Untitled Document

Villa Politena eta Ave Mariako konpentsazio proiektuak onartu ditu Gobernu Batzarrak
Villa Politenan 54 etxebizitza dituzte egitekoak eta Ave Marian 32 etxebizitza.

Gobernu Batzarra bildu zen atzo Udaletxean eta Villa Politenan eta Ave Marian egin beharreko lanen konpentsazio proiektuak onartu zituzten. Politenan (Floridan, Etxeberriko frontoi ondoan) 54 etxebizitza dituzte egitekoak. 3 bloke izango dira 18na pisukoak eta bloke oso bat babes ofizialeko etxeak izango dira, alegia 18. Etxeak Politena villa atzeko baratzetan egingo dituzte eta villa bera eta inguruko lorategia Udalaren esku geldituko dira. Villa Ave Marian, berriz, 32 etxebizitza dituzte egitekoak, guardaren etxea dagoen horretan. Guardaren etxe txikia bota eta bloke bat egingo dute, 32 bizitzekin. Villa bera eta lorategiak Udalaren eskuetan geldituko dira hemen ere. Konpentsazio proiektuak onartuta proeiktuak berak aukeztu beharko dituzte orain Udaletxean.
Atzoko Gobernu Batzarrak beste lau gai ere erabaki zituen: bi lizentzia eskaera, San Joanetako kontuen likidazioa eta Biteriko ikastaroetako eta haur tailerretako egitarauen ingurukoa.

'Kabuki’-ren lanen arrakasta Bilbon
Ongintza Patronatuak onartu du Hernaniko gazte koadrila batek egindako eskaria. Tip-Top enpresari adjudikatu zaio obra eta urte bukaerarako egina egon liteke skate pista berria.

‘Modorra’ pasarela edo ibiltokian diseinatzaileen erropa desfilea eta bigarren eskuko erroparena egin berri dute Bilbon, irailaren 24 eta 26an, Suelen.org kultur elkarteak antolatuta. Patxi Urrestarazu Aizpurua, Kabuki, hernaniarraren lanek arrakasta haundia izan dute eta bera ere oso gustora dago Kronikari esan dionez: “Ez nuen horrenbesteko arrakastarik espero. Pasea egin nuenean jende asko inguratu zen, zahar eta gazte, hasi gazteenetatik eta aiton-amonak ere inguratu ziren”. Bere iritziz onena da Bilbon bere izena entzun dela eta zorionak eman dizkiola pasera inguratutako jende askok, eta baliteke horrek ateren batzuk irekitzea. Kabukik neurrira egiten du arropa enkarguz, eta orain berriz ere lanari ekin beharko dio, Bilboko pasea bukatuta, Ziku-zulon, Zikuñaga auzoko lokalean.
Pasarela, Bilboko Erriberako azokan antolatu dute eta diseinatzaile berriek izan dute beren tartea. Aniztasuna bultzatzea izan da helburuetako bat, antolatzaileek zenbait komunikabideei esan diotenez, eta baita sortzaile gazteen lanak azaltzea ere. Desfilean ateratako modeloak ez dira profesionalak izan, eta horrek garrantzia berezia izan du. Kabuki esaterako bera atera da desfilean, berak diseinatutako arroparekin. Hernaniarrarekin batean, Euskal Herriko eta Euskal Herriz kanpoko 60 diseinatzailek hartu dute parte eta orokorrean arrakasta haundia izan du ekimenak, bere bigarren aldi honetan. Hitzaldi, eztabaida, musika emanaldi eta abar luze bat ere izan dira desfileaz gain.

Josu Jon Imaz eta Joseba Egibar Hernanin batzokiaren 10garren urteurrena ospatzeko
Hernaniko Batzokiaren 10garren urteurrenean batzokia eta alderdiaren iraganaz eta etorkizunaz hitz egin zuten.

Hernaniko Batzokiak 10 urte bete zituen herenegun eta bertara gonbidatu zituzten Josu Jon Imaz, EBBeko Lehendakaria, eta Joseba Egibar, GBBko Lehendakaria. Arratsaldeko 19:00ak aldera Batzokian bildu ziren eta hitz batzuk egin zituzten, batzokia eta partiduaren iragana gogoratuz eta etorkizunerako apustuei buruz. Ekitaldiari hasiera Joxe Ramon Lasartek eman zion, EAJ-PNVko kideak. Lasartek aurretik egondako lehendakariak gogoratu zituen, Patxi Odriozola eta Andoni Otaegi. Horrekin batera zoriondu zuen Hernaniko Udaletxean lanean ari den EAJ-PNVko taldea, EArekin koalizioan dagoena, “talde gaztea da eta lan ona egiten ari da” adierazi zuen.

Iturri zaharra baina ur berria
Joseba Egibarrek hitz egin zuen segidan eta azaldu zuen EAJ-PNV alderdia iturri zaharra dela, 109 urte daramazki eta martxan, baina ura beti berria dakarrela. Partiduaren lekukoa belaunaldiz belaunaldi pasa dela azaldu zuen eta horri esker izan dutela aukera orain dauden lekuan egoteko. Momentu zailenetan ere alderdiko sugarra mantendu egin dela aipatu zuen Egibarrek: “77 eta 78an, diktadura bukatu zenean, batzuek uste zuten alderdia bere amaierara iritsi zela baina proiektu bat atera zen norabide egokian, etorkizunera begiratzen zuena”. Proiektu horrek bere alde onak eta bere hutsuneak ere badituela azaldu zuen Egibarrek.
Etorkizunari buruz esan zuen, Euskal Herriaren aitortza erabakitzeko eskubidea eta autodeterminazioa defendatuko dutela eta momentu honetan proiektu bat ari direla osatzen, Legebiltzarrean eztabaidatzen ari direna. Esan zuen EAJ-PNVek herriaren babes zabala duela eta borondate hau ezin dela legez edo indarrez isildu. Ezker Abertzaleari buruz esan zuen hau dela beraiek aldarrikatzen ari ziren momentua eta orain momentua iritsita, ezin dutela esan ez dela une egokia.
Hemendik urte eta erdira Hernanin, beste herrietan bezala, herri kontsulta prestatzen ari diren komiteak egotea espero duela adierazi zuen Egibarrek, auzoz-auzo lanean arituko dena kontsultatu beharreko proiektu horri herriaren gehiengoak baietza eman diezaion.

Autogobernu proiektua
Josu Jon Imazek adierazi zuen orain oso normalak iruditzen zaizkigun gauzak ez zeudela garai batean. Horren adibide bezala aipatu zituen: telebista eta irratia euskeraz eta haurrak euskeraz hezitzea. Egoera ekonomikoak ere hobera egin duela aipatu zuen Imazek, eta Hernaniko kasuan aipatu zuen Orbegozoren itxierak ekarri zuen egoerari ere buelta izugarria eman zaiola, euskal gizarte eta instituzioei esker.
Estatutoari buruz esan zuen ez dela bete adostutakoa eta euskal gizartearen gehiengoak ezetza eman ziola egungo konstituzioari. Orain apustu berria egiteko garaia iritsi dela adierazi zuen: “egungo gizarteak behar duen autogobernua lortu nahi dugu: eremu ekonomikoan, gizarte segurantzan, herri eta nazio bezala Europan parte hartu eta erabakitzean”.
PSOEri buruz esan zuen oinarrian PPren ideia berdinak defendatzen dituela eta oztopo izango direla bidean. Ezker Abertzalea ere oztopo izango dela adierazi zuen, baina, EAJk botu aldetik gizartean babes zabala izango duela esan zuen eta aurrera egin behar dutela ere bai.
EAJ-EA koalizioari buruz esan zuen gizartearentzat ilusionantea dela eta beren onena eman behar dutela.