Hernanin
gutxi barru hasiko dira Urumea garbitzen, eta Karabeldik Donostiara
egiten ari diren azterketa udararako bukatuko dute
Atzo elkartu ziren Astigarragan uholdeen arazoiei batera irtenbideak
bilatzeko Hernaniko, Astigarragako eta Donostiako Udal ordezkariak,
Diputazio eta Jaurlaritzako Lurralde Antolamendu eta Ingurugiro Sailarekin
batean.
Aurreko
asteburuan Hernani eta Astigarragan izandako uholdeak aztertu eta hemendik
aurrerako pausuak zehazteko bilera egin zuten atzo Hernani eta Astigarragako
Alkateek, Donostiako Udaleko ordezkariak, Eusko Jaurlaritzako Lurralde
Antolamendu eta Ingurugiro sailburuak eta Diputazioko arduradunak. Bilera
ondoren Xabin Intxaurraga Sailburuak azaldu zuen kaltetuek orain arteko
laguntzak izango dituztela eta denen artean adostu dutela aurrera horrelakorik
ez gertatzeko zein pausu eman.
Pausuetako bat izango da IKAUR enpresa Karabelgo Zubitik Egiako Zubira
egiten ari den Ordenazio Alternatiba azterketa azkartzen saiatzea. Ekainerako
azterketa bukatzea nahi dute, Intxaurragaren hitzetan eta azterketa
hau izango da ondorengo proiektuak zehaztuko dituena. Lehentasunak jarri
eta datorren urtean obra zehatzetan hasiko da Eusko Jaurlaritza atzo
esandakoaren arabera.
Bestalde, oraintxe bertan egingo diren obrak ere badaude: Hernanin errioa
garbitzea (arbolak eta isletak baitaude), eta Ergobin kanalizazioa oztopatzen
duen ume parkea kendu eta Zubiaren ezker begia garbitzea.
Etxeratek
salatu du Frantzia eta Espainiako espetxeetan hernaniar presoen egoera
geroz eta okerragoa dela
Hainbat hernaniar isolamendu moduloetan daudela
dio Etxeratek, eta Espainiako espetxeetako egoera txarra bada, Frantziako
espetxeetakoa okerragoa dela.
Etxerat elkarteak hileroko kontzentrazioa egin zuen atzo plazan, Euskal
Presoak Euskal Herrira ekartzea eskatzeko. Aldarrikapen hau orain inoiz
baino garrantzitsuagoa dela dio Etxeratek, Frantzia eta Espainiako espetxeetako
egoerak “okerrera egin baitu”.
Etxeratek salatu du Jabier Zabaleta 3 urtean dagoela isolamendu moduloan
eta Jose Manuel Errazkin 3 hilabete daukatela isolatuta. Gorka Loran
eta Garikoitz Arruarteren kasuan espetxeratu ezkero isolamentuan daudela
dio elkarteak eta herriko beste presoek “betiko mugak” izaten
jarraitzen dutela: eskutitzak bidali eta hartzeko kopuru mugatua, lagunen
bisita murrizketa, telefono dei murrizketa eta abar.
Frantzian
okerrena
Egoera larrienak Frantziako espetxean ematen direla salatzen du prentsa
oharrak. Ibon Fernandez de Iradiren kasua, bereziki gogorra dela dio
Etxeratek eta atxilotu zutenetik jaso duela polizien mendekua: “espetxean
isolamendu moduloan eta isolatuta daukate: ziegatik mugitzen denean
4 funtzionariorekin izaten da, 30 minutuko patioa besterik ez du egunean,
gauean ordu erdiro argia pizten diote lorik egin ez dezan, eskutitz
murrizketa du eta senideen bisitak bakarrik jaso ditzake. Eta dena Ibon
suntsitzeko asmoarekin. Gorrotoa eta mespretxua eguneroko ogia dute”
salatu du Etxeratek.
Alberto Rey Betoren egoeraren berri ere eman du Etxeratek prentsa oharrean.
Salatu du Rey epaitu zutenean espetxe isolatu batera aldatu zutela eta
senideentzako komunikazio bidea zaildu eta garestitu egin dela geroztik.
Futbola
Lizeo-Hernani eta Ostadar-Hernani gaur
Gorengo taldeak Lizeo Sto Tomasen kontra jokatuko du gaur ligako partidua,
arratsaldeko 17:30etan. Emakumezkoen ligan berriz, hernaniarrek Ostadar
taldeari egin beharko diote aurre, 15:30etan, kanpoan.
Bestalde, Udaletxeko langileek kendu dute Zubipeko lokatza eta orain
azpia nola utzi duen aztertu behar dute. Hernanin jokatzekoak ziren
partiduak Jasonebasoko zelaian jokatuko dira.