Untitled Document

Sardina erreta bukatuko dira gaur inauteriak
Ekitaldia Gudarien plazan egingo da arratsaldeko 18:30etan. Atzo, neska-mutil gazteen axeri dantza izan zen protagonista nagusia, eta eguerdian Potxin eta Patxin pailazoek gozatu zituzten umeak.

Ostiralean hasi eta gaur bukatuko dira Hernaniko inauteriak, etenaldi luze baten ondoren egin diren 25garrenak, hain zuzen ere. Arratsaldeko 18:30etan hasiko da sardinaren entierroa Gudarien plazan, eta lutuzko prozesioa atzetik dela Kardaberaz eta Kale Nagusitik buelta egin ondoren, plazan erreko dute. Iaz, txapapote arrastoak zituela etorri zen sardina, eta ikusteko dago aurten zer ekarriko duen.

Gazteak axeri dantzan
Azken 15 urte inguruan bezala, gazteen axeri dantza izan zen atzoko ekitaldi nagusietakoa. Txistulariek lagunduta eta axeri zaharren erakutsira, sokako 16 neska-mutil gaztek eta axeriak gozatu ederra eman zieten kalean barrena zebiltzan gazte eta helduei. Urtero koadrila berria izaten da eta gaztek ilusio haundiz hartzen dute axeri dantzako protagonista izatea. Ekitaldiak iraun zuen ordu eta erdian Kaxkoan ez zen hotz haundirik, 180 maskuri behar izan baitzituzten denak gustora uzteko.
Axeri dantzaren ondoren, Potxin eta Patxin pailazoak izan ziren Biteri plazan. Arratsaldean, erraldoi, buruhaundiak eta Hortzmuga taldeak berotu zuten giroa.

Gurasoentzat ikastaroa seme-alaben partehartzea eta ardura lantzeko
Ikastaroa Hernani Institutuak antolatu du eta astelehenero izango da, maiatza arte. Izena emateko epea hilaren 26an bukatuko da: 943 551958.

Hernani Institutuak gurasoentzat ikastaro berezi bat antolatu du seme-alaben partehartzea eta ardura lantzeko bideak emateko. Martxoaren 1etik maiatzera iraungo duen ikastaro honek lau helburu nagusi ditu: 1) Lanean eta familia bizitzan seme alabak parte hartzera motibatzeko estrategiak landu, 2) gurasoen komunikaziorako gaitasuna eta jarrerak hobetu elkarkidetzan eta errespetuan oinarritutako bizimodua hobetzeko, 3) familiako erantzukizunen desarroiloan oinarritutako autoritatea eta demokrazia baloreak bultzatu, eta 4) erantzukizuna lortu nahi denean eguneroko egoera konfliktiboei konstruktiboki aurre egiten ikasi.

Astelehenero, 18:00etatik 20:00etara Biterin
Gurasoei zuzendutako ikastaroa astelehenetan izango da Biterin eta denera 8 gai konkretu landuko dituzte: familia lana, familia ardurak, seme-alaben partaidetza, komunikazioa familian, erantzukizunaren kontua, familiako gatazkak nola konpondu eta abar. Ikastaroa datorren astelehenean hasiko da eta gaia honako hau izango da: Familia lana, ikusezina ikusgai egin.

Era praktikoan
Institutuak adierazi du programa era praktikoan eta talde dinamikan egiteko antolatuta dagoela. Horretarako, 15-25 pertsonako taldeak osatuko dira. Bi orduko saioak izango dira eta lehendabizi gaiari buruzko sarrera egingo da, bigarrenenean ekintza praktikoak eta azkenik ondorioak bildu, hurrengorako etxeko lan eta guzti.
Matrikula 30 euro da pertsonako eta taldea osatzeko izena emandako txanda errespetatuko da.

Hernani Ak irabazi eta Hernani Bk galdu

Xake partidak izan dira joan den asteburuan eta lehen eta bigarren taldeak emaitza oso desberdinak lortu dituzte. Hernani Ak 3,5 eta 0,5 irabazi dio Gros E-ri. Fernando Esnaolak, Mikel Apezetxeak eta Jesus Navascuesek irabazi egin dute eta Harkaitz Bereziartuak tablak egin ditu. Honenbestez, Hernanik sailkapeneko goikaldean segitzen du eta mailaz igotzeko aukera haundiak ditu.
Bestalde, Hernani Bk 0,5 eta 3,5 galdu zuen Fortuna Bren kontra. Tablak Txema Orellanak egin zituen eta Joseba Goikoetxeak, Magi Ijurkok eta Iosu Arrietak galdu egin zuten. Hernani B-ri igotzeko aukerak asko zaildu zaizkio Fortunaren kontrako partida galduta.

25 urteko lanaren saria

Elizatxo elkartean 25 urtetan garbiketa lanak egiten aritu den Matilde omendu zuten pasa den ostiralean. Matilde jubilatu egin da eta Elizatxo elkarteak 25 urte hauetan egindako lana eskertu nahi izan dio. Hori dela eta, elkarteak urte hasierako batzarrean erabaki zuen Matilderi eta bere senarrari Tenerifera joateko bidaia oparitzea eta omenaldi afaria egitea. Afarian bertan eman zizkioten bidaiarako txartelak eta baita lore sorta eder bat ere.