa dute. Bestalde, Haurtzaindegia Udal Jangelan dagoenetik lehengo zerbitzu bera ez dutela jasotzen argudiatuta, kuotak errebisatzeko eskatu dute. Gaur egunean, hilean 317 euro bitartean ordaintzen dituzte.

Atletismoa
Migel Angel Garinek 4 urrezko domina lortu ditu Espainiako Txapelketan eta Jose Mari Garinek 1
Migel Angel Garin izan da puntuaziorik altuena lortu duen atleta

Joan den asteburuan beteranoentzako pista estaliko Espainiako txapelketak jokatu ziren Zaragozan eta Hernanira 5 urrezko domina ekarri dituzte. Migel Angel Garinek 4 urrezko domina irabazi ditu: pentlatoian, luzera saltoan, 60 metro hesietan eta salto hirukoitzean. Garin oso gustora dago lortutako emaitzarekin eta ondo prestatuta joan delako dena ondo atera zaiola esan dio Kronikari: “sentsazio oso onak izan ditut, entrenatu ere oso ondo egin bainaiz aurten eta egia esan dena ondo atera zait proban bertan ere”. Garinek badaki aurtengo urtea ona dela beretzat 50 urte egin berriak baititu, eta 50-55 urte arteko mailan parte hartzen baitu. Gauzak horrela, martxoaren 10etik 14ra Alemanian jokatuko diren Munduko Txapelketarako ilusioz dago eta Pentlatoian 8 aurrenekoetan sartzea izango du helburua eta Espainiako errekorra haustea, oraingoan 5 puntu eskasera gelditu baita.
Bestalde, Jose Mari Garin hernaniarrak ere urrezko domina bat ekarri du 75-80 urtekoen mailan, 1.500 metroan. Garin belauneko minez ibili da eta duda izan du parte hartu edo ez, baina, azkenean aurrera egin eta irabaztea lortu du.
Zaragozan jokatutako txapelketan 490 parte hartzaile izan dira.