Ruper Ordorikak jende mordoa bildu zuen kiroldegian, Sagarrondotik ekimeneko lehenengo ekitaldian
Kiroldegian bildutako entzuleak pozik utzi zituen musikari oñatiarrak. Hurrengo ekitaldiak otsailaren 26, 27, 28 eta 29an dira . Hernanin kontzertuak daude hilaren 27 eta 28an.

Kontzertu ederra eskaini zuen larunbat gauean Ruper Ordorikak Sagarrondotik ekimeneko aurkezpen ekitaldian. Abeslari oñatiarrak atera berri duen diskoko abestiak jo zituen gehien bat, baina disko zaharretako abesti sonatuenak ere ez zituen ahaztu, bildu zen entzule mordoaren gozamenerako. Kontzertuaren aurretik Sagarrondotik ekimenaren ordezkariek hemendik aurrerako ekitaldiak iragarri zituzten.

Kontzertuak Hernanin
Sagarrondotik ekimenak Hernanin izango du segida eta izen haundiko taldeak etorriko dira otsailaren 27 eta 28an. Otsailaren 27an Fito & Fitipaldis, Su ta Gar, Reincidentes eta Orisha’s taldeek joko dute. 28an, berriz, Fermin Muguruza eta Kontrabandak, Ojos de Brujok, Kuraiak eta Ari taldeek joko dute. Kontzertuak hartzeko 10.000 lagun hartuko dituen karpa preparatu du Sagarrondotik elkarteak eta Hernaniko eta beste herrietako sagardogileen, Udalaren eta hainbat talderen laguntza du.

Lau herritan
Sagarrondotik ekimenak 2garren edizioa du aurten eta lehengo urtetik duen aldaketarik haundiena da lau herritan egingo dela aurten: Hernani, Urnieta, Usurbil eta Astigarragan. Hernanin kontzertuak dira, Urnietan inaugurazio ekitaldia, otsailaren 26an; Usurbilen, Herri kirol lehiaketa otsailaren 28an, Hernani, Astigarraga, Usurbil eta Urnietako taldeen artean. Astigarragan 2garren euskal Herriko sagardo probaketa egingo da 60 sagardogileren sagardoekin, otsailaren 29an eta dantzak bertsolariak, produktu azoka eta abar izango dira.

---

Aitor Ruiz de Eginoren zeramika, brontze eta harri erakusketa dago Biterin
Gaurtik otsailaren 3 arte egongo da . 120 zeramika pieza, 5 brontzezko eta 2 harrizko jarri ditu

Aitor Ruiz de Egino hernaniarrak erakusketa jarri du Biteri kultur etxean, berak egindako zeramika, brontze eta harri lanekin. Ruiz de Eginok 7 urte egin zituen Biteriko zeramika ikastaroan, beste 3 urte harria lantzen eta azken boladan margotzen ari da eta Geronan ibili da zeramikako 2 kurtso egiten. Lan asko dauzka eginak eta saltzera ere ateratzen ditu Donostiako galeria batean eta herriz herriko erakusketa eta azoketan. Hau izango du bakarka jarriko duen lehen erakusketa.
Hernaniko erakusketan 127 arte lan dauzka ikusi eta nahi duenak erosteko. Gehienak Zikuzulon eginak dira aurtengo Udaran eta aurpegi eta gorputzetatik abiatuta egiten ditu lanik gehienak. Gehien erabiltzen duena gres zeramika da, lehenik 1000 º C-ra eta gero 1260 ºC-ra egosia.

---

Hernaniko kiroldegiko sozioek Astigarragan ikastaroak ere egiteko aukera izango dute
Hernani eta Astigarragako Udalek elkarlan hitzarmena sinatu dute . Orain kiroldegi batean sozio denak bi herrietako eskaintza osoa izango du eskura.

RHernaniko kiroldegiko bazkideek Astigarragako kiroldegia erabili ahal izango dute, Astigarragako bazkideek egiten duten bezalaxe, bi herrietako Udaletxeek akordio bat sinatu baitute.
Astigarragako kiroldegiko instalazio guztiak erabili ahal izango dituzte Hernaniko kiroldegiko sozioek eta parte hartu ahal izango dute Astigarragako kiroldegiak antolatzen dituen, ikastaro eta lehiaketetan. Horrekin batera Astigarrako kiroldegiko zerbitzuak ere erabili ahal izango dituzte: kirol medikuntza, hidromasajea eta masajea, esaterako.
Bi Udaletxeek sinatutako akordio honen helburua da kirol instalazio zerbitzu zabalago bat eskaintzea. Elkarlan honen bitartez udalerri bakoitzak izan litzakeen urritasunei aurre egin nahi izan diete.

---

Jasota Bezala (Gutunak)
SENTENTZIA BETE, ELKARRIZKETA BAI, DESPIDORIK EZ.
Kiroldegiko monitoreen eta Patronatuko lehendakariaren arteko lan konfliktoaren aurrean, Hernaniko Ezker Batua honako hau adierazi nahi du:
1.- Salatu nahi dugu langile hauek hamarkada bat baino gehiagoan jasan behar izan duten lan prekarietatea, lege fraudea dena, aurreko Korporazio Munizipalen partetik eta LAB sindikatuaren konplizidade eta isiltasunarekin.
2.-Gizarte Arazoetako Auzitegiak eta Justiziako Auzitegi Gorenak emandako sententziak argiak eta sendoak dira, langile hauen kontratuak denbora partzialean indefinitu diskontinuoak dira. Udaletxeak eredua izan behar du eta sententziak bete egin behar ditu.
3.-Ez gaude ados langile hauen despidoarekin, ezta langile hauek fondo publikoekin indemnizatzearekin. Egoera honi aurre egingo diogu gure indar guztiekin, lanpostu hauek oposizio publikoen bitartez betetzen ez diren bitartean. Izan ere, neurri hauen atzean badirudi Zerbitzu Munizipala pribatizatzearen aldeko politika neoliberala dagoela.
Hernaniko Ezker Batuak eskatzen die errepresentazio munizipala duten indar politiko guztiei, urtarrilaren 31tik aurrera despido mehatxu honen aurrean posizionatzeko eta elkarrizketa eta negoziazioa hastera gonbidatzen ditu lan gatazka hau konpontzeko. Hernaniko herriari mesede egingo dio-eta.

Hernaniko Ezker Batua
Jesus Uzkudun

Hauteskundeetarako zentsua ikusteko aukera gaurtik aurrera
Hauteskundeak direla eta Udaletxean hauteskunde zentsua ikusteko aukera izango da gaurtik hasi eta otsailaren 2ra arte. Zentsua Udaletxeko idazkaritzan dago, Udaletxeko bigarren pisuan, eta NANa edo pasaportea aurkeztu behar da. Ordutegia da, goizeko 9:00etatik 13:00ak arte.

Errugbia
Seniorren aurreneko taldeak
Iruñan irabazi
Hernaniko Seniorren lehendabiziko taldeak 18-53 irabazi zuen atzo Iruñan La Union ekipoaren kontra izan zuen partiduan. La Union ekipoa klasifikazioan azkena doa eta Hernani aurreneko postuan enpatean dago Duragorekin. Hernaniarrek aurreneko zatia gaizki jokatu zuten, 13 eta 19ko emaitzarekin bukatu zuten-eta. Bigarren zatian jokoa hobetu zuten eta tanto mordoa egin zuten. Datorren astean Durangoren kontra jokatzekoak dira Landaren, baina uholdeen ondorioz kanpoa gaizki dagoenez baliteke beste egun batean edota beste kanpo batean jokatzea.

Saskibaloia
Zarautzen kontra galdu
Hernanik 78-70 galdu zuen Zarautzen kontrako partiduan. Partido osoan zehar nahiko berdinduta ibili ziren bi ekipoak, baina partiduko azkeneko zatian zarauztarrek aurre hartu zieten hernaniarrei. Ligilla bukatzeko hiru partidu falta zaizkie orain, eta helburua da hirutik bi partidu irabaztea igo ahal izateko.

Waterpoloa
Hiru ekipoek izan dute partidua
WATERPOLOKO mutilen bi ekipoek elkarren kontra jokatu zuten atzo eguerdian kiroldegian izan zen derbian eta emaitza 3 eta 10 izan zen Hernani Aren alde. Neskek kanpoan jokatu dute astebukaera honetan eta 6 eta 8 galdu zuten Santoñaren kontra izan zuten partiduan. qa eta bakarka.

Ipuin Kontalaria
Ipuin kontalaria bihar liburutegian Lur Korta ipuin kontalaria izango da bihar liburutegian. Arratsaldeko 17:30etan, 3 eta 4 urteko umeentzat kontatuko ditu ipuiak. Arratsaldeko 18:00etan aldiz, 5 eta 7 urte bitarteko haurrentzat arituko da.