Uholdeek
lokatza, zikina eta kalteak utzi dituzte
Zubipe eta Landare berriz ere erabat lokatz gelditu dira. Osiñaga
eta Karabelgo baratzetan ere kalteak izan dira. Jauregi ondoan euriak
luizia eragin zuen Sta Barbarako bidean. Hernani, Astigarraga eta Donostiako
Udalek ibaiaren urbidea haunditzeko obrak eskatu dituzte.
Urak
joan dira eta orain lokatza eta zikina gelditu da Urumea ertzeko leku
askotan. Udalak herrian izandako kalte guztien berri zehatza izan nahi
du eta, horretarako, kalterik izan dutenei eskatu die Udaltzaingoan
emateko kasu guztien berri.
Dirudienez, Zubipe eta Landareko kirol instalazioak eta Urumea ondoko
baratzak izan dira kalte gehienak jaso dituztenak. Zubipen futbol zelai
osoa erabat lokatz gelditu da, eta zenbait lekutan 30-40 zm lodi da
zikina. Publizitate bailak batzuk hautsita daude, eta hormigoizko barra
batzuk ere eraman ditu urak. Zubipeko tabernan ia barraraino sartu da
ura, eta bulegoa ere urpean gelditu zen.
Rikardo Ramos CD Hernaniko lehendakariak Kronikari adierazi dio hasi
direla garbiketa tramite guztiak. Hala ere, Ramosek dio oraindik kaltea
zenbatekoa den ikusi beharko dela zenbat kostako den eta futbol zelaia
jokatzeko moduan noizko egongo den jakiteko. Aurreko aldian hilabeteak
egon ziren. Zubipen behin eta berriz ura sartzen dela-eta, CD Hernanik
Udalari planteatzeko asmoa du futbol instalazioak beste nonbait jartzeko
aukera.
Landareko errugbi zelaia ere jokatzeko moduan ez dagoela utzi dute uholdeek.
Landaren, ordea, belar naturala dago eta kaltea ez da horrenbeste antzematen.
Errugbi Elkartea kaltea zenbatekoa den aztertzen
ari da.
Kalteen
berri eman
Udalak herritarrei eskatu die uholdeek sortutako kalte guztien
berri emateko Udaltzaingoan.
Obrak
2005ean
Eusko Jaurlaritzak datorren urtean hasiko ditu errioa egokitzeko
lanak, Donostiatik Hernaniraino artekoak. |
Kalteak baratzetan
Urak eta lokatzak baratzetan ere pikardia haundiak egin ditu, hasi Orbegozo
ingurukoetatik eta Osiñagakoetaraino. Osiñagako zenbait
sagasti azpi ere dena hondar eta lokatz utzi ditu. Era berean, hor dagoen
landare biberoan ere egin ditu kalteak.
Karabel
auzoan, keja
Normalean bezala, oraingoan ere Karabel izan da urak gehiena harrapatu
duen auzoa. Auzo elkarteak dagokionak erreka garbitzeko eskatzen du
joan deneko aspaldian, baina, orain ura geroz eta maizago ateratzearen
kezkarekin. Etxeetan eta bajuetan, berez, ez da kalte nabarmenik izan,
auzo elkartearen esanetan.
Lubizia
Jauregin
Euriak lubizia eragin du Jauregitik Sta Barbararako bidean, kotxe desguazearen
gaikaldean. Lubiziak karreterari azpiko puska bat kendu dio eta bide
erdia itxita dago.
Atsegindegiko
aparkalekuetarako izena emateko bulegoa jarri dute
Atsegindegin dago bulegoa eta bertan entregatu behar dira eskari
orriak. Erabakitzeko dago aparkalekuaren azken diseinoa, baina, 150
plaza izango ditu gutxienez.
Atsegindegiko lur azpiko aparkalekuren bat hartu nahi dutenentzat apuntatzeko
bulegoa zabalduko dute gaurtik aurrera, Atsegindegi ondoan. Asfaltos
Naturales de Campezo SA eta Gedi Grupo de Promoción de Infraestructuras
enpresak ireki du bulegoa, obra egingo duen enpresak. Jendeak bulego
horretan edo Udaletxean izango ditu eskari orriak, eta bulegoan bertan
entregatu behar ditu beteta. Jende pilaketa haundirik ez izateko aldez
aurretik ordua hartzeko eskatu dute arduradunek eta horretarako telefonoa
hauxe da: 943 332369. Informazioa ere telefono berean emango dute.
Dokumentazioa
Eskari orriekin batean entregatu beharreko agiriak dira (bakoitzak dagozkionak
bakarrik): NANaren fotokopia; zirkulazio baimenaren fotokopia; errolda
agiria, dagokion Udalak egina; Negozio baten jabe, titular nahiz administratzaile
denak horri buruzko egiazkariak eta besteren konturako langile denak
titularrak egindako egiazkaria; elbarritasun ziurtagiria; kontu korrontean
600 euro sartu izanaren ordainagiria (zenbakia bulego jarri berrian
emango dute).
Kontzesioa
75 urterako
Garajeak 75 urterako kontzesio administratibo bidez emango dira, hau
da, 75 urteren ondoren Udalaren esku geldituko dira berriz ere. Baldintzen
orriak dioenez, garajea titularrak bakarrik erabiliko du eta ezingo
da inori alkilatu edo utzi. Saldu nahi den kasuan aparkalekuko Administrazioari
eman beharko zaio horren berri eta Udalak eman beharko dio baimena.
Prezioa aurretik finkatua izango da.
Gutxienez
150 plaza
Proiektuaren azken diseinua erabakitzeko dago, eta hiru aukera daude
mahai gainean. Proiektu definitiboa egin aurretik, ordea, benetako eskaria
ikusi nahi dute: zenbat aparkaleku, zenbat kotxe, furgoneta, zenbat
doble, ezinduentzako zenbat garaje eta abar. Lur azpiko aparkalekuarekin
batean, Atsegindegiri tapakia jartzeko proiektua ere badago eta hori
ere erabaki beharra du Herri Lanetarako Batzordeak proiektu definitiboa
agindu aurretik. Jakinekoa dena da, aparkalekuak 150 plaza behintzat
izango dituela.
Baldintzak
Garajeak Hernanin bizi edo lan egiten duen jendearentzat dira eta ibilgailu
bat beharko dute beren izenean eta Hernanin alta emana. Hernani zentroan
beste garajerik ez dute izan beharko eta zirkulazio baimena beharko
dute. Eskaera dagoen garaje kopurua baino txikiagoa bada hartu ahal
izango dute garajea baldintzaren bat betetzen ez dutenek. Lehentasuna
berriz, Hernani zentroan bizi direnek izango dute; ondoren, zentroan
lan egiten duten komertziante, profesional eta industrialek; jarraian
Hernanin bizi direnek; eta jarraian Hernanin lan egiten dutenek.
.
Bildu
Hernani plataformak Udal Aurrekontuak aztertzeko bilera deitu du gaur
kultura eta euskerako taldeekin
Bildu Hernani plataformak Udal aurrekontuak aztertzeko bilera deitu
du gaurko, kultura eta euskera inguruko taldeekin. Gaur egungo egoera
eta beharrak eta proposamenak aztertuko dira eta taldeez gain edozein
herritarrentzat zabalik daude ateak, proposamenak egin edo beren iritzia
emateko, Bildu Hernanik adierazi duenez. Bilera, gaur, arratsaldeko
19:30etan, Larramendi 11ko lokaletan.