Untitled Document

Sta Barbarako auzotarrek Udalari eskatu diote neurriak hartzeko harrobi azpikaldean dagoen kanpamenduaren inguruan
Auzotarren esanetan, ez da onartzekoa inguru hori dagoen bezala egotea, eta egiten diren gauzak egitea. Udalak espediente bat martxan du, baina terrenoa partikularra da. Arazoak 10 urtetik gora daramazki

Santa Barbarako auzotarrak Plenoan izan ziren ostegunean eta Udalari eskatu diote neurriak hartzeko harrobia azpikaldean dagoen kanpamenduarekin. Leku hori harrobiko sarrerarako aldapa hartu eskubira dago, zelaiune zabal horretan. Pertsona talde bat bizi da hor, karabana eta txaboletan. Auzotarren esanetan, ezin da onartu hori dagoen bezala egoterik, eta Udalari eskatu diote zerbait egiteko, edo dagokionari egin arazteko. Auzotarren esanetan, 10 urte daramazkite gauza hori eskatzen, informeak egin dituzte Udaltzaingorako eta zinegotziak bertara eraman ere egin dituzte leku hura nola dagoen eta zer egiten den ikustera.

Erantzuna bidean
Andoni Amonarraiz Zerbitzuetako zinegotziak azaldu zuen keja horren berri izan bezain pronto espediente bat zabaldu zela eta tramitean dagoela. Zelaiune hori harrobia esplotatu zuen enpresarena da eta ez Udalarena eta horregatik ezin du zuzenean erabakirik hartu. Amonarraizen hitzetan, zabaldutako espedienteak ekarriko du jabeari dagokion ardura hartu araztea leku hori baldintza egokietan edukitzeko.
Auzotarrek adierazi zutenez, azken aldian kanpamendua behetik Santa Barbarako harrobira eramaten ari dira.
Jose Perez PSE-EEko zinegotziak ere arazoa konpontzeko eskatu zuen.

Lehiaketa, hutsik
Santa Bararako auzotarren eskaria harrobiaren puntua eztabaidatzen ari zirela sortu zen. Santa Barbara osoa berrituko duen lehiaketa hutsik gelditu zen zeuden proposamenak gehiegi urrutiratzen zirelako orain dela urte batzuk Santa Barbara egokitzeko egindako planetik. Rekondoren esanetan, Udalak gai horrekin lanean segiko du eta aurreratu zuen partida bat izan litekeela aurten proiektu bat egiteko, beti ere aisialdi eta natur gune gisa.

Udal Aurrekontuak otsailean eztabaidatuko dituzte

Joxan Rekondok osteguenko Plenoan adierazi zuen Udal Aurrekontuen zirriborroa egina daukala Gobernuak. Alkateak espero du hilaren azkenerako Gobernuak lege proiektu bezala onartu eta alderdiei aurkeztea, enmiendak egin eta eztabaidatzeko. Pedro Gandasegi PPko zinegotziak eskatu zizkion Alkateari aurrekontuei buruzko argibide horiek. Beste gai bati dagokionez, Alderdi Sozialistak hilerria haunditzeko proiektua nola dijoan galdetu zuen Plenoan. Rekondoren hitzetan, Gobernuak sondeoa egin berri du jendeak ze eskaera duen ikusteko eta 20 eskaera jaso ditu panteoiak egiteko. Proiektuan 100 panteoi dijoaz. Desfase hori ikusita, eta horrek finatziazioan ekar litzakeen desoreka kontuan hartuta, Gobernuak sondeo berri bat egingo du, eta emaitzak antzekoak badira, proiektu osoa aldatzeko aukera planteatu zuen Rekondok. Gaur egunean hilerrian oso leku gutxi dago, eta bi urtetan erabat beteko da.
Enlazearen azken proiektua iristeko zorian
Oposizioaren eskariz, Gobernuak beste zerbait argibide ere eman zituen. Adibidez, Antziola-Latsunbe enlazearen azken proiektua bi aste barru egongo da, eta Añarbek hor ari dituen lanak bukatzean hasiko dira obra.

Kloroa neurtzeko makina Electroquímican

Eusko Jaurlaritzako Ingurugiro Sailak jakitera eman du aireko kloro kopurua neurtzeko makina jarriko duela gutxi baino lehen Epelen, Electroquímica enpresa ondoan. Asteazkeneko isuriaren ondoren eman du jakitera erabakia Ingurugiro Sailak. Bestalde, Añarbeko Mankomunitateak jakin arazi du isuriak ez diola saneamentu sistemari eragin.
Bestalde, Eusko Jaurlaritzako Industria Sailak zigor espedientea irekiko dio Electroquímica enpresari, arrisku haundiko istripuen inguruko dokumentazioa ez aurkezteagatik, baina, Industria Sailak jakitera eman du erabaki honek ez duela azken istripuarekin zerikusik. Eusko Jaurlaritzak mantenimentuko plan integrala eta istripu larrien arriskua ekiditeko plana eskatu dizkio Electroquimicari eta bigarren hau hilabeteko epean entregatu ez diolako irekiko dio zigor espedientea. Industria Sailak jakin arazi du “jarraipen zehatza” egingo diola enpresaren planari, kloro emisio gehiago ez gertatzeko.
M.A.A istripuan zauritutako langileak hobera egin du, baina, medikuek obserbazioan edukitzea erabaki badute erreduren larritasuna eta tamaina ikusteko.

Erremonteko Binakako finala gaur

Ezkurra-Olazar eta Zeberio-Auzmendik binakako txapelketako finala jokatuko dute gaur Galarretan. Olazar eta Auzmendik aurreneko finala dute, eta Ezkurra-Olazarren kasuan osaba-ilobak osatuko dute bikotea. Ez dago txapela irabazteko faborito garbirik eta, eta zentzu horretan oso final irekia izango da. Partidua 17:00etan da eta ETBk zuzenean botako du. Gaurko jaialdian beste hiru partidu ere izango dira, 16:00etan hasita: Uterga-Gaztelu/Matxin IV/Aizpurua II; Altuna II-Iriarte/Bereziartua-Lizaso; eta Iribarren-Urko/Sarasua-Badiola.