Untitled Document

“Hau da Hernaniko sagardo berria!”
Joxe eta Xebastian Lizaso bertsolariek zabaldu zuten Txotx denboraldia. Azpeitiko herriak eta hango Tanborradak Hernaniren omenaldia jaso zuten. Jende asko bildu zen, eguraldiak asko lagundu ez bazuen ere.

Hau da Hernaniko sagardo berria esaerarekin zabaldu zuten Lizasok aita-semeak aurtengo sagardo denboraldia. Joxe Lizaso bere ikuitua eman zion “Hau bada Hernaniko sagardo berria edan dezagun lasai” bota zuen. Eguraldi petralak ez zuen ekitaldi ederra zapuztu, eta plaza bete jende bildu zen.
Aurtengo Txotx Jaialdiak Azpeitiko herria eta bertako Tanborrada ere izan ditu protagonista eta biek ere omenaldi beroa jaso zuten. Gidoian hala ez bazegoen ere, ekitaldia hasi aurretik Tanborradak Kaxkoan barrena buelta egin zuen beren doinu eta erritmoekin, eta euriak ere ez zituen atzeratu.
Txalapartak eman zion hasiera ekitaldiari eta ondorenean Maialen Lujanbio eta Aritz Zerainek bertsotan eman zioten ongi etorria sagardo denboraldi berriari.

Azpeitirako gonbitea
Joxe Felipe Auzmendi aritu zen aurkezle lanetan eta, Hernani eta Azpeitiako Alkateei eman zien hitza, Joxan Rekondo eta Julian Eizmendiri. Rekondok oroigarria eman zion Hernaniren izenean eta Eizmendik Azpeitia eta Hernaniren arteko harreman estua azpimarratu zuen. Bere hitzetan, Azpeitia ere herri sagardozalea da. Elkarte eta txoko askotan dituzte kupelak eta Hernanitik sagardo asko eramaten da Azpeitira. Era berean, Azpeitia bisitatu eta bertako jaietara gonbidatu zituen hernaniarrak.
Tanborradako arduradunak Simon Etxeberriaren eskutik jaso zuen oroigarria, eta Lizaso aita-semeek Maialen Lujanbio eta Zerainen eskutik. Lizasotarrek (iloba ere etortzekoa zen eta saio bat zuen) bertso banarekin eskertu zuten detailea eta dantzariek agurra dantzatu zieten guztiei. Ekitaldiaren ondoren, bazkaria izan ziren Itsasburu sagardotegian.

Alzheimerra eta buruko beste gaixotasunen inguruko ikastaroa gaur hasiko da

Lahar elkargoak alzheimerra eta buruko antzeko gaixotasunei buruzko ikastaroa gaur hasiko du Biterin. Ikastaroa gaixotasun horiek dituzte pertsonekin dabiltzanei begira antolatua dago batez ere. Ikastaroan 16:00etatik 19:00etara da, gaurtik asteazkenera eta datorren astelehen eta asteartean. Kurtsoa debalde da eta eskatzen dena da hasieratik bukaerara joateko konpromisoa.

Xakea
Hernani fuerte Gipuzkoako Ligan

Hernaniko bi talde ari dira Gipuzkoako Ligan jokatzen eta orain arte fin dabiltza. Hernani A taldeak bitik bi irabazi ditu. Larunbatean 2,5-1,5 irabazi zion Errenteriako Fomento taldeari, eta aurreko asteburuan berriz 3-1 gailendu zen.
Larunbateko partiduan, Fernando Esnaolak eta Gerardo Plazak irabazi egin zuten, Jesus Navascuesek tablak egin zituen eta Mikel Apezetxeak okerreko mugimendu bategatik galdu zuen. Hernani A iaz igo zen Gipuzkoako lehenengo mailara eta gustora dago orain arteko lanarekin.
Hernani Bk ere irabazi egin zuen larunbatean Irungo Lasalleren kontra, 3-1. Iñaki Zabala, Joxe Angel Ijurjo eta Txema Orillanak irabazi egin zuten, baina, Ioritz Ossisek ezin izan zuen arratsaldea borobildu.
Datorren asteburuan, Hernanik A-k Fortunaren kontra jokatuko du Hernanin. Bigarren taldea Grosen kontra arituko da, kanpoan.