Juli
Ayerra eta Lurdes Leiber -kioskeroak
“Kioskoan
ordurik politenak goizean goizekoak dira, mugimendurik haundiena orduan
izaten baita”
Zinkoeneako kioskoak 35 urte daramazki irekita
eta Juli eta Lurdes ama-alabak egiten dute lan gaur egun. Jendeak gehiena
erosten duena da periodikoak, prentsa arroxa eta kotxe aldizkariak.
Garai
batean Plaza Berriko kioskoa bakarrik zegoen Hernanin eta 1968an ireki
zituzten, Konde, Lizeagakoa eta Zinkoeneakoa. Juli Ayerraren senarrak
ireki zuen Zinkoeneakoa eta Julik berak ere lan asko egin du bertan,
batipat emakumezkoentzako pelukeria utzi zuen ezkeroztik. Lurdes Leiber
alabak ere urte asko daramazki kioskoan lanean, garai batean laguntzen
eta orain eguneroko martxan.
Noiz
hasten da kioskeroaren lana?
Lurdes: Goizeko 05:00etan hasten gara lanean eta jaikitzea gogorra egiten
da baina ordurik politena hori da. Jende pila bat ibiltzen da gaueko
errelebotik datozenak eta lanera dijoazenak elkartzen baitira eta egia
esan gauez jende askok egiten du lan. Normalean ordu horretan ibiltzen
dugu bazile gehiena, eta musika jarrita eta saltsarako gogoarekin egoten
gara askotan. Beste askotan, ordea, inbidia ematen du lana bukatu eta
ohera dijoan jendeak.
JULI: Ni 12 urte eta erdian jaitsi naiz goizeko 04:45etan lanera, baina,
orain alaba jaisten da ia beti eta ni beranduago etortzen naiz.
Eta ordu horretan jendearekin zer konbertsazio izaten da?
Egia esan nahi baino gutxiago askotan, jendea presaka ibiltzen da eta.
Guk katxondeo dezentea ibiltzen dugu eta saiatzen gara adarra jotzen.
Beste ordu batzuetan, berriz, tope ibili behar izaten dugu biak, jende
asko etortzen baita batera. Baina, dagoeneko jendea ezagutzen dugu eta
eskatu aurretik ere jakiten dugu bakoitzak zer eramango duen eta ordu
horietan oso azkar egiten da lana.
Zer saltzen zen lehen eta zer saltzen da orain?
1968an 3 egunkari saltzen ziren: Diario, La Voz de España eta
Unidad de la tarde. Horrek, ordea, gora egin du poliki poliki eta gaur
egun 19 egunkari badira saltzen ditugunak egunkari normal, ekonomiko
eta deportekoen artean eta baita aldizkari mordoa ere. Aspaldian kioskoa
erabat puztuta daukagu. Gehiena eguneroko prentsa eta kotileoko aldizkariak
saltzen dira eta baita kotxe aldizkariak ere.
Herriko parte haundi bat ezagutzera ere iritsiko zineten?
Egia esan jende asko ezagutzen da hemendik. Eta pozik haundiena ematen
du klientela nahiko fidela duzula jakiteak. Urtero oparitxo bat egiten
diogu klientela finko horri eta orduan konturatzen gara zenbat eta zenbat
diren.
| Umorea
nagusi. Zinkoenea kioskoko ama alabek adarra jotzeko badute
halako artea. Inuzente egunean egiten dituztenak sonatuak dira:
Deia-ko lehen orria hartu eta barruan periodiko arabiarra sartu,
edo 3 hilabete aurreragoko egunkaria saldu, klienteei bizkarrean
muinekoak jarri eta abar. Beste ohitura inauterietakoa bihurtu dute,
biak mozorrotu egiten baitira. Iaz adibidez Charlestonez mozorrotu
ziren eta lanera bidean kioskotik pasa zirenek egin omen zuten nahikoa
parre. Aurtengo disfraza ez omen dute pentsatu, edo ez dute esan
nahi izan. |
Ezker
abertzalearen ‘Bergarako eskaintza’
Iparragirrek azpimarratu zuen alderdien logika gainditu
eta borondate politikoaren beharra
Ezker Abertzaleak abenduaren 16an egindako proposamenari buruz
aritu zen Imanol Iparragirre ostegunean Sandiusterrin. Proposamen
honen oinarria da martxoaren 14an Espainiako hauteskunde orokorretara
autodeterminazioaren aldeko euskal kandidatura bakarra aurkeztea.
Horretaz gain, egungo egoera politikoaz ere aritu zen.
Imanol Iparragirrek adierazi zuen egungo testuinguru politikoa ulertzeko
bi elementu hartu behar direla kontuan: batetik, Euskal Herriaren
etorkizunari buruz irekita dagoen eztabaida. Horren adibide bezala
aipatu zituen Ibarretxe plana eta Nazio Eztabaida Gunea. Bestetik
aipatu zuen, Espainia eta Frantziako estatuen estrategia errepresiboa.
Indarrak
bildu beharra
Testuinguru honetan martxoaren 14ko hauteskundeetan aktiboki parte
hartu behar dela adierazi zuen: “hauteskunde hauek erabili egin
behar ditugu Estatuari eta errepresioari ezetz esateko eta Euskal
Herriari eta autodeterminazioari baiezkoa emateko”. Horrekin
batera esan zuen autodeterminazioaren alde urrats praktikoak emateko
indarrak bildu egin behar direla eta egungo egoera ausardia politikoa
eskatzen duela eta Euskal Herrian gehiengoak autodeterminazioaren
alde egiten duela azaldu zuen.
Bilera
ugari
Imanol Iparragirrek adierazi zuen Bergaran egindako proposamena alderdi,
sindikatu eta eragile sozialei luzatu zaiela, horretarako batekin
eta bestearekin bilera ugari eginez. Sindikatuei dagokienean, aipatu
zuen oso jarrera positiboa eta irekia izan dutela proposamenarekiko.
Bestetik eragile sozialen aldetik jasotako erantzuna izan da gurdi
lana alderdi politikoek egin behar dutela. Alderdi politikoei dagokionean
Iparragirrek esan zuen EAJk ez duela proposamena onartu eta EAk eta
Aralarrek ez dutela erantzun garbirik eman.
Indarkeriaren kondenaren inguruan aipatu zuen, alderdiek aitzakia
bezala erabiltzen dutela eta egin beharrekoa dela egoera politikoaren
kondena. Bukatzeko azpimarratu zuen alderdien logika gainditu beharra
dagoela egoerari aurre egiteko eta horretarako ezin bestekoa dela
guztion borondate politikoa.
Ezker
Batuak Atxikimendu libreko Federalismoaren proposamena azalduko du bihar
Plaza Berrian
EZKER
Batua/IU Atxikimendu libreko Federalismoaren proposamena azaltzeko sozializazio
kanpaina egiten ari da herriz herri. Ezker Batuaren helburua da “elkarbizitza
eredu plural, autogobernua eta autodeterminazio librearen eztabaidei
buruz EBk duen proposamena ezagutaraztea”. Ekitaldia Plaza Berrin
izango da, arratsaldeko 19:30etan izango da. Hernaniko EB/IUk herritar
guztiak gonbidatu ditu proposamena zuzenean ezagutzera.