Untitled Document

Futbola
Emakumezkoen ligan irabazi eta Gorengoen ligan berdindu, eta bi taldeek itxura ona eman dute
Larunbatean 3-0 irabazi zion Hernanik Usurbili. Lehenengo gola Alkainek sartu zuen eta beste biak Eizagirrek. Atzo 1-1 berdindu zuten Hernanik eta Ordiziak. Hernaniarren gola Olasagastik sartu zuen.

Astebukaera honetan etxean jokatu du Hernanik bai Gorengoen ligan eta bai Emakumezkoen ligan ere. Emakumezkoen taldeak larunbat arratsaldean jokatu zuen Zubipen eta Usurbileko taldea izan zuen aurrez aurre. Hernanik 3 eta 0 irabazi zuen. Aurreneko gola Itsasne Alkainek sartu zuen eta gainontzekoak Olaia Eizagirrek. Hiru golak bigarren zatian izan ziren: bata zuzeneko falta izan zen, bestea jugadakoa eta beste penaltiz sartutakoa. Taldeko entrenadorea den Marcos Trejok Kronikari adierazi dionez Hernanik ondo jokatu zuen eta taldeak kontratake onak egin zituen.
Partidu honek klasifikazioan puntu gehiago lortzeko balio izan dio Hernaniri. Hernani 8garren zijoan orain arte klasifikazioan, jokatutako 15 partidutatik 4 irabazi, 4 berdindu eta 7 galduta. Usurbil azkenekoa dijoa klasifikazioan, 11garren postuan eta jokatutako 14 partidutatik bakarra irabazi du.
Datorren astean Hernanik deskantsoa du eta hurrengo partidua urtarrilaren 18an izango dute Mutrikuren aurka, Mutrikun bertan. Partidu zaila izango dute, Mutriku klasifikazioan aurrenekoa dijoa-eta, jokatutako partidu guztiak irabazita.

Gorengo taldeak berdindu, Ordiziaren kontra
Hernanik atzo arratsaldean jokatu zuen Zubipen Ordiziaren kontra eta 1-1 berdindu zuen. Bi golak lehenengo zatian sartu zituzten. Lehenbizikoa Ordiziak sartu zuen 18garren minutuan eta Hernanik 40garren minutuan berdindu zuen, Iñigo Olasagastik faltaz sartutako golarekin. Olasagastik area haundiaren ertzetik bota zuen falta eta eskuadra-eskuadratik sartu zion porteroari baloia. Golak indarra eman zien Jon Loranen mutilei eta hortik aurrera nagusi izan ziren partidua bukatu zen arte. Bigarren zatian zorte pittin bat behar izan zuten hernaniarrek, partidua esku-eskutan izan baitzuten ia minuturik gehienetan.
Zubipen jendea oso gustora gelditu zen partidu bukaeran eta mutilak ere oso animatuta daude hurrengo partiduetarako, taldeko delegatuak Kronikari jakin arazi dionez.
Hernani 16garren zijoan orain arte klasifikazioan jokatutako 18 partidutatik 6 irabazi, 3 berdindu eta 9 galduta. Ordiziak Hernaniren atzean jarraitzen du jokatutako 18 partidutatik 4 irabazi eta 8 galduta.
Datorren astean, urtarrilak 11, igandea, Hernanik Amaikak Bat taldearen kontra jokatuko du. Amaikak bat azkena dijoa sailkapenean.

Iñaki Loiarte onena Hernaniko ehiza txapelketan
Bigarrena Juan Antonio Beraza izan da; hirugarrena Asier Arrizabalaga eta laugarrena Iñaki Mendizabal. Saribanaketa: urtarrilaren 16an, Txantxangorrin.

Iñaki Loiartek irabazi du Hernaniko 25garren ehiza txapelketa. Joan den urteko txapelduna da Loiarte eta aurten ere lehenengo jardunalditik erakutsi du nagusitasuna. Bi igandeetan 4 faisan eta 8 eper bota ditu Loiartek eta 1.216 puntu lortu ditu. Juan Antonio Beraza nahiko gertu gelditu da txapeldunetik. Berazak 1.108 puntu lortu ditu eta guztira 7 faisan eta 4 eper bota ditu. Hirugarrena Asier Arrizabalaga izan da, 1.013 punturekin, eta berak bota du txapelketako oilagor bakarra. Gainera Arrizabalaga gelditu da junior kategorian lehenengo. Laugarrena Iñaki Mendizabal izan da eta beteranorik onena Jose Luis Diez. Sarituak klasifikatuta daude hilabete honen bukaeran Urnietan jokatuko den zonaldeko txapelketarako.

61 faisan eta 72 eper
Txapelketarako, Txantxangorri elkarteko arduradunek 80 faisan eta 120 eper askatu dituzte bi igandeetan. Ehiztariek 72 eper eta 61 faisan bota dituzte eta oilagor bat ere bai.

Hernaniko Udalak Urumea garbitu nahi du

Hernaniko Udalak Eusko Jaurlaritzako Ingurugiro Sailari eskatu dio Urumea errioa garbitzeko. Urumea azkena garbitu zutela badira 10 urte, eta orduzkero errio ertzak eta hondoa betetzen ari dira pixkanaka zuhaixka, hondar eta harriz. Udalak adierazi duenez, sedimentu horrek traba jartzen dio ibaiari bertan pasatzeko, eta uholde arriskua haunditu egiten du. Udalak ez dauka konpetentziarik gai honetan, eta horregatik, Eusko Jaurlaritzari eskatu dio 4 urtean behin errioa garbitzeko.