‘Urban’-en
gol dotoreak eman zion garaipena Hernaniri
90garren minutuan sartu zuen Oskar Urbanok gola faltaz, partidua
0-0 bukatuko zela zirudienean. Partidu gogorra izan zen Hernani eta
Idiazabalen artekoa, falta eta txartel askokoa.
Hernani
partidu guztian ibili zen garaipena emango zion golaren bila eta merezi
izan zuen 3 puntuak lortzea. Gola, ordea, ez zen 90garren minutura
arte etorri eta jokalari eta zaleek sufritu egin behar izan zuten
partidu guztian zehar. Hori bai, gola dotorea izan zen: bigarren zatiko
45garren minutuan falta egin zioten Hernaniko jokalari bati areatik
10 bat metrora eta Oskar Urbanok dotore bota zuen golera, Idiazabalgo
porteroa erdiraketaren zai zegoela aprobetxatuta. Garaipenak goiko
postuetan uzten dute Hernani, eta Idiazabal, aurkari zuzena, 3 puntutara.
Partidu
gogorra
Idiazabalek talde gogorra dela erakutsi zuen atzo eta partidua zikin
xamarra ere izan zen zenbait jokalditan. Erregional mailan arbitro
bakarra izaten da linierrik gabe eta ikusten ez duen jokaldi asko
gertatu liteke zelaian. Txartel ugari ikusi zituzten Hernani eta Idiazabalgo
taldeek eta goierriarrek 10 jokalarirekin bukatu zuten partidua.
Zubipen
berriro
Bost jardunaldi itxaron behar izan ditu Hernanik berriro ere Zubipen
jokatzeko, eta atzo nabaritu zen afizioaren beroa. Belar artifiziala
oraindik berri xamarra dago eta kautxoa ondo hartu gabe dauka lurrak,
eta horregatik zelaia normalean baino labainagoa zegoen. Puntuan jartzeko
pare bat hilabete beharko dira, eta ea puska batean uholderik ez dagoen.
Sagastiyako
plan partziala aurreko legealdiko Udal arduradunek “4 urtean
paralizatuta” eduki zutela erantzun dio Udalak BHri
Hasiera batean 600 pisu zirenak 364 izatera aurreko legegintzaldian
egindako hitzarmeneko “retokeei” eskerrak pasa zirela
ere badio Udalak.
Iñaki
Arratibel Hirigintza Zinegotziak erantzun dio BHri Kronikara bidalitako
prentsa ohar batean. Arratibelek dio balorea behar dela Udal gobernua
4 hilabete atzeratu izana salatzeko, “lehengo udal arduradunek
gaia 4 urtean paralizatua eduki zutenean”. Arratibelek dio BHk
arrazoi duela dioenean Sagastiyako konbenioaren gestioa Joxan Rekondo
buru zen legegintzaldian hasi zela eta gaineratzen du “HB alkatetzara
iristean legegintzaldi guztia pasa zuen hitzarmena retokatzen”.
600etik
364ra
Prentsa oharrak dio: “hitzarmenari egin zioten retoke izugarria
600 etxetatik 364era pasatzea izan zen. Gainera, renuntziatu egin
zuten Udalari zegokion % 10eko aprobetxamendu urbanistikora, guk etxe
parke bat lortu eta Ongintza Patronatuaren esku jartzeko asmoa genuenean,
urgentziazko beharrak betetzeko. Eta hori gutxi balitz 600 bizitza
horietan prioridadea hernanaiarrei emateko konpromezua zena, 364 etxeren
erdia bihurtu zuten hernaniarrentzat, 182”.
Bukatzeko,
Arratibelek dio BHri min ematen diona dela “egin diren babes
ofizialeko ia etxe guztiak gainerako alderdien iniziatibaz egin direla,
eta min ematen dio baita ere gainerako zinegotziek babestutako etxeetara
ez apuntatzeko dezentzia izan dutela, bere promozio bakarretakoan
gertatu ez dena, Ereñotzun, BHko zinegotzi batek etxea lortu
baitzuen”.
Inmaculadak
dio beren ikastetxeari buruz urtero ateratzen diren esamesak funtsik
gabeak direla
Ikastetxeko zuzendaritzak eta irakasleek idatzi dute prentsa oharra.
Inmaculada
ikastetxeko hezkuntza komunitateak prentsa oharra bidali du Hernaniko
Kronikara, “urteak joan eta urteak etorri beti izaten delako
esamesen bat gure zentroari buruz. Ikastola ez garen aldetik edo,
agidanez badugu herrian gureganako joera negatiboren edo legenda beltzen
bat”.
Inmaculadak dio ez dakitela nondik sortzen diren esames hauek, eta
argi utzi du “funtsik gabekoak” direla. “Gure zentroa
pribatua eta kontzertatua da -dio prentsa oharrak- gestio pribatukoa
baina Eusko Jaurlaritzarekin hitzartutako ikasketak ematen dituena.
Haur Eskola, Haur Hezkuntza, Lehen Hezkuntza, Bigarren Hezkuntza eta
Erizain Laguntzailetarako Lanbide Heziketa Zikloa ditugu”. Irakasleak
euskaldunak eta gehienak hernaniarrak direla ere argi utzi nahi izan
du Inmaculadako hezkuntza komunitateak.
D
eta B ereduak
Inmaculadak dio oraindik badela herrian klaseak erdera hutsean ematen
direla uste duenik eta argitu dute “Haur eta Lehen hezkuntzan
D eredua daukagula (euskara hutsean) eta Bigarren Hezkuntzan, berriz,
B eredua (euskara eta gaztelania nahastuta). Dena den gure ikasle
askok D ereduan jarraitzen dituzte beraien ikasketak gure ikastetxetik
kanpo, hauen euskara mailaren adierazgarri”.
Euskal Herrira eta beren ikastetxera atzerritar asko joaten dela ere
badio idatziak eta hauentzako erdera eta euskera indartzeko baliabide
bereziak prestatzen dituztela Lasarteko PATaren laguntzaz “eta
baita euskara hutseko klaseetan integratzea lortu ere”. Horrez
gain, Inmaculadak dio ikastetxea ijitoz beterik dagoela aurretik esan
izan dela eta ijitoak Hernaniko beste edozein ikastetxetan bezala
badaudela “legez, gainontzekoek bezalaxe eskolaratuak izateko
eskubidea baitute”.
Bukatzeko diote orain artean bezala lanean segiko dutela, eta begirunea
eskatu dute beren lanarekiko. Informazio gehiago nahi duenak ikastetxeko
ateak irekita dituela ere esan dute.