Bost film labur Biterin, martxoaren 3an
Basurdea, Belarra, Dortokaren uhartea, Terminal eta Topeka filmak botako dituzte Dobera Euskara Elkartearen eskutik. 2003an arrakasta haundia izan duten euskerazko 5 film dira.

Iazko euskerazko 5 film laburrik onentsuenak herriz herri emango dituzte, Topagunea Euskara Elkarteak antolatu eta Eusko Jaurlaritzak diruz lagunduta. Dobera Euskara Elkartearen eskutik etorriko da emankizuna Hernanira eta egingo dituzten 22 saioetatik lehenengoa izango da Hernanin: Biterin, martxoaren 3an, arratsaldeko 19:30etan. Bost filmeen ondorenean Asier Altuna zuzendari bergararrak hitzaldia emango du.
Gaur egunean ez dago film laburrak ikusteko toki edo zirkuitu asko, eta hori izan da Topagunea film laburren emankizun hau antolatzera animatu duena. Hernanin ezezik Nafarroa, Bizkaia, Araba eta Gipuzkoako 21 herritan emango dituzte film labur hauek, herrietako Euskara Elkarteen bitartez.

Basurdea: Mikel eta Joxi arrantzaleek basurdea bilatuko dute mendian, perretxiko bila dabiltzala. Historio odoltsu, gogor eta neketsua biziko dute. Zuzendaria: Ane Muñoz Mitxelena hondarribiarra. Aktoreak: Anartz Zuazua, Xinboen Alkain eta Ernesto Barrutia. Iraupena: 14 minutu. Belarra: Emakume bat baserri alboko belardira irtetzen da arropa esekitzera, semea besoetan duela. Urrutian gizon bat ari da segan. Bapatean saskian exerita dagoen haurra altxa eta belardian barneratzen da... Zuzendaria: Koldo Almandoz donostiarra. Aktoreak: Iker Pernas, Ainara Gurrutxaga eta Peru Almandoz. Iraupena: 10 minutu. Dortokaren uhartea: Espaziotik izaki bat etortzen da dortoka formako uharte batetara. Izakia Ainhoa da, asma duen 9 urteko neska. Gau batez uhartean irauteko desafioa izango du. Zuzendaria: Maru Solores donostiarra. Aktoreak: Ane Ormazabal, Egoitz Lasa, Gerardo Romero, Javier Gurrutxaga eta Maiken Beitia. Iraupena: 15 minutu. Terminal: Autobus gidari batek susmoa du hil egin dela sarritan ikusi ohi zuen neska yonkia. Damu zaio lagundu ez izana. Baina, handik gutxira neska bizirik agertzen da... Zuzendaria: Aitzol Aramaio ondarrutarra. Aktoreak: Miguel Ángel Solá, Blanca Oteiza, Ramon Barea, Mariví Bilbao eta Loli Astoreka. Iraupena: 12 minutu. Topeka: Herri txiki bateko gizonek zirkulu bat osatzen dute bertako plazan. Zirkuluaren erdian bi ahari talkan ari dira... Zuzendaria: Asier Altuna bergararra. Aktoreak: 2 ahari eta 80 lagun. Iraupena: 3 minutu eta 30 segundo.

---

Hezkuntza Batzordeak haurtzaindegiaren gaia aztertuko du gaur
Gaur arratsaldean Hezkuntza, Formazio eta Lan Batzordeak bilera berezia egingo du haurtzaindegiaren inguruko bi punturekin. Puntu bat haurtzaindegiko tasei dagokio, eta Batzordera dijoan proposamena datorren kurtsoan % 2,6 igotzea da, KPI (IPC)aren igoera estimazioa. Azkeneko erabakia hilabete honetako Plenoak hartuko du seguruena. Bigarren puntua, haurtzaindegiaren leku berriarena da. Txema Mercado Batzorde buruak Kronikari adierazia dio proposamena dela Haurtzaindegi berria Monteseko azpi batean joatea, lekua hartarako egokituta. Transpakarren egindako azterketek esaten dute hango zoruak mugimendu arriskuak dituela eta haur eskolak Udal jangelan jarraitzen du.

---

San Joanetarako ekitaldiak aurkezteko epea martxoaren 1etik 18ra da
Martxoaren 3an Jai Batzordearen bilera egingo da, Biterin 18:00etan.

Gero eta gutxiago falta da San Joanetarako eta Kultura Batzordeak aurreneko pausoak eman ditu programa osatzeko. Festetan ekitaldiak antolatzen dituztenek edo asmoa dutenek martxoaren 1etik 18ra dute eskaria egiteko epea.
Proposamen orriak Udaletxean izaten dira eta eskarian adierazi behar dira ekitaldia beraz gain, hura egiteko behar diren elementuak (aulkiak, megafonia...) eta aurrekontua. Proposamenak Udaletxeko erregistroan utzi behar dira, goizeko 09:00etatik 13:00atara bitartean.

Lehenengo bilera
San Joanetako Jai Batzordeak martxoaren 3an egingo du aurreneko bilera, asteazkenean, arratsaldeko 18:00etan.

---

Sardina plazan erreta, agur inauteriei

Bukatu dira 2004ko inauteriak Hernanin, atzo sardina plazan erreta. Jendeak negar gogotik egin zuen eta lutoz jantzita herriko neska mutil askok segi zioten sardinari eta bere azken orduei. Suak sardina erretzeko eta jendea berotzeko balio izan zuen, behin ilunduta hotz haundia egin baitzuen inauterietako azken egunean.
Karnabalen azkena egun tristea bada ere, atzeraxeago izan zen prozesioan festa giroan atera zenik, txistulari eta dultzaineroen laguntzarekin eta mozorroaren babesean.

Hogeitabostgarrenak
Aurtengo inauteriak 25garrenak dira, gerra garaian moztu eta Hernanin berriz ospatzen hasi ziren ezkeroztik. Inauterietako festek garai batetik behera egin dutela jakinekoa da, baina, aurten ere jende askok parte hartu du ekitaldietan eta kalean ere giroa eta jendea izan da, bai eguneko eta bai gaueko festan.

Ezker Abertzaleak ekitaldi politikoa ostegunean
Hernaniko Ezker Abertzaleak ekitaldi politikoa egingo du ostegunean Biterin, 20:00etan, Espainiari ez, autodeterminazioa lemarekin. Antolatzaileek zabaldutako prentsa oharrak dionez errepresioa eta erasoak jasan dituzten pertsonak eta kolektiboek hartuko dute parte ekitaldian. Hernaniko Ezker Abertzaleak adierazi du “Espainiari ez eta Euskal Herriari bai esateko” garaia dela. Ekitaldian hauteskunde kanpainako nondik norakoak ere aurkeztuko dira.

Arrauna
Hernanik laugarren egin zuen Orion Batel ligako estropadan
Hernaniko Arraun Elkarteak laugarren egin zuen joan den larunbatean Orion, Batel ligako lehenengo estropadan. Batela infantil eta kadete neskak osatu zuten eta Aita Mari irabazleak baino 25 segundo gehiago behar izan zituen. Hernanik San Pedro eta Orio B bezalako traineruak atzean utzi zituen, 5:32:50ko denbora eginda.

Bola
Migel Arrozpide eta Antonio Miner, gora
Legazpin jokatu zen Bolako Erregularitate txapelketako tiraldia eta bi hernaniar hirugarren eta laugarren jarri dira klasifikazio orokorrean. Migel Arrozpide eta Antonio Miner 222 brilarekin daude orain, aurrena dijoan Josu Lasa lasartearrak baino 5 brila gutxiagorekin. Legazpin, Andoni Berasategi idiazabaldarra gelditu zen aurrena 47 brilarekin. Migel Arrozpidek ere 47 bota zituen eta hirugarren gelditu zen eta Antonio Minerrek 7garren egin zuen 45 botata.

Ipui Kontatzea
Tailerra bihar
Ipui kontatzeko ikastaroa bihartik larunbatera da. Ikastaroa Udalak eta Eusko Jaurlaritzak antolatzen dute eta guztira 8 ordukoa da: bihar eta etzi arratsaldeko 17:00etatik 19:00etara eta larunbatean 9:00etatik 13:00etara, Laubidietan. Irakaslea Granadako Teresa Flo-res izango da, eta gazteleraz emango ditu klaseak. Tailerra praktikoa da eta ipuiak kontatzearen alde ezberdinak jarriko dira praktikan: eskuekin kontatzea, material ezberdinak erabiltzea (soka, papera...), hondarra erabiltzea eta abar.

Kiroldegiko Frontoia
Frontoia alokatzeko zozketa Kiroldegiko frontoia alokatzeko zozketa bihar izango da 19:30etan kiroldegiko bulegoetan. Izena ematea atzo bukatu zen eta orain zozketa egitea falta da. Zozketatzen diren orduak arratsaldeko 19:00etatik 21:45etara bitartekoak dira eta frontoia urte osorako hartzen da.

Elkarri
Firmak biltzeko boluntarioak Larunbatean Elkarrik firma bilketa egingo du Hernanin eta beste zenbait herritan eta mahaietan egoteko boluntarioak behar dituzte. Hernani eta inguruko 5 herrietan (Urnieta, Andoain, Astigarraga, Lasarte eta Usurbil) 30 mahai jarriko dituzte eta asmoa da mahaietan egoteko 100 boluntario lortzea. Prest dagoenak 943 000600 telefonora deitu.

Elur Txori
Bertso bazkaria larunbatean
Elur Txori elkartean bertso bazkaria antolatu dute larunbat honetarako. Bertsolariak dira: Aitor Mendiluze, Maialen Lujanbio eta Jexux Mari Irazu. Txartelak salgai daude Elur- Txorin eta Oindi eta Rioja tabernetan.

Txantxangorri
Museko partidak
Gaur Alber eta Pedrok, Balantxa-Balantxaren kontra jokatuko dute eta Toño-Kintxok Patxi-Joxe Leonen kontra. Buruz buru Carlos Lopez Luis Garayarren kontra ariko da eta Monroy II Daniel Carreraren kontra.