Aurrematrikulazioa astelehenean irekiko da Hernaniko 5 ikastetxeetan
Berez 6tik 16 urte arteko umeentzat da derrigorrezkoa hezkuntza, baina, gehienak 2-3 urte artean hasten dituzte ikasketak. 2-3 urte arteko 386 ume daude Hernanin.

Haur Hezkuntzan eta Derrigorrezko Lehen eta Bigarren hezkuntzan matrikulazioa datorren astelehenean irekiko da. Hernanin 5 ikastetxe daude haur eta derrigorrezko hezkuntzan: Langile, Urumea, Elizatxo, Inmaculada eta Txirrita. Langile, Urumea, Elizatxo eta Inmaculadan Haur hezkuntza, Lehen Hezkuntza eta Bigarren Hezkuntza ematen dute, hau da 16 urte arte. Ereñotzuko Txirrita ikastetxean, berriz, Haur eta Lehen Hezkuntza, 12 urte arte. Seme-alabak matrikulatu nahi dituenak aukera zabala du eta orain dauka ikastetxeetara joan eta bakoitzean zer eskaintzen den ikusi eta erabakitzeko aukera.

Orain, 2342 ikasle
Oraingo ikasturterako 2342 ikasle matrikulatu ziren Hernaniko ikastetxeetan. Haurtzaindegia eta Hernani Institutua kontuan hartu gabe 2057 dira Hernanin ikasten ari diren ikasleak eta datorren ikasturtean ere antzeko kopurua izango da. Derrigorrezko hezkuntza 6 urtetik 16ra artekoa da, baina, normalean 2-3 urterekin matrikulatzen ditu jendeak bere seme-alabak, eta zail da ikastetxe batean matrikulatu eta 16 urte arte beste batera aldatzea. Beraz, 2-3 urte arteko Hernaniko 400 ume inguruk erabakiko dute beren ikasketak non egingo dituzten, gutxi gora behera. Hernanin aukera zabala izanagatik badira ikastera herritik kanpora joaten diren ikasleak ere, baina, hauen informaziorik ezin izan du lortu Hernaniko Kronikak. Jakina dena da gehiengo haundiena Hernanin gelditzen dela.

Matrikulazioa Matrikula otsailaren 16tik 27ra egin behar da. Ikasle kopurua Hernanin 16 urte arteko 2057 ikasle dabiltza herriko 5 ikastetxeetan. Herrian ikasi Badira Hernanitik kanpoko ikastetxeetan matrikulatzen dituzten haurrak, baina, gehiengo haundi batek herrian bertan egiten ditu ikasketak.

---

Skate pista egitea eskatzeko 800 firma bildu dituzte dagoeneko

Hernanin skate edo patinete pista egiteko eskatzen ari da kirol hau egiten duen gazte koadrila bat, eta Udalak hala eskatuta firma bilketa bat hasi dute. Dagoeneko 800 firma inguru bildu dituzte gazteek Kronikari esan diotenez eta 1.300 firma biltzeko helburutik geroz eta gertuago daude. Kalean ari dira firmak biltzen eta Kronikari esandakoaren arabera jendeak jarrera ona erakutsi du orain artekoan. Joan den ostiralean erakustaldia egin zuten kalean eta firma biltzeko mahai bat jarri eta 410 firma lortu zituzten. Baliteke aurrerago horrelako erakustaldi gehiago ere antolatzea herrian.

---

Jasota Bezala (Gutunak)

Igeriketa-monitore talde batekin dugun arazoari buruz idatzitako azken artikuluan, auzitegietara jotzeko itunen bat ote dagoen-edo iradoki zuen Aristimuño jaunak. Informazio hori ez dator bat aktetan biltzen denarekin, argi geratzen baita akta horietantxe aurreko udalbatzak ez zituela onartu monitore horien eskakizunak.
Bildu Hernaniko arduradunak bere idazkian aipatzen duen ituna egia izango balitz, ordea, kontua larria izango litzateke. Amarru bat izango litzateke, justiziaren manipulazioa; ahaztu gabe, gainera, auzi horren inguruan 3.000 bat euro gastatu dituela Udalak abokatutan.
Kiroletako Udal Patronatuak argi dauka oposizio irekiak direla udal erakundeetako lan-taldeetan sortzen diren postuak betetzeko bidea, horiek bermatzen baitute soilik eskatutako baldintzak betetzen dituzten guztiek postua lortzeko aukera izatea. Horrenbestez, ez gaude Patronatuko lan-taldea oposizio edo lehiaketarik gabe handitzeko prest.
Zorrotz beteko dugu hala ere epaia baina, ikastaro-zerbitzuak sorrarazten dituen beharrak asetzeko orduan, aukera-berdintasuna bermatzen duten formulen bila jarraituko dugu.
Azkenik, esan nahi nuke ez dudala uste Hibai Aristimuño denik -hain zuzen ere, iaioa da epaiak ez betetzen; bere pertsonal-politika fede txarrekoa eta 'ausartegia' dela adierazi dute epaitegiek, eta lau urtez bere nahierara sortu eta deuseztu ditu lanpostuak Udalean- Kiroletako Udal Patronatuaren arduradun gisa dudan portaera kritikatzeko egokiena.

Iñaki Barrio
Kirol Patronatuaren
presidentea

Mutil bat hil zen
ostiralean Sorgintxulon, kotxeak harrapatuta
I.R.R. 10 urteko hernaniar gaztea kotxeak harrapatuta hil zen ostiralean, Galarretatik Hernanirako bidean, Sorgintxulo parean. Istripua arratsaldeko 19:30ak inguruan izan zen eta anbulantziako larrialdietako kideak saiatu ziren arren, umea istripua izan eta gutxira hil zen. Ertzantzak dilijentziak hasi ditu istripua zerk eragin duen argitzeko.

Waterpoloa
Hernanik Askartzaren kontra gaur Leioan
Hernaniko nesken taldeak, partidua du gaur Askartzaren kontra, Euskal Herriko ligan. Partidua Leioako igerilekuan izango da goizeko 11:00etan. Entrenadoreak esan duenez gaurko partiduak erraza behar luke baina azkeneko momentura arte ezin omen da jakin bizkaitarrak zer joko puntutan dauden.

Atletismoa
Gipuzkoako Kross Txapelketa Landaren
Alebin eta infantil mailako Gipuzkoako Kross Txapelketa dago gaur Landaren, 41garren Adarraga memorialaren barruan. Goizeko 10:15etan hasiko dira probak. Eguraldi txarra bada Antziolako atletismo pistan izango da.

Mozorroak gaur etxez etxe Aranon, Inauterietan
GAur dira inauteriak Aranon eta Mozorroak ibiliko dira etxez etxe urtero bezala. Goizeko 08:30etan irtenda baserriz-baserri buelta egingo dute, puska biltzen. Eguerdian bazkaria egingo dute eta arratsaldeko 17:30etan zahagi dantza dago plazan eta afaria soziedadean. Ondorenean musika eta festa giroa izango dira.

Galdutakoak
Kirol poltsa galdu da
Kirol poltsa beltza galdu da ostiral goizean, Telleri Gaineko autobus geltokian, Donostiarako zentzuan. Bilatzen duenak deitu 661 523 839.

Kaldererotako ingudea galdu da Elur Txori elkarteak kaldererotan ateratzen duen ingudea galdu da. Zerbait dakiena Elur Txoritik pasa.

Urumea Ikastola
Iñude eta Artzaien festa gaur
Iñude eta Artzaien festa egingo du gaur Urumea ikastolak. Eguerdiko 12:00etan aterako da Konpartsa Urumea ikastolatik eta herrian barrena ibiliko dira 11-16 urte bitarteko 150 bat ikasle.

Elur Txori Elkartea
Urteko bazkaria gaur
Elur Txori elkarteak urteko bazkaria egingo du gaur. Lehenik, goizeko 11:00etan meza izango da hildako bazkideen alde, Juan Bataiatzailea Parrokian. Bazkal ondoan mus txapelketako sari banaketa egingo da.

Futbola
Hernanik 2-1 galdu
Gorengo taldea esku hutsik etorri zen atzo Tolosatik, 2-1 galduta eta sailkapeneko azken postuetatik atera ezinda jarraitzen du. Lehen zatian zoritxarreko jokaldi batean etorri zen tolosarren gola, kornerra atera eta Hernaniko jokalariak bere atean sartu baitzuen. Bereala berdindu zuen Hernanik. Bigarren zatian 10ekin gelditu ziren zuri berdeak eta eta 2garrena egin zuen Tolosak. Gaur Emakumezkoen ligan Añorga-Hernani, 11:30etan Añorgan.

Errugbia
Hernanik 19-10 irabazi
Defentsan oinarrituta irabazi zion atzo Hernanik Getxori Aieten, 19-10. Partidu bukaera arte entsaiorik ez zuen jaso Hernanik eta bukatu aurrean lortu zuten bizkaitarrek arrastotik baloia pasatzea. Partidu ona egin zuen Hernanik nahiz emaitzean diferentzia haundiegirik lortu ez, Getxon lehen taldeko jendeak ere jokatu baitzuen. Hiru partidu faltan segurua da Hernanik igoera Play off-a jokatuko duela, eta prestatzen ari dira buru belarri.

Boleibola
Hernanik 2-3 irabazi
Mutilen taldeak Sestaon jokatu zuen atzo eta garaipena gogotik borrokatu behar izan zuen. Lehen jokoa 18-25 irabazi zuten hernaniarrek eta dagoeneko titulurako play offerako sailkatuak daudenez probak eta aldaketak egin zituzten. Hortik aurrera 25-19, 25-22, 25-27 eta 17-19 izan ziren jokoak. Hernanik datorren asteburuan du ligako azken partidua eta bira hasiko dira Play offak. Gaur nesken taldea, 11:00etan kiroldegian, Fortunareken kontra.