Itziar
Urdangarin -Korrikalaria eta Gipuzkoako Kross txapelduna
“Gipuzkoako kross txapelketa irabazteak
animuak eman dizkit zerbait gehiago lortzen saiatzeko”
Denboraldi honetan bi garaipen lortu ditu Itziar Urdangarinek: Amsterdameko
maratoi erdia eta Gipuzkoako kross txapelketa. Espainiako krossa du
hurrengo helburua, eta aurreneko 20etan sartu nahi du.
Itziar
Urdangarin korrikalari hernaniarrak aurrena egin zuen Gipuzkoako kross
txapelketan pasa den igandean. Urdangarinek azkeneko kilometroan aurre
hartu zion Iratxe Aranbururi, karrera osoan lehenengo postuan zijoanari.
Gipuzkoako txapelketa irabazteak animu haundia eman dio. Gustora dago
daraman progresioarekin. Gauez lan egin eta ohera sartzerako entranatzera
joaten da. Profesional izatea gustatuko litzaioke, baina, oso zail ikusten
du.
Nola
baloratu duzu Gipuzkoako krossean lortutako garaipena?
Karrera honetarako hiru hilabetez entrenatu dut eta egia esan ez nuen
irabaztea espero, nere asmoa postu on bat lortzea baitzen. Karreran
oso ondo ibili nintzen eta karrera ere ondo bukatu nuen eta horrek pentsarazten
dit banuela emateko gehiago. Beldurra ere baneukan, Iratxe Aranburu
oso indartsu dabilelako. Entrenatzaileak esan zidan distantziak mantentzeko
eta azkeneko kilometroan indarrak
bildu eta Iratxeri aurrea hartzea posible zela ikusi nuen.
Zein da atletismoan egin duzun ibilbidea?
Korrika egiten 9 urte nituela hasi nintzen Hernaniko taldearekin. Ondoren
25 urterekin nere auzoko gizon batek korrika egitera animatu ninduen
eta biak Zarautzen bikoteka egiten den karrerara animatu ginen. Ondoren
Goierri-Garaia ekipoak bertan sartzeko proposamena egin zidan. Goierri-Garaian
egin nuen lehenengo urtea nahiko gorabeheratsua izan zen baina, aurten
serio ari naiz entrenatzen.
Pozik
al zaude egin duzun progresioarekin?
Bai, oso pozik nago. Ekipoan hasi nintzenean atzean ibiltzen nintzen
eta pixkanaka-pixkanaka hobetzen joan naiz.
Denboraldi honetan zein karreratan ibili zara?
Denboraldi hasieran Amsterdameko maratoi erdia egin nuen eta aurreneko
postua egin nuen, 01:20ko denbora eginda. Karrera ondo bukatu nuen eta
konturatu nintzen gehiago ere banuela emateko. Horrek denboraldia serio
hartzeko animua eman zidan.
Zein
helburu dituzu hemendik aurrerako?
Euskadi eta Espainiako krossetara presentatu nahi dut eta nere helburua
da Espainiako krossean aurreneko 20 postuetan geratzea. Azkoiti-Azpeitiko
maratoi erdira ere joateko asmoa dut.
Maratoiak egiteko asmorik?
Orain arte maratoi erdiak egin izan ditut eta baliteke maratoietarako
ere prestatzen hastea. Honekin lotuta esan behar dut maratoietara prestatu
gabe aurkeztea sekulako akatsa dela, txarra delako bai buruarentzat
bai gorputzarentzat. Oso ezberdina da maratoi baterako prestatzea edo
maratoi erdi baterako prestatzea. Maratoi erdi bat bi hilabetetan prestatu
daiteke baina maratoi baterako beste entrenamendu klase bat behar da.
Maila ona al dago herriko eta inguruko korrikalarietan?
Gipuzkoan maila ona dagoela iruditzen zait. Uste dut lau emakume gipuzkoar
garela selekziora joaten garenak. Hala ere, maila ona egon arren emakumezko
korrikalari gutxi ibiltzen da hemen inguruan eta ez dago ez afizio ezta
harrobi haundirik ere.
Orain lana egiten duzu gauez eta lanetik aterata entrenatu egiten
duzu. Nola moldatzen zera?
Gorputza ohitu egiten da. Gauez lana egiten dut eta lanetik ateratzean
entrenatzera joaten naiz eta gero lotara. Nire ekipoko korrikalari bat
ere ni bezala ibiltzen da. Ohitzea da kontua.
Gustatuko litzaizuke korrikalari profesionala izatea?
Bai, baina oso oso ona izan behar da. Elitean daudenak bakarrik dute
aukera korrika egiteaz bizitzeko. Gustatuko litzaidake, baina, oso urruti
ikusten dut profesional izatearena.
Udalak
ontzat jo du Plazako lurra aldatzea eta bi urte barru egin litezke obrak
Rekondoren esanetan, aurten proiektua egingo da eta obrak lurpeko
instalazio eta azpiegitura guztia ere berritu egingo du. Eskaria Kaxko
elkarteak egin zuen.
Kaxkok
Gudarien plazako lurra aldatzea eskatu zion Udalari plazari benetako
zentzu soziala, eta kulturala emateko, orain dagoen harria egokia ez
zela-eta. Joxan Rekondok Kronikari adierazi dio Udalak begi onez ikusten
duela proposamena, eta ondo bidean datorren urtean egingo dela obra.
Alkatearen hitzetan, Alde Zaharra berritzeko prozesuan, orain Tilosetako
urbanizazioak behar du lehentasuna. Horren barruan joango litzateke
Gudarien plaza berritzeko proiektua ere.
Joxan Rekondoren esanetan, oraingo obran, zorua aldatzeaz gain, lurpeko
instalazio eta azpiegitura guztiak ere berrituko dira. Plazak orain
daukan zorua, 20 urte inguru jarria da eta orduan ez ziren lurpeko azpiegitura
nagusiak ukitu.
Tilosetan
ere zoru berria
Bestalde, Tilosetako plaza egokitzeko lanetan bi obra nagusi ikusten
ditu Alkateak. Batetik, zorua bera eta zenbait instalazio eta bestetik
zuhaitzak ondo zaintzeko neurriak.
Xalapartan
urteko balantze ona
Xalaparta
Elkarteak urteko batzarra eta batzar berezia egin zituen igandean. Bazkideek
aho batez onartu zituzten urteko kontuak eta ekitaldien balantzeak.
Xalapartak bi bazkide berri ere onartu zituen eta 130 izango ditu orain.
Hernaniar Bikaina, sagardo txapelketa, San Joanetan txaranga, Aranorako
martxa, mus txapelketa, Dantzari eguneko bazkaria dira Xalapartak egiten
dituen ekitaldi nagusienak.
Urteko batzarraren aurretik, ordea, beste batzar berezi bat egin zuen
Xalapartak, jubilatutako bazkideen egoeraren inguruan. Bi proposamen
izan ziren, bazkide batena eta zuzendaritzarena, baina, asanbleak gauzak
lehen bezala uztea erabaki zuen, eta ez zen ez bat ez bestea aurrera
atera.
Jose Mari Belegain da Xalapartako lehendakari eta aurten ere junta berak
jarraituko du. Lehendakaria pozik zegoen bai urteak eta bai batzarrak
eman zuenarekin.