‘Lur’
enpresak Hernanirako bidegorri sarea proposatu dio Udalari, bizikletan
ibiltzeko 5.590 metrorekin
Udalak
tramoka egiteko asmoa du bidegorri sarea, obra bakoitzean inguruari
dagokion partea kontuan hartuta. Proposamenak aldaketak izan litzazke,
tokian tokiko obra eta proiektuak errespetatzeko.
Hernaniko
Udalak bidegorri sare bat sortzeko asmoa du Hernanin jendea bizikletan
ibiltzeko, eta Lur enpresak proposamen bat egin du, bost kilometro eta
erdi pasa dituena. Bost partetan banatua dago proposamena: lehen zatia
Antziola eta Latsunbe artekoa da, bide berrian; bigarrena, Latsunbe,
Zinkoenea, Florida eta Antziola artekoa; hirugarrena, Ave Maria parkekoa;
laugarrena, Latsunbe, Urbieta eta Zin-koenea artekoa; eta bosgarrena,
Florida, Ibaiondo poligonoa, Zikuñaga eta Zinko-enea artekoa.
Zatika
egingo da
Andoni Amonarraiz Udaleko Zerbitzuetako zinegotziaren hitzetan zatika
egingo da Hernaniko bidegorri sarea, tokian tokiko proiektuak egiterako
orduan kontuan hartuta, egiten diren beste obrekin batera gauzatzeko.
Proposamen honek aldaketak izan litzazke hala ere, tokian tokiko proiektuek
hala eskatzen badute edo beste ibilbide batzuei egokiago irizten bazaie.
Latsunbe-Antziola
Bidegorri sareko lehen zatiaren proiektua egina dago dagoeneko eta Latsunbe
eta Antziola elkartuko dituen saihesbide berriaren ondoan joango da.
Guztira 375 metro ditu luzeran eta 198.900 euro inguruko aurrekontua
du, Lur enpresaren proposamenean azaltzen denez.
Proposamenak 5.590 metro ditu eta kostua guztira 1.670.000 eurokoa izango
da proposamenaren arabera, 278 miloi pezeta.
Proposamena
fasez-fase
1) Antziola-Latsunbe: Dagoeneko proiektatua dago
eta Antziola eta Latsunbe elkartzen dituen bide berriaren ondotik
dijoa. Distantzia 375 metro. Kostua: 198.900 euro.
2) Latsunbe-Zinkoenea-Florida-Antziola: Latsunbetik
Antziolarako bidea izango litzateke, Zinkoeneatik, Mañe
y Flaquerretik, Floridatik eta Sagastialdetik barrena. Distantzia:
2.200 metro. Kostua: 583.000 euro.
3) Ave Maria Parkea: Etorkizunean Udal parkea
izango da Ave Mariakoa eta Latsunbe Berri kalea eta bideko bidegorriak
elkartuko dituen zatia parketik joango litzateke. Distantzia:
600 metro. Kostua: 159.000 euro.
4) Latsunbe-Urbieta-Zinkoenea: Ertzaintza pareko
rotondatik Zinkoeneara joango litzateke bidegorria, Urbieta kalean
berrena. Distantzia: 750 metro. Kostua: 198.750 euro.
5) Florida-Ibaiondo-Zikuñaga-Zinkoenea:
Zikuñagatik, Floridatik eta Zinkoeneatik Ibaiondo eta Akerregi
poligonoetara joango litzateke. Distantzia: 2.000 metro. Kostua:
530.000 euro. |
Igeriketa
Olatz Altuna Gipuzkoako selekzioak deitu du Euskal Herriko txapelketan
parte hartzeko
Gaur
eta bihar dira Euskal Herriko lurralde arteko txapelketak Santurtzin
eta Gipuzkoa, Bizkaia, Araba eta Nafarroak hartuko dute parte.
Olatz Altuna igerilari hernaniarrak Gipuzkoako selekzioarekin parte
hartuko du Euskal Herriko lurralde arteko Txapelketan. Gipuzkoa, Bizkaia,
Araba eta Nafarroak hartuko dute parte txapelketan, gaur eta bihar Santurtzin.
Hernaniarrak denboraldi ona egin du orain artekoan eta horri eskerrak
deitu du Gipuzkoako selekzioak.
Egindako marken artean, Espainiako txapelketarako minima egin du 50
metro libretan aurtengo denboraldian. Martxoaren 3tik 7ra jokatuko da
Espainiako Txapelketa eta igerilari hernaniarra bertan izango da.
Kutxa
Trofeoa
Hernaniko taldeko 33 igerilarik Kutxa trofeoko kanporaketak dituzte
gaur Zarautzen. Hernani ondo dabil talde moduan aurten eta helburua
torneoko finalera sailkatzea dute.
Hernaniko inauterien historia eta bizi izan dituztenen testigantzak
‘Hernaniko Inauteriak oroituz’ lana egin dutenek historiaren
zati hori bildu beharraren garrantzia azpimarratu dute.
Ostegun
gizen egunean, Hernaniko Inauteriak oroituz liburua aurkeztu zuten Biterin,
Inauteriak berriz egiten hasi direneko 25garren urteurrenean. Lana herriko
inauteriekin lotura izan duten pertsona talde batek egin du, beste zenbait
pertsona eta talderen laguntzaz. Lanak Hernaniko inauterien historia
biltzen du, gerraurreko jaia ezagutu zutenen testigantza eta azken 25
urteetan parte hartu dutenen esperientzia eta argazkiak. Xabier Iriarte
eta Eulali Aranburuk aberastasun hori bildu beharraren garrantzia azpimarratu
zuten, eta eskerrak eman zizkieten parte hartu zuten guztiei.
XVIIgarren mendetik datuak
Xabier Iriartek azaldu duenez, Hernaniko Inauterien aipamena egiten
duen dokumentu zaharrena 1653 garren urtekoa da. XIXgarren mendean hartu
zuten indar haundia eta inauterietako jai batzordea osatu zen. Gazte
koadrilak, konpartsak eta abar indarra hartu zuten eta hor osatu zen
gerra garai arte izaten zen festa modua. 1936an izan ziren azken Inauteriak
Hernanin, erregimen berriak galerazi egin baitzituen. Urumea bailaran
ordea, mozorro festa egiten jarraitu zuten 1960ko hamarkada arte.
1979an berriz ere inauteriak modu ofizialean hasi ziren Hernanin, gaur
ezagutzen ditugun moduan. Udaletxeko kultura sailaren babesa duen argitalpenak
25 urte hauetako protagonista izan diren zenbait konpartsa, koadrila
eta pertsonen bizipenak bildu ditu, eta argazki bilduma ederra ere bai.
Hernaniko Inauteriak oroituz, liburudendetan dago.