Untitled Document

Sagarrondotik jaialdian Fito & Fitipaldis, Reincidentes,
Su ta Gar eta Orishas taldeen kontzertua gaur
Gaueko 22:30etatik aurrera hasiko da Sagastialdeko karpa erraldoian. Bihar Ari, Kuraia, Ojos de Brujo eta Fermin Muguruza & Kontrabanda izango dira. Kontzertu egunerako takilarako 3.000 sarrera gorde dituzte.

SAgastialdeko karpan dena prest dago gaur eta bihar Sagarrondotik jaialdiko kontzertuetarako. Sagarrondotik jaialdia sagardoaren kultura bultzatzeko sortu zen iaz eta aurten ere barietate haundiko jaialdia antolatu dute. Gaur gaueko 22:30etatik aurrera Fito & Fitipaldis, Reincidentes, Su ta Gar eta Orishas taldeen kontzertuak izango dira eta bihar Ari, Kuraia, Ojos de Brujo eta Fermin Muguruza & Kontrabanda izango dira. Kontzertuen ondorengo festari jarraipena emateko DJ. Bela izango da.
Sagastialden 10.000 lagunentzako karpa dago eta gaur gauean bertara hurbiltzen direnek kontzertuetaz gain, oilasko erreak, bokatak eta sagardo kupelak ere izango dituzte.

Izen haundiko taldeak
Astebukaera honetan arrakasta haundia lortu duten taldeak izanago dira Hernanin. Fito & Fitipaldis taldeak, blues eta rockaren inguruko doinuak nahasten ditu bizitzari buruzko istorio xumeak kontatzen dituzten letrekin. Reincidentes taldea, 80. hamarkadan Sevillan sortutako punk-rock taldea da eta Euskal Herrian arrakasta haundia lortu dute. Gaurko kontzertuan Su ta Gar talde ezaguna ere izango da eta heavy eta metal doinuekin jarraitzaileen buruak astinduaraziko dituzte. Gaurko kontzertua bukatzeko Kubatik datorren Orishas taldea izango da, taldeak Kubako betiko doinuak raparekin nahasten ditu.
Biharko kontzertuan ere talde oso ezagunak bilduko dira. Ari rapera karibearra, Kuraia, Ojos de Brujo talde kataluniarra eta Fermin Muguruza & Kontrabanda izango dira. Fermin Muguruzak esana du aurten utziko dituela eszenatokiak eta baliteke Hernanikoa izatea emango duen azken kontzertuetako bat. Fermin Muguruzak 20 urteko musika ibilbidea jarriko du taula gainean.
Kontzertuetarako sarrerak Hernanin salgai daude tabernetan eta kontzertu egunetarako 3.000 sarrera egongo dira takilan. Donostitik Hernanirako autobusak ere izango dira orduerdiro.

Hernaniarrak herri kiroletan
Larunbaten Usurbilen herri arteko herri kirol txapelketa izango da 17:00etan Sagarrondotik festaren barruan. Hernani, Usurbil, Astigarraga eta Urnieta arituko dira nor baino nor. Hernaniko taldea hauek osatuko dute: trontzan, Jon Larrañaga; aizkoran, Baleri Aranburu; harri jasotzen, Aitor Barrenetxea; ingudearekin, Jexux Ezeiza; sagar biltzailea, Nagore Barrenetxea; zaku lasterketan, Gorka Ezeiza, Kepa Pikabea eta Iñaki Mendizabal eta txingetan, Gorka Ezeiza eta Joseba Maizkurrena. Hauekin batera ekipoan daude: Xabier Barrenetxea, Unai Erroizenea, Harkaitz Santa Kruz eta Mikel Iturbe.
Igandean, Astigarragan izango du jarraipena Sagarrondotik jaialdiak, bertan egingo den Euskal Herriko II. Sagardo Mostrarekin. Bertan 60 sagardogileren sagardoak dastatzeaz gain, Ttarla dantza taldea, eta bertsolariak izango dira: Colina, Mendiluze, Lujanbio eta Irazu.

Zuhaitz Eguna asteburuan

Asteburu honetan 1.000 zuhaitz landare aldatuko dituzte Aparrainen, 31garren Zuhaitz egunaren barruan. Aurten, Lizarra, gerezia, bertako haritza eta norteko haritza sartuko dituzte. Bihar umeak izango dira protagonista eta igandean helduak. Oinez joateko asmoa duenak 08:00etan du zita Gudarien plazan, eta Saratsaindik barrena joango dira.

Mutilen boleibol taldeak bihar hasiko du igoerako
Play-offa, Hernanin
Hernanik Gasteizko Berezi izango du kontrario, igoera faseko aurkaririk gogorrena. Eusebio Lizarazuren mutilak aurrena gelditu dira orain artekoan.

Mutilen boleibol taldeak datorren denboraldian Lehenengo mailan jokatu nahi du eta bihar hasiko du benetako borroka. EHU-Hernani, Trueba (Sestao), Berezi (Gasteiz) eta Errioxako Unibertsitateak joan-etorriko ligila jokatuko dute elkarren kontra. Sei partidu horien ondoren aurren-bigarren gelditzen direnek igoerako azken torneoa jokatuko dute eta hor Galiziarainoko beste ligatako irabazleak sartuko dira. Eta hor aurrena gelditu ezkero Hernanik Lehenengo mailan jokatuko du. Bide luzea eta gogorra izango da beraz bihar kiroldegian hasiko dutenak, orain arte nahiko erraz ibili badira ere. Eusebio Lizarazu entrenatzaileak dio orain ezin dela huts egin, dena oso partidu gutxitan jokatzen delako, baina, ekipoa gogoz eta prestatuta ikusten du fase honetarako. Azken partiduetan probak egiten eta zenbait jokalari erreserbatzen ere ibili dira jendea fresko egoteko.
Hernanik Gasteizko Berezi taldea izango bihar aurrean, orain artekoan bigarren gelditu dena. Partidua 17:30etan hasiko da.

Txomin Asteasuinzarra Gipuzkoako
arrantza txapeldun gaztetan
Txantxangorriko arrantzale gazteak ‘arratoi buztan’ modalitatean irabazi zuen.

Txomin Asteasuinzarra hernaniarra Gipuzkoako arrantza txapeldun gelditu da arratoi buztan modalitate zail eta ikusgarrian. Txantxangorriko arrantzalea izan zen txapelketan uzten zuten amorrai kupoa harrapatu zuen bakarra, zazpi denera. Asier Garayar da Txomin Asteasuinzarra gaztearen maisua eta bere hitzetan, modalitate horretan etorkizun haundiako arrantzalea da Asteasuinzarra.
Hemendik aurrera, Txomin Asteasuinzarra arrantzale gaztaren erronka izango da Leitzaranen jokatuko den Euskal Herriko txapelketan Espainiako txapelketarako sailkatzea.

Josetxo Zapiainek igandean hasiko du
Euskadiko Rallysprint txapelketa
Hernaniarra irabazteko kandidatoetakoa da.

Igandean hasiko da 2004ko Euskal Herriko Rallysprint txapelketa eta Joxetxo Zapiain hernaniarra da irabazteko faboritoetako bat. Zapiainek Renault MaxiMegane kotxe berria hartu zuen iaz eta bere helburua txapelketa honetan aurreko muturrean ibiltzea da.
Hernaniarrak Joseba Zapirain Astigarragako pilotoa izango du kontrario haundienetako bat bere Seat Ibiza KitCar-arekin, iazko Rallysprint txapelketako irabazlea hain zuzen ere. Beste piloto faborito batzuk: Joxe Labaka (Saxo KitCar), Luziano Arrabal eta Ramon Apalantza dira (biak Mitsubishi Carima Evo Vekin)
Euskal Herriko Rallysprint txapelketan 68 taldek eman dute izena. Gabiriako proban, 10:00etatik 12:00etara izango dira berifikazioak eta 15:00etatik aurrera hasiko da karrera, tramoari lau pasada emanez, bi alde batera eta bi bestera.