2003an paroa zerbait jeitsi egin da Hernanin
Abenduan 774 langabetu zeuden INEMeko datuen arabera. Emakumeak dira paroan dauden gehienak, baina 20-30 urte bitartekoetan gizonezko langabetu gehiago dago.

2003an langabezia tasa gutxi baina, jeitsi egin da Hernanin. Azken urteetako joerari segiz, aurreneko hiru hilabeteetan izaten da paro gehiena, eta gero behera egiten du. Abenduan 774 pertsona zeuden INEMen apuntatuta eta inongo lanik ez zutenak. Lanen bat izan, ikasten ari edo beren egoera hobetzeko beste 411 hernaniar daude INEMen. Denera, beraz, 1.185 pertsona daude Lasarteko bulegoan apuntatuta. Portzentaietan hitz eginda, Hernanin langabezia % 9ren inguruan dabil, EAEko bataz bestekoaren gainetik.

Emakumeak gehienak
Orain artean bezalaxe, lan bila dabiltzan gehienak emakumeak dirak. Abenduaren 31ean, Hernanin 435 emakume zeuden inongo lanik gabe, eta 339 gizonezko. Hala ere, adinaren arabera estatistikak aldatu egiten dira. 20-30 urte bitartean lanik ez duen gizonezko gehiago dago Hernanin emakumezkoa baino, eta hortik aurrera emakumezkoak dira lanik ez duten gehienak.

---

Errugbia
Durangok jarraitzen du aurreneko postuan

Hernanik ezin izan zuen irabazi atzo Durango liderraren kontra, eta sailkapeneko bigarren postuan jarraituko du. Partidu oso gogorra jokatu zuten bi taldeek eta azkenean 18-21 gailendu ziren bizkaitarrak, lehendabiziko zatian ateratako abantailari eutsita. Durangarrak 8-18 zijoazten aurretik bigarren zatiaren hasieran, baina, hernaniarrak partiduari buelta emateko zorian egon ziren. Hernaniarren bi entsaioak Boli eta Pernasek egin zituzten, eta Arkaitz Ruizek transformazio bat eta bi zigor kolpe ere bai.
Ez dirudi Durangok lehen postua galduko duenik eta horrek esan nahi du, Hernanik Ohorezko B ligara igotzeko promozioa jokatu beharko duela. Horretarako bigarren postuari eutsi behar diote, eta 5 partidu falta dira liga bukatzeko.

---

Boleibola
Mutilen taldeak erraz irabazi zion Errioxako taldeari eta orain igoera fasea jokatuko du
Nesken ligan 3-0 galdu zuen Hernanik Santanderren kontra.

Boleiboleko mutilen taldea lehenengo dago liga sailkapenean eta aseguratuta dauka igoera fasea jokatzea. Larunbatean 3-0 irabazi zion Hernanin Universidad de la Rioja taldeari, eta berriz ere agerian utzi zuten ligan nagusi direla. Hiru jokuak horrela joan ziren: 25-21; 25-20; eta 25-16. Hiru partidu gelditzen dira lehen fasea bukatzeko. Igoera fasea jokatuko dute sailkapeneko 4 talde onenen artean.

Nesken ligan galdu
Bururik altxa ezinda dabiltza hernaniarrak nesken ligan. Atzo 3-0 galdu zuten Santanderren eta ligan azken hirugarren lekuan daude. Honakoa izan zen tanteoa: 25-16; 25-20; eta 25-21.

---

Igeriketa taldeak 100 lagun bildu zituen urteko bazkarian

hernaniko igeriketa taldeak atzo egin zuen urteko bazkaria, eta 100 lagun inguru bildu ziren, igerilari, arduradun eta gurasoen artean. Bazkal ondoan taldeko kideei sariak eman zizkieten, joan den denboraldiko ahalegina eskertu asmotan. Sarituak honako hauek izan ziren: Mañel Aizpurua, Olatz Altuna, Iara Jimenez, Andrea Izagirre, Ioritz Aldabe, Anne Altuna eta Eider Estibariz. Horrez gain, taldeko txikienek domina bana ere jaso zuten.
Oso denboraldi polita egin zuen iaz Hernaniko taldeak eta atzoko bazkarian, arduradunek eskerrak eman zizkieten lanean ibilitako guztiei.

 

Elur-Txori elkartea
Kaldereroetako konpartsa larunbatean eta entsaioak hiru egunetan, bihartik hasita
Elur-Txori elkarteak aurten ere aterako du konpartsa kaldereroetan. Konpartsa larunbatean aterako da 21:00etatik aurrera eta entsaioak bihar, etzi eta etzidamu izango dira. Entsaioak 20:00etan dira Elur-Txorin bertan, eta txaranga eta guzti egingo duten entsaioa ostegunean izango da. Bestalde, kalderero egunean afaritara joango diren konpartsako kideek izena eman behar dute elkartean jarrita dagoen listan.


Emakumearen Zentroa
Hitzaldia etzi, osasuna eta elikadurari buruz
emakumearen Zentroak hitzaldia antolatu du datorren asteazkenerako. Hitzaldia osasuna eta elikadurari buruzkoa izango da eta Sergio Parigua medikuak emango du. Parigua mediku ortomolekularra da. Asteazkenean, otsailak 4, arratsaldeko 16:30etan, Emakumearen Zentroan (Elkano 17).


Ezker abertzalea
Batzarra bihar hauteskundeei buruz, Milagrosan
hernaniko ezker abertzaleak batzarra deitu du biharko, hauteskundeei buruz hitz egiteko. Batzarrean beste puntu batzuk ere izango dira. Horien artean, Bergarako proposamenaren nondik norakoak azalduko dira. Batzarra, bihar, otsailak 3, arratsaldeko 20:00etan Milagrosan.

‘Ronda en Castilla’, ‘Lagarteranas’, ‘Suite en La’ eta ‘El Caserio’ musika obrek alaitu zituzten atzo Udaletxeko Arkupeak
Manuel Sagarna zuzendariaren agindutara, kontzertu polita eman zuten, atzo eguerdian, Hernaniko Musika Bandako kideek. Inguratu zirenek entzungai izan zituzten Doradoren Ronda en Castilla, Pachecoren Lagarteranas, Gomezen Suite el La eta Guridiren El Caserio obrak.

Futbola
Gorengoen ligan galdu eta Emakumezkoen ligan berdindu. Gorengo ligan Hernanik 0-1 galdu zuen larunbatean Lizeo taldearen kontra. Hernaniarrek bolara txarra harrapatu dute berriz ere, eta sailkapenean beheko postuetan daude. Emakumezkoen ligan, Hernanik 1-1 berdindu zuen Ostadar taldearen kontra. Partidu bukaeran gustora zeuden hernaniarrak, partidu oso txukuna jokatu baitzuten. Hernaniarrak pixkanaka gora dijoaz liga sailkapenean.


Xakea
Hernani Ak berdindu eta Hernani Bk irabazi
Hernaniko bi xake taldeak Gipuzkoako aurreneko eta bigarren mailako ligak jokatzen ari dira. Asteburu honetan, Hernani Ak 2-2 berdindu du Gros C taldearen kontra. Apezetxea eta Bereziartuak irabazi egin zituzten beren partidak eta Breogan eta Plazak galdu. Hernani Bk berriz, oso erraz irabazi zion Gros G taldeari: 3-1. Hernaniko taldean jokatu zutenak: Zabala, Orellana, Bilbao eta Osses.
Datorren astean Hernani Ak Fortuna C taldearen kontra jokatuko du eta oso neurketa gogorra izan liteke, Fortunakoak oso talde ona daukatelako.


Saskibaloia
Hernanik 30-37 irabazi zuen Bergaran
Hernaniko saskibaloi taldeak 30-37 irabazi zuen larunbatean Bergara taldearen kontra jokatutako partidua. Ez zen puntu askotako partidua izan baina, Hernaniarrek beren nagusitasuna erakutsi zuten, berriz ere.


Waterpoloa
Neskek enpatatu, mutilen A taldeak irabazi eta B taldeak galdu
Hiru partidu zituen Hernanik asteburu honetan. Nesken Euskal ligan 6-6 berdindu zuten hernaniarrek, partidu ederra jokatuta. Mutilen Euskal ligan, Hernani Ak 17-1 irabazi zuen Easoren kontra eta Hernani Bk 17-1 galdu Osasunaren kontra.