Errege Magoak bihar etorriko dira
Hernanira karrozan
Arratsaldeko 16:00etan zaharren egoitzara joango
dira eta arratsaldeko 18:00etan hasiko dute herritik egingo duten buelta
.Arratsaldeko 20:00ak aldera plazan egongo dira umeak agurtzeko.
Bihar
etorriko dira Errege Magoak Hernanira eta urtero bezala erregalo mordoa
utziko dute. Baina lan neketsu hori egin aurretik herrian barrena buelta
egingo dute karroza gainean eta inguratzen zaizkien haur guztiak agurtuko
dituzte, karameluak banatzen dituzten bitartean.
Arratsaldeko 16:00etan ohitura den bezala zaharren egoitzara joango
dira eta arratsaldeko 18:00etan aterako da Latsunbetik herritik buelta
emango duen Erregeen karroza. Latsunbetik Elkanon gora igo, plazara
sartu eta Kardaberaz kalean behera jeitsiko dira Zinkoenearaino. Handik,
Txirrita, Elkano eta Izpizua kaleak pasako dituzte eta gero Kale Nagusian
barrena Gudarien plazara joango dira. Gudarien plazan Belengo Estalpea
jarrita egongo da, eta 20:00ak aldera, Errege Magoak Udaletxeko arkupeetan
egongo dira umeekin. Ibilbidea musikaz lagunduko dute Hernaniko Txistulari
Bandak eta Hernaniko Musika Bandak. Plazan egingo duten ekitaldian txalaparta
doinuak izango dituzte lagun.
Aurten
karrozarekin
Lehengo urtean Erregeak zaldiz etorri ziren eta duela bi urte ez zen
kabalgatarik izan. Aurten berriro ere kabalgata antolatzeko komisioa
osatu egin da eta bertan daude Berriak, beste komertzioak eta hainbat
boluntario. Udalak ere lagundu du. Antolatzaileek esan dute kabalgata
egunerako laguntza behar dutela, karroza inguruko seguritate-soka eusteko
jendea behar da-eta.
Hernaniko
Ehitza Txapelketa
Iñaki
Loiartek bigarren urtez segidan
irabazi dezake gaur
Iñaki
Loiarte (iazko txapelduna) dijoa aurrena, bigarren Juan Antonio Beraza
eta hirugarren Mikel Arrieta. Azkeneko jornada gaur jokatuko da Epelerreka
eta Usokoerrekan, 09:00etatik 13:00etara.
Txantxangorri
elkarteak antolatuta, gaur jokatuko da 2003ko Hernaniko ehiza txapelketako
azkeneko jornada. Iñaki Loiarte iazko txapelduna dijoa lehendabizi
txapelketan, joan den igandean berak irabazi zuelako. Bi egunetan jokatzen
den txapelketa honetan, ehiztari bakoitzari bi egunetako puntuak hartzen
zaizkio kontuan sailkapenerako. Juan Antonio Berazak egin zuen bigarren
aurreko igandean eta oso puntu gutxira dago lehenengotik. Hirugarren
Mikel Arrieta dago.
25 urtez egin den txapelketa
Aurtengoa 25garren edizioa du txapelketak. Ehiztariak txakurrak lagunduta
egin behar du ehiza eta irabazlea zonaldeko txapelketara pasako da.
Sahara
laguntzeko kanpaina hasi zen atzo eta 1200 kilo janari jaso zituzten
Antolatzaileek
dei egin dute janaria ematen jarraitzeko, batez ere esne hautsa eta
atuna oliotan. Biterin, ikastoletan eta hainbat komertziotan utzi ahal
izango da janaria.
Atzo
goizean Plaza Berrian janaria biltzen aritu ziren Sahara laguntzeko
kanpainari hasiera emanez. Hainbat supermerkaturen ateetan ere egon
ziren janaria biltzen. Orain arte Biterin ari ziren janaria jasotzen
baina orain elkarte batzuk bildu eta kanpaina elkarrekin egitea erabaki
dute. Elkarlanean dabiltzanak dira: Udala, ikastetxeak, Saharako haurrak
etxean hartutako familiak, Eliza Ebanjelikoa, Eliza Katolikoa eta kooperazio
taldea.
Kamioi bete janari Saharara
Atzo goizean zehar 1200 kilo janari bildu zituzten eta antolatzaileak
oso pozik daude herritarren partetik jasotako erantzunarekin. Baina
asmoa da Hernanitik Saharara kamioi bete janari bidaltzea eta horretarako
kanpainaren antolatzaileek dei egin dute janaria ematen jarraitzeko.
Eraman beharreko janaria da: garbantzuak, lentejak, babarrunak, arroza,
olioa eta batez ere atuna eta esne hautsa. Izan ere, bi elikagai horiek
eraman ditu jendeak gutxiena. Janaria Biterin utzi daiteke eta hemendik
aurrera hainbat supermerkatu eta ikastoletara ere eraman ahal izango
da janaria.
Saharara kamioia bidaltzea diru asko kostatzen da eta horretarako dirua
behar da. Kanpaina diruz lagundu nahi duenak kontu hauetan egin behar
du ingresoa: Kutxa: 2101 0200 44 0011305190. Laborala: 3035 0060 45
0600047469.
Jasota
Bezala (Gutunak):
Zapatistak oroituz
Bi aldiz etorri dira Chiapasko zapatistak Hernanira azken
urteetan. Lehenengoan, duela hiruzpalau urte, Yolanda Castro Erresistentzian
dagoen Gizarte Zibileko Koordinakunde Zapatistako kidea izan genuen
gure artean. Harrera beroa egin zion orduko alkate Mertxe Etxeberriak
udaletxean. Ondoren, Ezker Abertzaleko zinegotziekin bildu zen. Bilera
hartan alkateak hitzaldi bat emateko eskaintza egin zion Yolandari.
Hitzaldia Biterin eman zuen eta alkatea ere bertan izan zen Yolandak
esandakoak entzuten; bigarrenean, duela bi urte eskas, Micaela Hernandez
K’inal Antzetik emakume taldeko lehendakariarekin batera etorri
zen Yolanda Hernanira. Bisitaldiaren xedea zen Chiapasko emakume joskileen
kooperatiba projekturako laguntza eskatzea eta harreman instituzionala
zabaltzea hango eta hemengo udalerrien artean. Arazo burokratikoak medio,
ezin izan zuten laguntza ekonomikorik jaso. Aldiz, elkartasunaren oihala
hobeto josten erakutsi ziguten.
Orain bete dira 10 urte zapatistak Chiapasen matxinatu zirenetik. Hango
egoerak gogorra izaten jarraitzen du. Baina zapatismoak herri indiarren
duintasun errebeldea erakutsi du. Eta boteretsuen indargabetze saio
guztien gainetik, mundu mailako mugimendu bilakatu da zapatismoa, alegia,
mundu anitzen mundu berri baten itxaropen hazi.
Urteurrena osapatzeko, zenbait ekitaldi antolatuko dira Hernanin urtarrilean
zehar. Besteak beste, zapatismoaren hamar urteak aztertzen dituen dokumentalen
projekzioa, Jon Zabaletak ilustratu dituen ipuin zapatista euskaratuen
erakusketa, eta Txan magoaren ikuskizun berria.
Xabi Ibarzabal