Elurrak Hernani txuritu du, eta gaur ere jasaren bat bota lezake ilunabar arte
Atzo arratsaldean ura moztuta egon zen herrian, itxuraz, eguraldiak eragindako arazoengatik. ‘Cuesta de la muerte’ eta herri barrua itxita egon ziren goizeko 08:30ak arte baina, hortik aurrera ez zen arazorik izan.

Hernani eta inguruak txuri-txuri jeiki ziren atzo, goizaldean izandako elur eta kazkabar erauntsiak medio. Goizeko 08:30ak arte itxita egon ziren herri barrua eta ‘Cuesta de la muerte’-ko aldapa, eta Donostira zijoazen autobusak Errekaldetik barrena ibili behar izan zuten, Aieterako bidea itxita zegoelako. Udaltzaingoak Kronikari jakin arazi dionez, langileak elurra kentzen eta gatza botatzen aritu ziren bideetan eta, 08:30etatik aurrera dena irikita zegoen.
Arratsaldean urik gabe gelditu ziren auzo batzuk, nonbait, eguraldiak eraginda sistema elektrikoak salto egin zuelako. Arazoa 15:00ak aldean hasi zen eta arratsaldeko 17:00etarako konponduta zegoen.
Gaurko emandako parteak dioenez, goizean elur jasaren bat izango da eta eguerdi partean elurbustia botako du. Arratsaldean euria izango da eta gauerako atertu egingo du. Bihar eguraldi hobea izango dugu. Gaur eta bihar 0 eta 4 gradu bitartean ibiliko da termometroa.

Arazoak Euskal Herriko bideetan
Elurrak eraginda, atzo Euskal Herriko errepide nagusiak itxita egon ziren kotxeentzat goizaldean eta kamioientzat egun guztian, eta autobus zerbitzu asko atzeratu ziren. Alerta egoerak jarraitzen du gaur ere.

---

“Ezker Abertzale sendo bat behar du momentu politikoak eta hauteskunde hauetatik indarturik ateratzea da helburua”
Salaberriak esan zuen ahaleginak egingo dituztela Ezker Abertzalea hauteskundetatik kentzeko, baina, hautesontziak bete egin behar direla autodeterminazioaren aldeko mezuz. Ekitaldia ostegunean izan zen Biterin.

Joan den ostegunean ekitaldia izan zen Biterin, Ezker Abertzaleak deituta, Espainari Ez, Autodeterminazioa lemarekin. Ekitaldian Jon Salaberriak hitz egin zuen eta bere hitzetan Euskal Herriari Bai esateko garaia da, autodeterminazioaren alde bozkatuta. Momentu politikoak Ezker Abertzale sendo bat behar duela nabarmendu zuen Salaberriak eta datozen hauteskundeetan indar berritzea dela helburu nagusia. Esan zuen Espainiako Gobernuari mezua bidali behar zaiola “ezin izango dutela Ezker Abertzalearekin bukatu” adierazteko. “Azken aldian ari dira esaten Ezker Abertzalea ahultzen ari dela. Guk badakigu hori ez dela egia, baina, erakutsi egin behar zaie Madrilgo Gobernuari eta Ezker Abertzalearen ilegalizaziotik kalkulu politikoa egiten duten guztiei” esan zuen. “Gezur honetara apuntatu diren guztiek ezkutatu nahi dute Ezker Abertzaleak 25 urteko borrokarekin lortutakoa, 25 urte geroago Moncloako esatutua gainditu egin baitugu. Konstatazio horren gainean dago Ezker Abertzalearen indarra” azpimarratu zuen Salaberriak.

Bergarako proposamena
Bergarako proposamenaren alde egiteko dei egin zuen Salaberriak eta “PNV, EA, Aralar eta sasi irtenbideetan murgildu nahi duten guztiei erakutsi behar zaie herritarrek soluzioak eskatzen dituztela” gaineratu zuen. Bergarako proposamenarekin bat egiten duten guztien izenean lan egingo dutela eta “autodeterminazioan oinarritzen diren irtenbide guztien izenean” joango direla datozen hauteskundeetara. Salaberriak esan zuen Ezker Abertzalea helburu hauen bueltan mugitzen ari dela eta hilaren 15etik aurrera ere mugitzen segiko duela.

Sektore desberdinak
Osteguneko ekitaldian herriko jendeak ere hartu zuen parte. Sektore desberdinetako jendeak irakurri zuen esaldi bat, bere sektore eta inguruari zegokiona eta txistulari, akordeoi jole eta dantzariak ere izan ziren. Ekitaldian bideo bat bota zuten, Ezker Abertzalearen ikuspuntua eta azterketa politikoa azaltzen duen bideoa.

 

 

Ezker Abertzaleak kontzentrazioak antolatu ditu “Euskal Herria aitortu eta errespetatzea” eskatzeko
Ezker Abertzaleak kontzentrazioak egitekoak ditu Euskal Herriko herri guztietan, hamabostean behin. Lehenengo kontzentrazioak datorren astelehenean izango dira eta lema dute: Espainiar eta frantziar inposaketarik ez. Euskal Herria aitortu, errespetatu. Hernanin Plazan da kontzentrazioa, 20:00etan. Antolatzaileek dei egin diote herritarrei kontzentraziora azaltzeko.
Egitasmoaren antolatzaileek jakitera eman dutenez kontzentrazioetako lema aldatzen joango da aldian aldiko egoeraren arabera eta Euskal Herriak eta Ezker Abertzaleak “jasaten duten zokoratze eta inposizioa” salatuko dituzte. Gai asko eta 3 errealitate nagusi salatuko dituzte kontzentrazioetan: “Ezker Abertzalea jasaten ari den Aparheida, Euskal Presoen egoera eta frantziar eta espainiar gobernuen inposaketa”. Lehenengo kontzentrazio honetan datozen hauteskundeak salatuko ditu Ezker Abertzaleak.


Musika Banda gaur Udaletxeko Arkupeetan
inauterietako piñata kontzertua emango du gaur, Hernaniko Musika Bandak, urtero bezala. 14 musika obra joko dituzte, Manuel Sagarnaren esanera, gaur, eguerdiko 13:00etan Udaletxeko Arkupeetan.


Osiñagako bidea itxita egongo da, asteartean
hernanitik Osiñagara dijoan bidea itxi egingo dute asteartean, Txurianeko zubi parean. Udala errioa garbitzen ari da azken uholdeak ezkero, eta asteartean Osiñaga aldean ariko dira lan horietan. Bidea 08:00ak aldera itxiko dute eta Lastaolatik ibili beharko dute auzotarrek.


Zuhaitz Eguna
Zuhaitz Eguna egingo da gaur, eguraldiak lagundu ezkero
Atzo eta gaur zen egitekoa Zuhaitz Eguna. Atzo suspenditu egin zen elurragatik eta gaur Aparraina joango diren edo ez, goizean erabakitzekoa dute arduradunek. Ordua 08:00etan dago jarrita Gudarien plazan.

Espeleologia
Hasiera ikastaroa
Espeleologian hasi nahi dutenek aukera izango dute apirilean egingo den ikastaroan apuntatzeko. Ikastaroa Felix Ugarte Espeleologia Elkarteko adituek emango dute, eta apirilaren 17-18ko asteburuan izango da. Izena emateko telefono honetara deitu behar da: 943 638176. Gehienez 10 lagunek hartu lezakete parte ikastaroan.

Ur-Ludoteka
Ur-ludoteka kiroldegian, gaur
Umeentzako ur-jolasak izango dira gaur kiroldegiko igerilekuan, goizeko 10:30etatik 12:30etara.

Futbola
Gorengoen ligan, Hernani-Berio gaur Zubipen
Hernanik Berio taldearen kontra jokatuko du gaur arratsaldean Zubipen. Hernani 19garren postuan dago sailkapenean eta gaurko partiduan 3 puntu lortzea oso garrantzitsua dute Jon Loranen mutilek. Partidua, gaur 16:30etan Zubipen.

Waterpoloa
Hernani-Easo gaur
Nesken Euskadiko Ligan, Hernanik Easo taldearen kontra jokatuko du gaur Hernaniko kiroldegian. Partidua gaur 13:00etan.

Boleibola
Hernani-Torrelavega gaur
Hernanik Torrelavega taldea hartuko du gaur kiroldegian, Nesken Lehenengo Liga Autonomikoan. Partidua gaur jokatuko da, 11:00etan, Hernaniko kiroldegian.

Saskibaloia
Hernanik galdu Atl. San Sebastianen kontra
Atzo jokatu zuen Hernaniko saskibaloi taldeak Atletiko San Sebastian taldearen kontra, eta 45-38 galdu zuen.

Rallysprint txapelketa
Suspenditu egin da gaurko jardunaldia
Gaur zen hastekoa Euskal Herriko Rallysprint txapelketa, baina, eguraldi txarra medio suspenditzea erabaki dute arduradunek. Gabiri-Legazpi bidea egitekoa zuten gaur parte hartzaileek eta horien artean zen, Hernaniko Josetxo Zapiain. Lagun-Artea elkartea da txapelketa hori antolatzen duena, eta gaur prentsa oharrean kaleratu duenez, datorren igandera atzeratu dute jardunaldia.