Errugbia -Lehen Maila
Hernanik hasiera hasieratik hartu zion atzo neurria Bilboko taldeari eta erakustaldia eman zuen Landaren
Bilbotarrak 0-3 irabazten hasi ziren, baina, Hernanik azkar eman zion buelta partiduari hiru entsaio ia jarraian eginda. Hernani eta Durango gelditu dira mailaz igotzeko lehen posturako borrokan.

Hernani 40 UPV Bilbao 3 Hernaniko jokalariak: Gorka Sarasola, Boli Seco, Xente Olano, Illarramendi, Intxausti, Otaño, Apezetxea, Lamayson, Hodei Holgado, Gurutz San Migel, Pintado, Xarobe, Ibai, Ibon / Aldaketak: Txetos Azurmendi, Harkaitz, Borja Leon, Migel Madzyk, Manex Casado, Urko Arruabarrena, Mikel Ezenarro. Hernaniko entsaioak: Gorka Sarasolak 2, Aitzolek 1, Ibaiek 1, Apezetxeak 1 eta Urkok 1. Transformazioak: Ibonek 5. Bilbotarren zigor transformazioa: Xabik 1.

 

 

 

 

Maila ona eman zuen atzo Hernaniko errugbi taldeak, Gabonetako oporren ondorengo lehen partiduan. Bilbok partidu gogorra eta zikina planteatuko zuela jakina zen, baina, Hernaniarrek berea egin zuten eta ez zuten lan gehiegirik izan bizkaitarrak menperatzeko. Aipatzekoak dira hernaniarrek linean egindako zenbait jokaldi eta delanteroen arteko apoioak atzoko partiduan. Taldeko arduradunek Kronikari esan diotenez akatsak ere izan ziren partiduan, baina, gustora zeuden taldeak erakutsitako mailarekin eta lortutako emaitzarekin.

Entsaio ederra
Sei entsaio egin zituen atzo Hernanik eta bigarren zatian egindako bat ikusgarria izan zen. Aitzol Larrañagak zelai erdia egin zuen baloiarekin eta ezin izan zuten bota. Kontra hankean harrapatu zuen Bilboko jokalari bat barrura eta kanpora kiñu eginda eta hurrengoari pasatzeko imintzioa egin, gelditu eta berriz ere korrika ekin zion, eta entsaio dotorea lortu zuen.

Lehen postua jokoan
Sailkapenean lehenengo gelditzen dena igoko da aurten mailaz eta bigarren gelditzen denak igoera fasea jokatu beharko du. Oraingoz Hernani eta Durango dira lehen posturako borrokan gelditu direnak, gainerakoak puntu askotara baitaude.

---

Alzheimerra eta bestelako gaitz kognitiboen
inguruko formazio kurtsoa emango da Hernanin
Urtarrilaren 19, 20, 21, 26 eta 27an da kurtsoa, arratsaldeko 16:00etatik 19:00etara, Biteri kultur etxean. Kurtsoa debalde da eta izena emateko deitu 943 474182 (Marian Goenaga eta Ana Agirre).

Hurrengo astelehenean hasita alzheimerra eta antzeko gaitz kognitiboak dituen jendearekin ibili behar dutenentzako kurtsoa emango dute Hernanin, Lahar elkargoak antolatuta eta Gizalde planetik diruz lagunduta. Formazio kurtsoak zuzenduta daude Gipuzkoako entitate desberdinetan parte hartzen duen jendeari, boluntarioei, zuzendariei eta abar. Kurtsoan nahi duenak hartu lezake parte eta horretarako Lahar elkartera deitu behar da. 943 474182 telefonora deitu eta Marian Goenaga edo Ana Agirreren galdera egin. Kurtsoa debalde izango da eta eskatzen dena da izena ematen duenak kurtso guztian azaltzeko konpromezua hartzea.
Kurtsoa gaur zortzi hasi eta urtarrilaren 27an bukatuko da. Arratsaldetan izango da, 16:00etatik 19:00etara.

---

Hernani, Urnieta eta Usurbilgo pelota elkarteek klub arteko pelota txapelketa antolatu dute 24 talderekin
Gipuzkoako 11 talde daude, 7 Bizkaikoak, 5 nafarrak eta 1 arabarra. Kadete, jubenil eta afizionatuek jokatuko dute eta tanto gehien egiten dituena pasako da aurrera.

Hernani, Urnieta eta Usurbilgo Pelota Elkarteek antolatuta klub arteko txapelketa jokatuko da hiru herri horietako frontoietan. Guztira Euskal Herriko 24 klubek hartuko dute parte eta kanporaketaka joango da txapelketa. Kadete, jubenil eta afizionatu mailako partiduak izango dira eta hiru partiduetan tanto gehien egiten dituen taldea pasako da aurrera. Alegia, hiru partidutik bi galduta ere aurrera pasa liteke talde bat, tanto gehiago egin baditu.
Herri arteko txapelketaren antza badu txapelketa honek, baina, herrika jokatu beharrean klubeka jokatuko da. Gainera klub bakoitzak 2 fitxaketa egiteko aukera izango du kanporaketa bakoitzean: hau da, parte hartu behar duten 6 pelotarietatik 2 izan litezke beste klub batekoak.

Hernanik egutegi zaila
Txapelketa urtarrilaren 16an hasiko da Hernaniko frontoia eta Leitza eta Ortuellako taldeak neurtuko dituzte indarrak, gaueko 22:00etatik aurrera. Hernaniko taldeak otsailaren 22an jokatuko du Intxaurrondoren kontrako kanporaketa. Kanporaketa zail hau pasatzea lortzen badu Azkoitiaren kontra jokatzea tokatuko zaio seguruenera Hernaniri eta ez da kontrario samurra hau ere. Txapelketako finala apirilaren 4an izango da.

---

Hernani Institutuak langileentzako ikastaroak antolatu ditu
Mekanika eta elektrizitate-elektronika ikastaroak dira. Astelehenetik ostegunera 17:30-20:30etara.

Hernani Institutuak langileentzako birziklatze ikastaroak antolatu ditu eta 13 ikastaroetan apuntatzeko tokia badago oraindik. Ikastaroak astelehenetik ostegunera dira 17:30etatik 20:30etara eta maiatzera arte iraungo dute. Bi arlotako ikastaroak dira: mekanika batetik eta elektrizitate eta elektronika bestetik eta ikastaro guztiak Karmelo Labakan izango dira. Fabrikazio mekanikoko ikastaroak: tolerantzien kalkulua, oinarrizko metrologia, kontrol estatistikoa, CNC tornua, mekanizatu teknikak eta CAD 2D. Elektrizitate-Elektronikako ikastaroak: Antena instalazioa, automatismo elektroteknikoak, automatismo programagarri aurreratuak, Instalazio domotikoak, Sistema domotikoen diseinua eta CAD elektrikoa.

Hamar plaza bakoitzean
Ikastaro bakoitzean 10 plaza daude eta inskripzio orriak bete eta Agustin Iturriagan entregatu ahala beteko dira tokiak. Informazio guztia ikastetxeko web orrian dago: www.hernanibhi.com. Edo 943 551188 telefonoan.

 

Inzineradoraren kontrako plataforma sortzeko bilera
Abenduaren 17an egin zen hitzaldiaren bidetik, zabor errausketaren kontrako plataforma zabala sortzeko deia egin dute. Basuren gestioan eredu jasangarri bat egiteko prest dagoen guztiari egiten diote dei bilerara azaltzeko. Antolatzaileen hitzetan asmoa da plataforma zabal eta plural bat sortzea inzineradorarik egin ez dezaten, ez Urnietan eta ezta Gipuzkoako beste inon ere, “eredua arriskutsua, garestia eta jasanezina delako”. Diotenez Urnietako herriak eman duen erantzunak “PNV-EA behartu du inzineradora Urnietan jarri edo ez zalantzan jartzera eta bihar pentsatu lezakete Hernanin edo eskualdeko beste edonon jartzea”. Bihar, asteartea, 19:30etan Biterin.

Inzineradoraren proiektua aztertzeko mahai ingurua
Bildu Hernani Plataformak antolatuta erraustegiaren proiektua aztertzeko mahai ingurua dago etzi. Hizlariak dira: Xabier Landa, San Markos mankomunitateko lehendakari ohia, eta gertu gertutik ezagutzen dituena zaborraren arazoa bideratzeko planteatu ziren bide eta alternatibak; Gari Plazaola, Eguzki talde ekologistakoa; eta Urnietako Arnasa plataformako kide bat. Mahai ingurua asteazkenean da, Biterin, arratsaldeko 19:30etan.

Txotx denboraldiari hasiera emateko jaialdia igandean
Igandean emango zaio txotx denboraldiari hasiera ofiziala Hernanin, goizeko 11:30etatik aurrera Gudarien plazan, txalaparta eta bertsolariekin. Urteroko moduan herri bat omenduko da, aurten Azpeitia. Joxe eta Xebastian Lizaso bertsolariek egingo dute lehenengo txotxa eta ondoren jendeak izango du sagardoa edateko aukera eta pintxoak ere egongo dira. Eguerdian bazkaria da Itsasburun. Txartelak Aralar tabernan eta Haizea kortseterian.

Futbola
Hernanik garaipen ona ekarri zuen Debatik
Amaikak Bat taldearen kontra jokatu du Hernanik larunbatean Deban eta gogotik borrokatu behar izan dute hiru puntuak ekartzeko. Zelaia ez zegoen batere kondizio onetan eta nekosoa izan da partidua. Azken minutuetan sartutako penalti batek eman dio garaipena Hernaniri, 0-1.

Waterpoloa
Mutilen lehen taldeak irabazi eta bigarren taldeak eta neskek galdu
Mutilen lehen taldea lider dijoa Euskal Herriko 2garren mailan. Larunbatean 9-10 irabazi zioten Osasunari Iruñan eta ez sofritu gabe. Bestalde neskek galdu egin zuten ligako lehen partidua 11-4 eta mutilen bigarren taldeak ere bai, 2-11.

Boleibola
Bi taldeek galdu egin dute, neskek erraz eta mutilek justu
Boleiboleko taldeek galdu egin dute asteburuan. Neskek 0-3. Jokoak: 17-25, 21-25 eta 8-25. Mutilen taldeak gogotik borroka egin zuen Bizkaian, baina, Galdakaok hartu zion gaina 3-2. Jokoak: 24-26, 25-18, 16-25, 25-15, 15-8.

Xakea
Hernani A-k 3-1 hartu du menpean Zarautz
XAKE txapelketa asteburuan hasi da Hernaniko taldeentzat eta lehen taldeak 3-1 irabazi dio Zarauzko taldeari, Gipuzkoako lehen mailan. Hernani Bk, berriz, galdu egin du bigarren mailan, Añorgaren kontra 3,5-0,5. Datorren astean Oreretan jokatuko du Hernani Ak Fomento taldearen kontra eta etxean Hernani Bk Lasalleren kontra.

Mendiriz Mendik eskiatzera irteera antolatu du hilaren 24 eta 25erako
Cauterets-era irteera antolatu du Mendiriz Mendik 24 eta 25eko astebururako. Bidaia, afaria, lo egitea eta gosariaren prezioak dira: 14 urtez gorakoentzat 55 euro bazkideek eta 65 euro bazkide ez direnek; 9-14 urte artean 45 euro bazkideek eta 55 euro bazkide ez direnek; eta 9 urte artekoak 35 euro bazkideek eta 45 euro bazkide ez direnek (prezio honetan ez da forfaita sartzen). Izena ematea urtarrilaren 22a baino lehen egin behar da eta 20 euro aurreratu beharko dira.

Eski ikastaroko bilera gaur
Bestalde eski ikastaroa ere antolatu du Mendiriz Mendik datorren astebururako eta gaur egingo da bilera interesatu guztiekin, Mendiriz Mendin arratsaldeko 20:00etan.

Merkadiloa irekita
Mendiko material merkadiloa gaurtik ostiralera arte egongo da irekita Mendiriz Mendin, 19:30etatik 21:00etara. Aukera izango da jendeak salgai jarritako materiala ikusi eta erosteko, Iturregi Plazan.

Erakusketa berria gaur Biterin
Biteri kultur etxean erakusketa berria egongo da gaurtik datorren ostiralera arte, Zuzeneko Elkartasuna taldeak antolatuta. Erakusketa arratsaldeko 18:00etatik 20:00etara dago.