‘Bando
Punk’ fanzineak atera du ale berria
Publikazioak
Gipuzkoa mailan ‘Punk-Oi!’ musika mugimenduaren berri ematen
du. Entrebistak, erreportajeak, albisteak, umorea eta kritika daude
bertan. Fanzinea salgai, Txema, Goiz Argi eta Anboton.
BANDO
punk fanzinearen azkeneko alea kalean da. Fanzinea duela gutxi sortu
zuen Hernaniko hirukote batek bultzatuta. Batez ere, Gipuzkoako Punk-Oi!
musika taldeen eta punk mugimenduaren berri dakar. Hau da, Gipuzkoaldean
punk eta skin mugimendu antifaxisten inguruan dabilen musika mugimenduaren
berri ematen du. Aldizkariaren ‘0’ alea abendu bukaeran
aurkeztu zuten eta astebukaeran jarri dute salgai ale berria.
Fanzineko ale berri honetan irakurri daitezke Captain Nemo eta Jodete
musika taldeei egindako entrebistak, Londresi buruzko erreportaje bat,
kontzertuei buruzko iritziak eta aldizkaria egiten dutenek utzitako
beste hainbat kontu, euskeraz eta erderaz. Fanzinea salgai dago Txema,
Goiz Argi eta Anboto tabernetan eta euro bat kostatzen da. Hernaniz
gain, Gipuzkoako beste herri batzuetan ere banatzen da: Arrasate, Bergara
eta Eskoriatzan, besteak beste.
Beren
kabuz egina
Fanzine bat “zuk zeuk egindako aldizkari” gisa definitzen
du publikazioan lanean aritzen den Ibon Apezetxea Pepinok eta Bando
Punk fanzinea ere horrela sortua dela dio. Batez ere hiru lagunen artean
egiten dutela dio Pepinok: “gure gogoetak publikatzen ditugu,
egiten den guztia ateratzen da. Azken finean, inportanteena fanzinea
ateratzea da-eta”. Hiru lagun horiekin batera beste kolaboratzaile
batzuk ere aritzen dira fanzinerako edukiak eta maketazioa lantzen.
Bando Punk egiteko ez dute medio askorik eta Ibon Apezetxeak adierazitakoren
arabera ez dute xentimorik gastatzen: “etxean egingo bagenu bezala
da eta ahal dugun bezala egiten dugu. Gainera saiatzen gara hau dena
egiteko ez xentimorik gastatzen; dena benefizioa da” dio parrez.
Erantzunarekin
pozik
Salmentei begira ez dakite zenbat saldu duten abenduan atera zuten alearekin,
baina hori jakiten gehiegi ere ez direla kezkatu adierazi digu Apezetxeak:
“Ez dakigu zenbat saldu dugun, baina, konturatu gara jendeak fanzineari
buruz hitz egiten duela. Interneten badago Bando Punki buruzko gune
bat 120 bisita eta 20 iritzi jaso ditugu aurreneko alearekin”
dio.
Mugimendu
haundia
Ibon Apezetxeak dio garairik hoberenetakoa ari dela bizitzen Gipuzkoako
Punk-Oi! estiloko taldeen mugimendua. 80ko hamarkadan zegoen mugimendurekin
alderatuta, Apezetxeak dio orain musika talde, fanzine eta horrelako
gehiago dagoela baina, garai hartan adinako ilusiorik ez dagoela eta
orain sakabanatuago daudela dio eta horregatik egiten diren gauzak ez
direla ezagutzen.
Bukatzeko, Bando Punk fanzineraren egileak jendea animatu du burura
datozkion gauzak egitera: “jendeari esango nioke animatzeko, ez
lotsatzeko eta buruan dituen gauzak egiteko. Buruan daukazuna egitea
azkenean plazer bat da-eta”.
Hernanik
eta Astigarragak nahi dute Urumea garbitu eta bideratzeko obrak legegintzaldi
honetan bukatzea
Bi udalek eskerrak eman dizkie Foru Aldundia eta Eusko Jaurlaritzari
beren jokabideagatik. Hernanin 10 pertsonek eman dute Udaletxean beren
kalteen berri.
Hernani
eta Astigarragako Udalek uholdeak izan ezkerotik honuntza bitarteko
gestioen balorazioa egin dute elkarrekin. Bi udalen hitzetan, erriberetan
beti izaten da eta izango da uholdeak gertatzeko aukera. Hala ere, ziur
daude “ondorioak ahal denik eta txikienak izateko bitartekoak
jarriko direla”. Era berean, Joxan Rekondo eta Bixente Arrizabalagak
zuzentzen dituzten bi administrazioek uste dute Hernanitik Donostia
bitartean Urumea garbitu eta bideratzeko obrak urtebete barru hasiko
direla, eta bilatzen duten konpromisoa da legegintzaldi honetan bukatzea.
Udalen esanetan, erakunde arteko harremanen emaitzarik garrantzitsuena
izan da kalteak izan dituzteneei konponbide justua eman eta erreka garbitzeko
lanak azkartzeko Diputazioa eta Jaurlaritzak izan duten borondatea.
Udalek adierazi dute utarrilaren 24ko uholdeek nabarmen utzi zutela
horrelako egoera baten aurrean erakunde guztien arteko elkarlanaren
beharra. “Oraingoan, kalte materialak bakarrik eragin ditu, baina
ondorio okerragoak izan zitzakeen” dio prentsa komunikatuak.
Garbiketa
lanak Karabelgo zubian eta Landare parean
Uholdeen ondoren admistrazioek hartutako neurrien artean, Hernani eta
Astigarragako Udalek azpimarratu dute Jaurlaritzako Ur Departamendua
berehala hasiko dela Urumea garbitzen Karabelgo zubi ingurua eta Landaren.
Inguru horretan, izugarrizko zuhaitz eta hondar pilak daude. Ergobiko
zubian ere egingo dira garbiketak. Bestalde, Diputazioa aktibitate produktiboetan
Seguro Kontsortzioak emandako laguntzak osatzera konprometitu da. Jaurlaritzak
ere laguntzak emango ditu kreditu bigunak eman eta horien interesak
subentzionatuta. Joxan Rekondo eta Bixente Arrizabalagak zuzentzen dituzten
udalek eskerrak eman dizkiete Diputazio eta Jaurlaritzari beren jarrera
ona eta neurriak azkar hartzeagik.
Zentzu horretan, Hernanin hamar bat kalte-erreklamazio bildu dira Udaltzaingoan,
Udalak egindako eskerari erantzunda. Horietatik 3 garaje eta bajeran
izandako kaleengatik eta gainerakoak baratza eta belazeetan izandakoengatik.
Madrilgo
gobernuari deia
Kostaldeetako konpetentzia Madrilgo gobernuarena da eta Hernani eta
Astigarragako Udalek eskatu diote elkarlanera biltzeko, Urumean egin
beharreko lanetan.
Jaialdi
multikulturala gaur arratsaldean
AMHER
elkarteak jatorri eta kultura ezberdinak bildu nahi ditu gaur Plaza
Berrian egingo den jaialdian. Ekitaldiak 16:30etan hasiko dira: Andeetako
musika talde bat ez ezik, Ttarla dantza taldeko dantzariak, txistulariak
eta trikitilariak ere arituko dira jaialdia girotzen. Ume jolasak ere
izango dira eta ikastetxeetan ikasleek inmigrazioari buruz egindako
zenbait lan ere bai.
AMHER elkarteak aurrera begira dituen helburu eta orain arteko lanaren
berri ere azalduko du arratsaldeko ekitaldian.