Abiadura Haundiko Trenak Hernanin barrena egingo duen tramoa onartu du Espainiako Gobernuak
Espainiako Sustapen Ministroak obrak aurten hasi daitezkeela aurreikusi du. Trena Akarregi, Zikuñaga, Elorrabi, Osiñaga inguruetatik pasako litzateke. Ibilbide definitiboa ez dago zehaztuta oraindik

MADRILEKO Gobernu zentralak onartu du Abiadura Haundiko Trenaren proiektuaren aurreneko 8 zatietan lanak hastea eta horien artean Hernanitik pasako litzatekeen tramoa dago. Abiadura Haundiko Trenak Gipuzkoan, Bizkaian eta Araban egingo duen ibilbidea ‘Euskal Y’ izenaz ezagutzen da eta guztira 180 kilometro ditu, baina Madrilen onartu direnak 46 kilometro dira eta horietatik 2,6 kilometro inguru dira Hernanin egin nahi direnak. Ibilbidea egiteko obra aurten hasi liteke eta onartutako 46 kilometroak egiteko 814 milioi euroko aurreikusten dira, 135.000 miloi pezeta.

Trenaren ibilbidea
Eusko Jaurlaritzak 2001ean osatutako planoaren arabera trenaren ibilbidea izango litzateke: Akarregi eta Zikuñaga artean trena 780 metroko tunel baten barrena joango litzateke eta Ibarluze poligonoan aterako litzateke 17 metro altuko biadukto batera. Elorrabi, Iparragirre eta Altzueta sagardotegi ondotik pasako litzateke ondoren eta 200 metroko tunelean sartu. Osiñagan aterako litzateke gero, Eizmendi eta Otsua-Enea sagardotegien ondoan. Osiñagako tuneletik irteeran, 22 metroko altueran joango litzateke biadukto batean, Errotarango etxe gainetik. Arrilimoi erreka zeharkatu eta 2.440 metroko tunel batean sartuko litzateke, Urnieta aldean ateratzeko.
Hala ere, plano definitiboa osatu gabe dago oraindik. Izan ere, Espainiako Gobernuak onartutako ibilbidea ez dator bat Eusko Jaurlaritzak 2002an bere kabuz osatutako beste plano batzuekin eta Jaurlaritzaren asmoa da orain berak idatzitakoa Madrilera bidali eta hangoari moldaketak egitea.

Azterketak iaz
Pasa den abuztuan azterketak egin zituen GIFek Akarregi eta Osiñaga aldean eta idatzitako txostenean ibilbideari hainbat moldaketa egin behar izan zitzaizkion oztopoak medio: trenak Urumeako autobia berriarekin eta GI-131 karretera zaharrarekin gurutzatuko litzateke, trenak beharko lukeen tunelaren iparraldeko ahoa eta Urumea ibaiaren ubidea.
Txostenak Akarregiko poligonoari buruz ere hitz egiten du eta dio poligonoa eraikitzerakoan kontutan hartu beharko dela Abiadura Haundiko Trenaren ibilbidea, izan ere trena bertatik pasatzen da-eta.

---

Aralar: “Aurrera begira ezkerreko abertzaleekin indar eraginkorra osatzea nahi dugu”
Patxi Zabaleta eta Mikel Besabek hitz egin zuten Biterin asteartean n Martxoko hauteskundeetan Gipuzkoatik Madrilen ordezkaritza lortzea espero du Aralarrek.

Patxi Zabaleta eta Mikel Besabek hitzaldia eman zuten Biterin Aralarren proiektu politikoari buruz eta egoera politikoari buruz. Zabaletak azpimarratu zuen Aralarrek aurrera begira duen helburua dela ezkerreko abertzaleak bildu, indar eraginkorra osatu eta eskubiari irabaztea. Indarrak biltze horren barruan esplikatu zuen EAEn Zutikekin osatutako koalizioa. Zentzu horretan, eta datozen hauteskundetara begira, esperantza dute Gipuzkoatik ordezkaritza lor-tzeko Madrilgo parlamentuan.
Aralarreko koordinatzaileak Nafarroa Bai koalizioaz eta abertzaleen arteko elkarlanez ere hitz egin zuen. Bere esanetan, ilusio haundia sortu du eta koalizioa Nafarroako bigarren indarretik gertu ibili liteke bototan. Zabaletaren iritziz, egokiaena izango zen Batasuna iniziatiba horretan sartzea, baina, Zabaletaren ustez Batasunak erabaki hori lehendik hartuta zeukan.
Mikel Besabe Aralar kideak nabarmendu zuen Aralar ezkerreko alderdi independientea eta independentista dela. Garrantzitsutzat jo zuen Madrilen ere ezkerreko ikuspegi independentistaren ahotsa entzutea, bai gai politikoei buruz eta baita AHT bezalako gaietan ere.

---

‘Las mujeres de verdad tienes curvas’ filma

Biteriko zinean gaur Las mujeres de verdad tienes curvas pelikula botako dute. Estatu Batuetako pelikula honen zuzendaria Patricia Cardoso da eta arrakasta haundia izan du zinean. Pelikulan 18 urteko neska ertamerikar baten istoria kontatzen da eta unibertsitatera joateko aukera duen arren gurasoen oztopoa izango du bere ametsa burutzeko. Neskak bere inguruko emakumeei saiatzen da erakusten beren buruan, larunbatean 19.30etan eta 22:30etan eta igandean 19:30etan, Biterin.

---

 

Jubilatu Etxean urteko batzarra bihar
Goiz Eguzki Jubilatu Elkarteak urteko batzarra egingo du bihar. Batzarrean 2003ko balantzea eta 2004ko proposamena aurkeztuko ditu zuzendaritzak, eta Udal ordezkariak ere izango dira bertan. Lehenengo deialdia arratsaldeko 15:30etan eta bigarrena 16:00etan, Goiz Eguzkin.

Iñauterien buruzko liburuaren aurkezpena
‘Hernaniko Iñauteriak oroituz’ liburua aurkeztuko dute gaur. Hernaniko talde eta jendeak egindako erreportaiak, 12 herritarri egindako elkarrizketak, garai bateko eta oraingo argazkiak eta abar biltzen ditu liburuak. Aurkezpena gaur da, arratsaldeko 20:00etan Biterin.

‘La Bola de Cristal’ gaur Andragoton
Andragoton La Bola de Cristal botako dute gaur arratsaldeko 19:30etan. La Bola de Cristal, 80ko hamarkadan arrakasta haundia izan zuen haurrentzako saioa izan zen. Bertan Alaska eta Pablo Carbonell bezalako pertsonaje ezagunek parte hartu zuten eta txotxongiloak, musika, antzerki emanaldiak, umorea, imajinazioa eta kritika zeuden bertan.

Hirigintza Batzordea
Hirigintza batzordea bilduko da gaur Udaletxean eta 3 puntu eztabaidatuko dituzte: Atofina enpresako lizentziaren berri ematea; establezimentuetako soinuaren gaineko Udal ordenantza; eta herriko soinu maparen bigarren fasea.

Elkarri bolondres eske
Elkarrik 1.000 mahai jartzekoak ditu otsailaren 28an, larunbata elkarrizketaren alde firmak bil-tzeko. Hernani, Urnieta, Andoain, Astigarraga, Lasarte eta Usurbilen 30 mahai jartzekoak dituzte eta 100 boluntario behar dituzte bizpahiru orduz. Prest dagoenak deitu 943 00 06 00 telefonora edo Hernaniko tailerreko kide batekin harremanetan jarri.

Pelota
Hernani bihar ‘Berria’ txapelketa
Berria Txapelketa aurrera dijoa eta bihar sartuko da Hernaniko taldea jokoan. Bergararen kontra jokatu beharko du Hernanik eta 3 partidu izango dira: kadete, jubenil eta afizionatu mailan. Hernaniko taldea ia zehaztua dago: afizionatuetan Zabala-Mendizabal; jubeniletan Erdozio edo Ezeiza eta Gorrotxategi eta kadetetan Ojuel edo Ezeiza II eta Grajal. Bihar, 22:00etan kiroldegian.

Bildu Hernani
Igerilekuko gaiari jarraipen zorrotza
Bildu Hernanik Kronikara bidalitako prentsa oharrean Iñaki Barrio Kirol Patronatuko lehendakariari eskatu dio “igerilekuko begiraleen aldeko epaia bete dezala eta bermatu dezala igerilekuko monitore guztiek bere lanean jarraituko dutela legegintzaldi honetan”. Plataformak adierazi du susmoak dituela “Barriok kiroldegiko zerbitzu hau pribatizatu nahi ote duen” eta gai honi jarraipen zorrotza egingo diola esan du Bildu Hernanik. Bestalde adierazi du ikusi dutela Barriok kritikak ez dituela gogoko, baina, “Bildu Hernani beti hor egongo dela jauntxokeriak salatu eta oztopatzeko”. Bukatzeko prentsa oharrak dio nabarmen gelditu dela “ezker abertzaleak beste era, jarrera eta estiloa izan zuela langileen arazoak konpontzeko orduan” eta horretaz pozten direla.