“Chiapasen gertatzen ari dena mundu osoan gertatu da, baina han altxa egin dira”
Bihar bukatuko dira Jardunaldi Zapatistak, Itxaskin izango den afariarekin. Antolatzaileek Chiapaseko egoeraren berri eman nahi izan dute, eta gustora daude jendeak izandako erantzunarekin.

Zapatistei buruzko jardunaldiak egin dira Hernanin, EZLN-ren altxamenduak 10 urte bete dituen honetan. Zapatisten gatazkarekin sensibilizatuta dauden hainbat hernaniarrek antolatu dituzte ekitaldiak, horien artean Jon Zabaleta eta Patxi Urrestarazu Kabukik. Urtarrilaren 15ean hasi eta larunbat honetan bukatuko dira, Itxaski tabernan antolatu duten afariarekin. Afalondoan musika jartzaileak arituko dira. “Jardunaldiak bukatzeko euskal ritoa egingo dugu: hau da, afari bat” diote parrez antolatzaileek.

Parte hartzearekin gustora
Antolatzaileek adierazi dute espero zuten parte hartzea izan dela ekitaldietan: “Aurretik bagenekien ez zela jende asko etorriko, jendeari gai hau nahiko urruti geratzen zaiolako. Proiekzio batzuetara 20 pertsona edo etorri dira eta hitz egiteko eta hango egoeraren berri jakiteko aukera izan dugu denok” diote.
Dokumental, hitzaldi, pelikula, erakusketak eta abar egin dira jardunaldietan, eta antolatzaileen asmoa izan da jendeak hango egoeraren berri jakitea, zapatisten mugimenduaren sorreraren 20 urteurrena eta altxamenduaren 10garrena dela aprobetxatuta. Horrekin batera ekitaldietan lantzen ari diren ipui batzuk jendaurrean erakusteko aukera ere izan dute. Marcos Komandanteordeak bildutako ipui zapatistak dira, eta Xabier Ibarzabalek euskeratu ditu, eta Jon Zabaletak marrazkiz apaindu. Erakusketan 10 ipui jarri dituzte eta Andragoton dago ikusteko aukera.

Munduan gertatzen dena
Jon Zabaletak dio Chiapasen gertatzen ari dena mundu osoan gertatu dela, eta gertatzen ari dela: “Planteamendua lurra da. Momentu hauetan multinazionalek hango lurrak hartu eta aberastasuna atera nahi dute. Egoera hau munduan gertatzen ari denaren erreflejoa da: batzuek lurra harrapatzera doaz eta beste batzuek ikusten dute komunitate gisa beren bizitza bukatu egingo dela beren lurraldetik ateratzen badituzte”.
Kabuki Mexikoko komunitateetan izan zen 1995 eta 1996 urteetan eta berak adierazitakoaren arabera mugimendu zapatistan Mexikoko komunidade indigenak eta ez indigenak biltzen dira: etxeko andreak, baserritarrak, langileak, pandilleroak, eta abar. Zapatismoak marjinatutako sektore hauei izena eta hitza eman diela dio Urrestarazuk.

---

“Landaren ezingo da denboraldi honetan gehiago partidurik jokatu”
Horixe esan du Errugbi Elkarteak errugbi zelaia uholdeekin nola gelditu den aztertuta. Hernani mailaz igotzeko bidean da eta etxean jokatu ezina traba haundia izan liteke.

“Azken lau urtetan seigarren aldia izan da, eta beti momentu klabeetan” adierazi du triste Errugbi Elkarteko kide batek. Asteburuko uholdeek utzitako lokatzak erabat hondatuta utzi du Landareko zelaia, eta Errugbi Elkarteak ez du itxaropenik denboraldi honetan jokatzeko moduan jarriko denik: “Gehienez, ere entrenatzeko moduan egokitu liteke zatiren bat”.
Zelaia aztertuta, Landareko arduradunek ikusi dute 10 zmko lokatza gelditu dela hondoan, belarrari erantsita. “Hori garbitzeko makinak sartu behar dira eta makina sartzeko erabat lehortuta egon behar du. Gero, berriz hondarra bota beharko da, gero belar hazia...” kontatu du etsita Landareko ordezkariak, aurtengo denboraldian Landaren berriz partidurik ez dela jokatuko sinestuta.

Partidu erabakigarria
Hernaniarren atsekabea haunditzen duen beste elementu bat da justu asteburu honetan jokatuko dutela denboraldiko partidurik erabakigarrienetako bat, mailaz igotzeko promozio bidean. Partidua Durangoren kontra da, hain zuzen ere. Orain, seguruena Aieten jokatuko dute Atletikoren kanpoan, partidua behar bezala prestatu eta normal entrenatzeko modurik izan gabe. Eta aurrera begira ere kontraeskura aritu beharko dute. Aste honetan atletismo pistan aritu dira entrenatzen, baina, zoruak arazoak eman dizkie, eta lesio txikiren bat ere bai.
Beste talde guztiek ere egoera bera izango dute, uholdek utzitako ondorenagatik.

---

Pelota
Legarreta-Ezeiza final laurdenetan, Gipuzkoako txapelketa herrikoian

Gipuzkoako pelota elkarteak antolatuta txapelketa herrikoia ari dira jokatzen, Gipuzkoako herrietako torneoetan txapeldun gelditu diren pelotarien artean. Hernaniko Kronika txapelketako bikote irabazleak, Xabier Legarreta eta Gorka Ezeizak, final laurdenetako partidua jokatuko dute gaur Zubizarreta-Korta azpeitiarren kontra. Partidua, Usurbilen da 18:00etan hasiko den pelota jaialdiaren barruan. Guztira 4 partidu jokatuko dira.

---

Kontzentrazioa gaur Etxeratek deituta
Guztion artean Euskal presoak Euskal Herrira lemarekin kontzentrazioa deitu du Etxerat elkarteak gaurko. Kontzentrazioa arratsaldeko 20:00etan da plazan. Etxeratek bereziki salatu nahi du hernaniar presoek Frantzia eta Espainiako espetxeetan jasaten duten egoera “gero eta kaxkarragoa”. Salaketa hori babesteko Etxeratek dei egin die herritar guztiei gaurko kontzentraziora.

Osiñagako auzo elkarteak bilera egingo du etzi
IGANDEAN bilera du Osiñagako Auzo Elkarteak. Bileran auzoko arazoetaz hitz egingo da: zaratak, urbanizatzeko geratzen diren guneak, zerrategia, bide garbiketa eta beste hainbat gai. Datorren hilabeteetarako lan egutegia erabakiko da, 2004ko jaiak prestatzeko batzordea ere sortuko da eta hurrengo bileretarako egutegia zehaztu. Bilera eguerdiko 12.00etan izango da, Arriatsuko eskolan.

Igerikta
Hernani helburua lortzetik pausu bakarrera
Hernaniko igerilariak bikain aritu dira azken bi jardunaldietan eta badirudi lehenengo mailari eusteko moduan izango direla, jardunaldi bakarra falta baita eta ondo baitijoaz orain arte. Azken bi asteburutan Irunen eta Ordizian konpetitu dute Hernaniko igerilariek eta emaitza onak ekarri dituzte. Momentuz Hernani laugarren dijoa, baina, bosgarrenetik puntu askotara. Bosgarren Ordizia dijoa eta itxura guztien arabera bera jaitsiko da mailaz. Bestalde datorren igandean du igeriketa talde urteko bazkaria. Saretxon izango da 14:00etan eta bazkal ondoan emango dizkiete igerilariei sariak.

Atletismoa
Joseba Lizeaga eta Eidera Aldabe bigarren Lasarten
Igandean jokatu da Lasarteko krossa eta Hernaniko gazte koadrila haundiak hartu du parte maila dezberdinetan. Joseba Lizeaga eta Eider Aldabek bigarren postua lortu dute eta infantiletan. Bestalde Langile lehenengo gelditu zen ikastetxe mailan. Datorren asteburuan Zarautzen da denboraldiko azken Krossa eta otsailaren 15ean litekeena da Hernanin egitea Gipuzkoako Txapelketa.

Zinea Biterin
‘Master & Comander’
Gaur Master & Comander filma botako dute 22:30etan, Biterin.

AMHER elkarteak bilera gaur
Bertan jaioak eta kanpotik etorriak biltzen dituen AMHER elkarte multikulturalak bilera du gaur arratsaldeko 19:30etan.

Jasota Bezala
Hernaniko Ezker Batuari:
Hernaniko Kiroldegiko igeriketa monitorearen arazoak direla eta, bat gatoz komunikabideetan horrelako gaien aurrean azaltzen ari zareten iritzia eta borrokatzeko grinarekin, hori da betidanik LABeko kideok mantendu dugun jarrera, gure aldarrikapena eta borroka horrelako gaietan garbi azaldu dugu beti, AZPIKONTRATAZIORIK EZ, KALERATUAK EZ eta LAN DUINA DENONTZAT.
Kiroldegiko igeriketa monitoreekin egin nahi dutena ez dugu onartzen eta ez gara hortik pasako, horregatik zenbat eta gehiago izan borroka honetan, askoz ere hobeto egoera hau pairatzen ari diren langileentzako eta epaileak agindu dituen kontrato mugagabeak ziurtatzeko beraientzat.
Bukatzeko, ez bota baloiak besteen etxera, gaur egun Hernaniko Udaleko Gobernuko kideak zarete, eta dagokizuen ardurarekin jokatzea eskatzen dizuegu, aukera duzuelako langile hauek defendatu eta egin nahi dutena geldiarazteko.
Besterik ez.

Javier Hernandez Ruiz de Larrinaga, Hernaniko Ongintzako, Kiroldegiko eta Udaleko LAB.